កិច្ចប្រជុំគណៈកម្មាធិការព្រំដែនទូទៅកម្ពុជា-ថៃ (GBC) លើកទី១៦ បានប្រារព្ធធ្វើនៅព្រឹកថ្ងៃទី២២ ខែមីនា ឆ្នាំ២០២៤ នៅសណ្ឋាគារ ហ្គាដិនស៊ីធីភ្នំពេញ រាជធានីភ្នំពេញ ព្រះរាជាណាចក្រកម្ពុជា ក្រោមអធិបតីភាព ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិកម្ពុជា និងជាសហប្រធានគណៈកម្មាធិការព្រំដែនទូទៅកម្ពុជា និងឯកឧត្តម ស៊ុធីន ខ្លាំងស៊ែង(SUTIN KLUNGSANG) រដ្ឋមន្ត្រីក្រសួងការពារជាតិ នៃព្រះរាជាណាចក្រថៃ និងជាសហប្រធានគណៈកម្មាធិការព្រំដែនទូទៅថៃ។
ថ្លែងបើកនៃកិច្ចប្រជុំនេះ នាយឧត្តមសេនីយ៍ ទៀ សីហា បានមានប្រសាសន៍ថា៖ កិច្ចប្រជុំនាថ្ងៃនេះ ពិតជាមានសារៈសំខាន់ ក្នុងការជម្រុញពង្រឹងមិត្តភាព សាមគ្គីភាព កិច្ចសហប្រតិបត្តិការ ឱ្យកាន់តែស៊ីជម្រៅ និងទូលំទូលាយបន្ថែមទៀត រវាងកងទ័ព និងប្រជាជនប្រទេសទាំងពីរកម្ពុជា-ថៃ ក្នុងស្មារតីយោគយល់ និងគោរពគ្នាទៅវិញទៅមក ដើម្បីជាប្រយោជន៍សម្រាប់ប្រជាជន និងកងទ័ពប្រទេសទាំងពីរ។ នាយឧត្តមសេនីយ៍ បានបន្តថា៖ ឆ្នាំ២០២៣ និងឆ្នាំ២០២៤នេះ គឺជាឆ្នាំដ៏វិសេសវិសាលមួយសម្រាប់កម្ពុជា-ថៃ ដែលនាយករដ្ឋមន្ត្រី នៃប្រទេសទាំងពីរ បានផ្លាស់ប្តូរដំណើរទស្សនកិច្ចផ្លូវការ ទៅវិញទៅមក ក្នុងនោះ ឯកឧត្តម សេដ្ឋា ថាវីស៊ីន បានដឹកនាំគណៈប្រតិភូជាន់ខ្ពស់ មកបំពេញទស្សនកិច្ចផ្លូវការ មកកាន់ព្រះរាជាណាចក្រកម្ពុជា ជាលើកដំបូង និងជាប្រទេសទី១ ក្នុងឱកាសដែលឯកឧត្តម ចូលកាន់តំណែងជានាយករដ្ឋមន្ត្រី នៃព្រះរាជាណាចក្រថៃ។ បន្ទាប់មកនៅថ្ងៃទី០៧ ខែកុម្ភៈ ឆ្នាំ២០២៤ កន្លងទៅថ្មីៗនេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក៏បានដឹកនាំគណៈប្រតិភូជាន់ខ្ពស់ ទៅបំពេញទស្សនកិច្ចផ្លូវការ នៅព្រះរាជាណាចក្រថៃ បានឆ្លុះបញ្ចាំងយ៉ាងច្បាស់នូវស្មារតី នៃភាពជាអ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការ ស្ថិរភាពយូរអង្វែង កម្ពុជា-ថៃ។ មួយវិញទៀត តាមរយៈការបំពេញទស្សនកិច្ចនេះ បានជម្រុញទំនាក់ទំនងទ្វេភាគី រវាងរាជរដ្ឋាភិបាល កងទ័ព និងប្រជាជនយើងទាំងពីរកើនឡើងមួយកម្រិតទៀត ពីភាពជាដៃគូ “ដើម្បីសន្តិភាព និងវិបុលភាព ទៅជាភាពជាដៃគូយុទ្ធសាស្ត្រ”។
កិច្ចកិច្ចប្រជុំគណៈកម្មាធិការព្រំដែនទូទៅ (GBC) លើកទី១៦នាពេលនេះ គឺជាឱកាសដ៏មានតម្លៃដែលយើង រួមគ្នាពិនិត្យទៅលើវឌ្ឍនភាព កិច្ចសហប្រតិបត្តិការ ដែលបានអនុវត្តកន្លងមក តាមកិច្ចព្រមព្រៀង និងខ្លឹមសារអនុស្សារណៈនៃការយោគយល់គ្នា (MoU) នៃ (GBC) ដែលបានដាក់ពេញក្នុងកិច្ចប្រជុំកាលពីឆ្នាំ២០២២ និងពិភាក្សាគ្នាលើកិច្ចសហប្រតិបត្តិការសំខាន់ៗថែមទៀត ស្របពេលដែលពិភពលោកកំពុងជួបប្រទះនឹងបញ្ហាស្មុគស្មាញក្នុងតំបន់ និងអន្តរជាតិ ប្រែប្រួលយ៉ាងឆាប់រហ័ស ទាំងសន្តិសុខប្រពៃណី និងមិនប្រពៃណី។ ជាមួយគ្នានេះ យើងនឹងរួមគ្នាដោះស្រាយកិច្ចការដែលនៅសេសសល់ ដើម្បីជម្រុញពង្រឹងទំនាក់ទំនងភាពជាអ្នកជិតខាងល្អ និងកិច្ចសហប្រតិបត្តិការវិស័យយោធា រវាងកងទ័ពប្រទេសទាំងពីរ ក្រោមស្មារតី “ពង្រឹងភាពជាដៃគូ ដើម្បីសន្តិភាព និងវិបុលភាព” សំដៅធានាបាននូវសន្តិភាព ស្ថិរភាព និងវិបុលភាពនៅតាមតំបន់ព្រំដែន ប្រែក្លាយតំបន់នេះទៅជាព្រំដែន នៃសន្តិភាព យូរអង្វែង និងការអភិវឌ្ឍ។
ថ្លែងបើកនៃកិច្ចប្រជុំគណៈកម្មាធិការព្រំដែនទូទៅ “GBC” លើកទី១៦ នាឱកាសនោះដែរ ឯកឧត្តម ស៊ុធីន ខ្លាំងស៊ែង បានមានប្រសាសន៍ថា៖ ឯកឧត្តម មានកិត្តិយសយ៉ាងក្រៃលែង ដែលបានធ្វើជាសហប្រធាន នៃកិច្ចប្រជុំ (GBC) លើកទី១៦ នាពេលនេះ ទាំងអស់នេះជាយន្តការកិច្ចសហប្រតិបត្តិការថៃ-កម្ពុជាដ៏សំខាន់ ក្នុងការលើកកម្ពស់ស្ថេរភាព សន្តិសុខនៅក្នុងតំបន់ព្រំដែន ដោយកិច្ចសហប្រតិបត្តិការដោះស្រាយបញ្ហារហូតដល់ការអភិវឌ្ឍសេដ្ឋកិច្ច និងសង្គមរួមគ្នា។ ក្នុងរយៈកន្លងមក (GBC) បានលើកកម្ពស់សម្ព័ន្ធភាព កិច្ចសហប្រតិបត្តិការ រវាងកងទ័ព ក្រសួងការពារជាតិ អន្តរក្រសួង នៃប្រទេសទាំងពីរ បានយ៉ាងជាក់ស្តែង ធ្វើឲ្យការរក្សាសន្តិសុខ សណ្តាប់ធ្នាប់ ស្ថេរភាពតាមព្រំដែនមានប្រសិទ្ធភាព មានផលដល់បច្ចុប្បន្ន។ តំបន់ព្រំដែនរបស់យើងមានសន្តិភាព ស្ថេរភាព បានទទួលការអភិវឌ្ឍរួមគ្នាយ៉ាងជាក់ស្តែង។ ឯកឧត្តម ស៊ុធីន ខ្លាំងស៊ែង ជឿជាក់ថា៖ ដោយបរិយាកាស នៃមិត្តភាព កិច្ចសហប្រតិបត្តិការដ៏ពិតប្រាកដរបស់ពួកយើង ធ្វើឲ្យកិច្ចប្រជុំ(GBC) លើកទី១៦ នាពេលនេះ បានប្រព្រឹត្តទៅដោយភាពជោគជ័យដូចរាល់លើកកន្លងមកយ៉ាងពិតប្រាកដ។
កិច្ចប្រជុំ(GBC)លើកទី១៦នេះ បានស្វាគមន៍ចំពោះវឌ្ឍនភាព នៃកិច្ចសហប្រតិបត្តិការតំបន់ព្រំដែន។ ភាគីទាំងពីរ បានពិនិត្យលទ្ធផល នៃការអនុវត្តកម្មវិធីកិច្ចសហប្រតិបត្តិការផ្សេងៗ ដែលជាលទ្ធផល កិច្ចប្រជុំ (GBC) លើកទី ១៥ ដែលប្រព្រឹត្តទៅនៅទីក្រុងបាងកក ព្រះរាជាណាចក្រថៃ នាថ្ងៃទី២៥ ខែវិច្ឆិកា ឆ្នាំ២០២២ ដូចជាកិច្ចសហប្រតិបត្តិការលើការឆ្លងព្រំដែន បញ្ជាការងារ ការទប់ស្កាត់ការជួញដូរ និងបង្ក្រាបគ្រឿងញៀន ការលើកកម្ពស់កិច្ចសហប្រតិបត្តិការ រវាងយោធាកម្ពុជា និងអង្គភាពសន្តិសុខថៃ នៅតាមតំបន់ព្រំដែន កសិកម្ម សុខភាពសាធារណៈ ការអភិវឌ្ឍន៍ គុណភាពជីវិត ការអប់រំ សាសនា និងវប្បធម៌។ កិច្ចប្រជុំនេះក៏បានពិចារណាលើកិច្ចសហប្រតិបត្តិការលើគ្រប់វិស័យ និងការបន្តទិសដៅអនុវត្តការងាររួមគ្នា ក៏ដូចជាបំពេញបន្ថែមកិច្ចសហប្រតិបត្តិការ ការដោះស្រាយបញ្ហាបំពុលផ្សែង ឆ្លងដែន ការរត់ពន្ធអាវុធ និងបញ្ហា Call Center។ ភាគីទាំងពីរបានឯកភាពរក្សា និងជំរុញកិច្ចសហប្រតិបត្តិការ លើវិស័យសន្តិសុខតាមព្រំដែនគ្រប់កម្រិតជាប្រចាំ ដើម្បីធានាបាននូវសន្តិភាព និងសន្តិសុខនៅតាមតំបន់ព្រំដែន ដែលជាកត្តាសំខាន់បំផុតសម្រាប់ការអភិវឌ្ឍន៍នៃប្រទេសទាំងពីរ។ សម្រាប់កិច្ចប្រជុំគណៈកម្មាធិការព្រំដែនទូទៅកម្ពុជា-ថៃ (GBC) លើកទី១៧ ភាគីថៃ នឹងធ្វើជាម្ចាស់ផ្ទះនៃកិច្ចប្រជុំ (GBC) កម្ពុជា-ថៃ លើកទី១៧ នៅឆ្នាំ២០២៥ ៕
