ព័ត៌មាន

ប្រជុំ​ឆ្លង​របាយ​ការណ៍​ ខែ​កុម្ភៈ​ និង​ទិស​ដៅ ​ខែ​មីនា ​ឆ្នាំ​២០១៩ ​ក្រសួង​ការ​ពារ​ជាតិ​
នាយកដ្ឋានព័ត៌មាន(៣)
445
826 ប្រជុំ​ឆ្លង​របាយ​ការណ៍​ ខែ​កុម្ភៈ​ និង​ទិស​ដៅ ​ខែ​មីនា ​ឆ្នាំ​២០១៩ ​ក្រសួង​ការ​ពារ​ជាតិ​

       របាយ​ការណ៍​បូក​សារុប​ការ​ងារ​ខែ​កុម្ភៈ ​និង​ទិស​ដៅ​ ខែ​មីនា​ ឆ្នាំ​២០១៩​ ត្រូវ​បាន​​ក្រសួង​ការ​ពារ​ជាតិ​ លើក​យក​មក​ប្រជុំ​ឆ្លង​ នា​ព្រឹក​ថ្ងៃ​ទី​០១ ​ខែ​មីនា ឆ្នាំ​២០១៩​នេះ​។​ កិច្ច​ប្រជុំ​បាន​ប្រព្រឹត្ត​ ទៅ​ក្រោម​អធិបតី​ភាព​ សម្តេច​ពិជ័យ​សេនា ​ទៀ ​បាញ់ ​ឧប​នាយក​រដ្ឋមន្ត្រី ​រដ្ឋមន្ត្រី​ក្រសួង​ការ​ពារ​ជាតិ​។

​       ​ឯកឧត្តម ​នាយ​ឧត្តម​សេនីយ ​សំ ​វ៉ាន់​ថន​ អគ្គ​លេខា​ធិការ ​ក្រសួង​ការ​ពារ​ជាតិ​ បាន​អាន​របាយ​ការណ៍​បូក​សរុប​ការ​ងារ​ ដោយ​បាន​លើក​ឡើង​ពី​ព្រឹត្តិ​ការណ៍​សំខាន់ ​ដែល​បាន​កើត​មាន​​ឡើង​នៅ ​ក្នុង​ព្រះ​រាជា​ណា​ចក្រ​កម្ពុជា​ និង​បាន​បង្ហាញ​ពី​សភាព​ការណ៍​វិវត្តន៍​រីក​ចំរើន​ថ្មីៗ​ក្នុង​ខែ​កុម្ភៈ​កន្លង​មក​ ដែល​បាន​កើត​ឡើង​នូវ​ព្រឹត្តិ​ការណ៏​ធំ​ៗ​ ជាតិ​ និង​អន្តរ​ជាតិ​។​ របាយ​ការណ៍​ក៏​បាន​លើក​ឡើង​ផង​ដែរ​ ពី​លទ្ធ​ផល​​ការ​ងារ​ នៃ​កិច្ច​ការ​ពារ​ សន្តិ​សុខ ​ស្ថិរ​ភាព ​សណ្តាប់​ធ្នាប់​ សាធា​រណៈ ​ដែល​កង​យោធ​ពល​ខេមរ​ភូមិន្ទ​ ក៏​ដូច​ជា​កង​រាជ​អាវុធ​ហត្ថ​ ខិត​ខំ​ពុះ​​ពារ​សំរេច​បាន​ នៅ​ក្នុង​រយៈ​ពេល​១​ខែ ​កន្លង​ទៅ​ក្រោម​កិច្ច​សហការ​ ជា​មួយ​កំលាំង​​ មាន​សមត្ថ​កិច្ច​​ និង​អាជ្ញាធរ​មូល​ដ្ឋាន​ ក្នុង​ភារកិច្ច​ការ​ពារ​ជាតិ​។​ ​ចំណែក​លទ្ធផល​ការ​ងារ​កែ​ទំរង់​កង​យោធពល​ខេមរ​ភូមិន្ទ​វិញ​ នៅ​ក្នុង​រយៈ​ពេលខែ​កុម្ភៈ​នេះ​ របាយ​ការណ៍​បាន​បញ្ជាក់​ថា៖​ បាន​ធ្វើ​ការ​ហ្វឹក​ហ្វឺន​ បណ្តុះ​បណ្តាល ​និង​បំប៉ន​ជំនាញ ​នៅ​តាម​បណ្តា​សា​លា ​និង​កង​ឯក​ភាពនា​នា​ នៅ​ទូ​ទាំង​ប្រទេស​ផង​ដែរ​​។ ខ.ភ.ម ​បាន​ធ្វើ​ម្ចាស់​ការ​លើ​ការ​ពង្រឹង​ និង​ការ​ពារ​នៅ​តាម​បណ្តោយ​ព្រំ​ដែន ​និង​បណ្តា​កោះ​មួយ​ចំនួន ​ព្រម​ទាំង​មាន​កិច្ច​សហប្រតិបត្តិ​ការ​ល្អ​ជា​មួយ​ប្រទេស ​ជិត​ខាង​​។ យើង​បាន​ម្ចាស់​ការ​ និង​សហប្រតិបត្តិការ​បាន​ល្អ ​ជា​មួយ​អាជ្ញាធរ​មូល​ដ្ឋាន​ ព្រម​ទាំង​ សមត្ថ​កិច្ច​ គ្រប់​ជាន់​ថ្នាក់​ ក្នុង​ការ​អនុវត្ត​ច្បាប់​ ទប់​ស្កាត់​រាល់​បទ​ល្មើស​ផ្សេង​ៗ​ ដើម្បី​ឲ្យ​ភូមិ,​ ឃុំ​ មាន​សុវត្តិ​ភាព​។ សំរាប់​ទិស​ដៅ ​អនុវត្ត​បន្ត​នៅ​ក្នុង​ ខែ​ មីនា ​របាយ​ការណ៍​បាន​ដាក់​ចេញ​ នូវ​ទិស​ដៅ​អោយ​គ្រប់​បណ្តា​ អង្គ​ភាពកងយោធ​ពល​ខេមរ​ភូមិន្ទ ​បន្ត​អនុវត្ត​ផែន​ការ​កែ​ទំរង់​កង​យោធ​ពល​ខេមរ​ភូមិន្ទ​ បន្ត​ពង្រឹង​ ប្រៀប​ការ​ពារ​​ជាតិ ​នៅ ​តាម​ព្រំ​ដែន ​ត្រៀម​គ្រប់​លក្ខណៈ​ចុះ​ជួយ​សង្រ្គោះ​ប្រជាពល​រដ្ឋ​នៅ​ពេល​មាន​គ្រោះ​ធម្មជាតិ​កើត​ឡើង ​និង​បន្ត​រួម​សហការ ​ការ​ពារ​សន្តិ​សុខ​ សុវត្ថិ​ភាព​ ជូន​ប្រជាពល​រដ្ឋ​តាម​មូល​ដ្ឋាន​អោយ​បាន​ ល្អ​ប្រសើរ ​ពិសេស​ត្រៀម​ចូល​រួម​ក្នុង​ការ​ធ្វើ​លំហាត់​សម​យុទ្ធ​នាគ​មាស​២០១៩​ កម្ពុជា​​-ចិន​ នា​ពេល​ខាង​មុខ​ផង​ដែរ។ សម្តេច​ពិជ័យ​សេនា ​ទៀ ​បាញ់ ​ឧប​នាយក​រដ្ឋមន្ត្រី ​រដ្ឋមន្ត្រី​ក្រសួង​ការ​ពារ​ជាតិ

     ក្នុង​ឱកាស​នោះ ​សម្តេច​ពិជ័យ​សេនា ​ទៀ ​បាញ់ ​ឧបនាយក​រដ្ឋមន្ត្រី​ រដ្ឋមន្ត្រី​ ក្រសួង​ការ​ពារ​ជាតិ ​ព្រម​ទាំង​សមា​ជិក​អង្គ​ប្រជុំ​ទាំង​អស់​ ក៏​បាន​ធ្វើ​ការ​ពិភាក្សា​លើ​ខ្លឹម​សារ​ របាយ​ការណ៍​ បូក​សរុប​ការ​ងារ​​ ខែ​កុម្ភៈ​ និង​ទិស​ដៅ​ខែ​មីនា​ ដើម្បី​ដាក់​ចេញ​អោយ​អនុវត្ត​សំរេច​បាន​លទ្ធផល​ល្អ​បន្ថែម​ទៀត​។ ​បន្ទាប់​មក​ សម្តេច​ពិជ័យ​សេនា ​ទៀ បាញ់ ក៏​បាន​ប្រកាស​តែង​តាំង​មុខ​ដំណែង​ និង​​ធ្វើ​ការ​បំពាក់ឋានន្តរ​សក្តិ​ ថ្នាក់​នាយ​ឧត្តម​សេនីយ៏​ជូន​ចំពោះ​ ឯ.ឧ ​ភួង ​ស៊ីផាន​, ឯ.ឧ​ ព្រំ​ ឌិន​, ​ឯ.ឧ ​អ៊ុំ ​បុត្រ​, ឯ.ឧ ​ប៊ុន ​សេង​ ជា​រដ្ឋ​លេខា​ធិការ​ក្រសួង​ការ​ពារ​ជាតិ​ ដែល​ព្រះ​មហាក្សត្រ​ទើប​បាន​តែង​តាំង​កាល​ពី​ពេល​ថ្មី​ៗ​កន្លង​មក​នេះ​ផង​ដែរ​ ៕

អត្ថបទថ្មីៗ

សេចក្តីប្រកាស

សារជូនពរ

វីដេអូ