កាលពីថ្ងៃទី០៥ ខែឧសភា ឆ្នាំ២០២៤ ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានក្រុមការងាររដ្ឋាភិបាលចុះជួយមូលដ្ឋានខេត្តសៀមរាប និងលោកជំទាវ ទាន អេង ទៀសីហា បានអញ្ជើញជាអធិបតីខួបទី១៦១ ទិវាពិភពលោកកាកបាទក្រហម អឌ្ឍចន្ទក្រហម ក្រោមប្រធានបទ “រួមគ្នាជាមួយកាកបាទក្រហមកម្ពុជា ដើម្បីសហគមន៍មានសុខភាពល្អ និងមានភាពធន់នឹងអាកាសធាតុ” ដែលបានរៀបចំឡើងដោយសាខាកាកបាទក្រហមកម្ពុជា ដែលមានការអញ្ជើញចូលរួមពី ឯកឧត្តម លោកឧកញ៉ា លោកជំទាវ អស់លោក លោកស្រី កងកម្លាំង មន្ត្រីរាជការ អនុសាខាក្រុម ស្រុក សប្បុរសជន និងអង្គការដៃគូ ប្រមាណ៨០០នាក់ចូលរួម។
ក្នុងកិច្ចស្វាគមន៍របស់ឯកឧត្តម ប្រាក់ សោភ័ណ ប្រធានគណៈកម្មាធិការសាខាកាកបាទក្រហមខេត្ត បានបញ្ជាក់ពីលទ្ធផលសកម្មភាពមនុស្សធម៌របស់សាខា អនុវត្តបានក្នុងឆ្នាំ២០២៣ លើការងារមនុស្សធម៌ សាខាបានផ្តល់អំណោយមនុស្សធម៌ដល់គ្រួសាររងគ្រោះ ដោយខ្យល់កន្ត្រាក់ ទឹកជំនន់ អគ្គិភ័យ លង់ទឹកស្លាប់ គ្រោះថ្នាក់ដោយគ្រាប់មីន និងគ្រោះថ្នាក់ដោយឧបទ្ទវហេតុផ្សេងៗ សរុប២.៧៧២គ្រួសារ ដែលមានមនុស្សចំនួន ១១.៨៤២នាក់ ចុះជួបសួរសុខទុក្ខស្ត្រីមានផ្ទៃពោះ ស្ត្រីទើបសម្រាលកូន ដោយអប់រំផ្សព្វផ្សាយពីការថែទាំសុខភាពមាតាទារក និងកុមារ សរុបចំនួន២.០៦៩នាក់ និងចែកជូនអំណោយមនុស្សធម៌ ចំនួន១១០នាក់ ការសាងសង់ផ្ទះមនុស្សធម៌សរុបចំនួន៤ខ្នង និងកំពុងពិនិត្យស្ថានភាពគ្រោងសាងសង់ចំនួន៤ខ្នងទៀត។
ក្នុងឱកាសនោះ ឯកឧត្តម ទៀ សីហា បានបញ្ជាក់ថា៖ ថ្ងៃនេះពិតជាមានសារៈសំខាន់សម្រាប់សាខាកាកបាទក្រហមកម្ពុជា ខេត្តសៀមរាប ក៏ដូចជាសម្រាប់អាជ្ញាធរខេត្ត និងប្រជាពលរដ្ឋទូទាំងខេត្តសៀមរាប ដើម្បីបុព្វហេតុមនុស្សធម៌ សំដៅជួយដល់ជនរងគ្រោះ និងជនងាយរងគ្រោះតាមរយៈការជួយសម្រាលជនរងគ្រោះ ដោយគ្រោះមហន្តរាយនានា និងការថែទាំសុខភាព តាមសហគមន៍ និងសកម្មភាពមនុស្សធម៌ផ្សេងទៀត។ ឯកឧត្តមបានអាននូវសារលិខិត សម្ដេចគិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក្នុងឱកាសខួប១៦១ ទិវាពិភពលោកកាកបាទក្រហម និងអឌ្ឍចន្ទក្រហម ០៨ ឧសភា ឆ្នាំ២០២៤ ដែលនៅក្នុងខ្លឹមសារលិខិតបានថ្លែងអំណរគុណយ៉ាងជ្រាលជ្រៅ ប្រកបដោយការកោតសរសើរ ចំពោះគណៈកិត្តិយស គណៈកម្មាធិការសាខា អនុសាខា ដែលមានស្មារតីទទួលខុសត្រូវខ្ពស់ ក្នុងការពង្រឹងភាពជាម្ចាស់ ទាំងសមត្ថភាព ទាំងធនធាន របស់សាខា អនុសាខា តាមទិសវិមជ្ឈការ និងវិសហមជ្ឈការ ដោះស្រាយឆ្លើយតបបានភ្លាមៗ ទៅនឹងភាពងាយរងគ្រោះ និងបញ្ហាប្រឈមនានា នៅក្នុងរដ្ឋបាល ដែនដីនីមួយៗ បានឆាប់រហ័ស និងទាន់ពេលវេលា ស័ក្ដិសមជាជំនួយការជូនអាជ្ញាធរសាធារណៈ ក្នុងវិស័យមនុស្សធម៌។
ឯកឧត្តម ទៀ សីហា បានបញ្ជាក់ថា៖ សម្រាប់ឆ្នាំ២០២៤នេះ ប្រធានបទ “រួមគ្នាជាមួយកាកបាទក្រហមកម្ពុជា ដើម្បីសហគមន៍មានសុខភាពល្អ និងមានភាពធន់នឹងអាកាសធាតុ” មានគោលបំណងសំខាន់ បង្ហាញពីការប្ដេជ្ញាចិត្តរបស់កាកបាទក្រហមកម្ពុជា បន្តកិច្ចខិតខំប្រឹងប្រែងពង្រឹង និងពង្រីកការអប់រំផ្សព្វផ្សាយ ស្ដីពីការថែទាំសុខភាពបឋមតាមសហគមន៍ និងពង្រឹងភាពធន់នឹងអាកាសធាតុ ដើម្បីចូលរួមជាមួយរាជរដ្ឋាភិបាលកម្ពុជា ក្នុងការអនុវត្តវិធានការគន្លឹះនានា ជាពិសេសក្នុងរដូវប្រាំងឆ្នាំនេះ ដែលកម្ដៅកើនឡើងខ្ពស់មិនធ្លាប់ដែលមាន ដើម្បីពង្រឹងសេវាថែទាំសុខភាព ឆ្ពោះទៅការគ្របដណ្តប់សុខភាពជាសកល ធានាសុវត្ថិភាពសុខភាព និងការលើកកម្ពស់សុខុមាលភាព និងជីវភាពរស់នៅរបស់ប្រជាពលរដ្ឋ។ ឯកឧត្ដមក៏បានជំរុញដល់សាខា អនុសាខាខិតខំធ្វើការទំនាក់ទំនងជាមួយសប្បុរសជន សំដៅធ្វើការសាងសង់ផ្ទះមនុស្សធម៌ជូនដល់ប្រជាពលរដ្ឋក្រីក្រ ចាស់ជរាគ្មានទីពឹង ជនពិការជនពិការនៅតាមមូលដ្ឋានរបស់ខ្លួន សំខាន់លើកសុខភាពមាតា និងទារក និងការផ្គត់ផ្គង់ទឹកស្អាតជាដើម។ ក្នុងសកម្មភាពមនុស្សធម៌នេះដែរ ក៏បានចូលរួមឧបត្ថម្ភដល់សាខាកាកបាទក្រហមកម្ពុជាខេត្តសៀមរាប រួមមាន៖ អង្ករ២តោន ទឹកបរិសុទ្ធ១៥០កេស និងថវិកាជាតួលេខបឋមចំនួន ៤១២៦៣ដុល្លារ ៕
