កងកម្លាំងរក្សាសន្តិភាពរបស់កម្ពុជា ចំនួន៣៤៦នាក់ បានធ្វើដំណើរមាតុភូមិនិវត្តន៍មកដល់កម្ពុជាវិញ នាព្រលប់ថ្ងៃ១៨ ខែធ្នូ ឆ្នាំ២០២៣ ក្រោយបញ្ចប់បេសកកម្មរក្សាសន្តិភាព ក្រោមឆត្ររបស់អង្គការសហប្រជាជាតិ នៅសាធារណរដ្ឋម៉ាលី និងប្រទេសស៊ូដង់ខាងត្បូង ដោយជោគជ័យ។ កងកម្លាំងមួកខៀវ ដែលបានបញ្ចប់បេសកកម្មរបស់ខ្លួននៅសាធារណរដ្ឋម៉ាលី និងប្រទេសស៊ូដង់ខាងត្បូង មាន៣កង រួមមាន៖ កងវិស្វកម្មព្រលានយន្តហោះលេខ៧២៩ ចំនួន១២៩នាក់, កងកម្ទេចគ្រឿងផ្ទុះលេខ៨២៨ ចំនួន១៤៤នាក់ និងកងរាជអាវុធហត្ថលេខ១៧១ ចំនួន៧៣នាក់។
ដើម្បីជាការលើកទឹកចិត្តដល់កងកម្លាំងរក្សាសន្តិភាពកម្ពុជា ដែលបានធ្វើមាតុភូមិនិវត្តន៍មកកាន់ប្រទេសកម្ពុជាវិញ នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ, លោក ចូ សឺអឺ (JO SCHEUER) អ្នកសម្រួលអង្គការសហប្រជាជាតិប្រចាំកម្ពុជា រួមទាំងថ្នាក់ដឹកនាំក្រសួងការពារជាតិ បានអញ្ជើញទទួលស្វាគមន៍ការធ្វើមាតុភូមិនិវត្តន៍ និងបំពាក់មេដាយ ជូនកងកម្លាំងមួកខៀវកម្ពុជា ដែលបានប្រព្រឹត្តទៅ នៅមូលដ្ឋានទ័ពអាកាសពោធិ៍ចិនតុង។
យោងតាមរបាយការណ៍ស្វាគមន៍ របស់នាយឧត្តមសេនីយ៍ សែម សុវណ្ណនី អនុប្រធានទី១ គណៈកម្មាធិការជាតិ និងជាអគ្គនាយកមជ្ឈមណ្ឌលជាតិ រក្សាសន្តិភាព បានថ្លែងថា៖ បេសកកម្មនៅសាធារណរដ្ឋម៉ាលី កម្លាំងកម្ពុជា បានប្រឈមនឹងបញ្ហាស្មុគស្មាញជាលក្ខណៈប្រពៃណីផង និងមិនប្រពៃណីផង បង្កឡើងដោយតួអង្គរដ្ឋ និងមិនមែនរដ្ឋ ក៏ប៉ុន្តែកងកម្លាំងមួកខៀវកម្ពុជា តែងតែស្វាហាប់ មិនរាថយ ក្នុងការបំពេញតួនាទីភារកិច្ចឡើយ និងសម្រេចបាននូវលទ្ធផលយ៉ាងល្អប្រសើរជូនជាតិ និងពិភពលោក។
ជាមួយគ្នានេះលោក ចូ សឺអឺ (JO SCHEUER) អ្នកសម្របសម្រួលអង្គការសហប្រជាជាតិ ប្រចាំកម្ពុជា បានបង្ហាញការស្ងប់ស្ងែង ចំពោះការលះបង់របស់កងកម្លាំងមួកខៀវកម្ពុជា ក្នុងការកសាងសន្តិភាព សន្តិសុខ និងមិត្តភាព។ លោកបានបញ្ជាក់ថា៖ វត្តមានរបស់លោកនាពេលនេះ មិនត្រឹមតែស្វាគមន៍ដំណើរមាតុភូមិនិវត្តន៍របស់កងកម្លាំងនោះទេ ប៉ុន្តែក៏បានបញ្ជាក់ពីការស្វាគមន៍កម្លាំងទាំងអស់ជាគ្រួសាររបស់អង្គការសហប្រជាជាតិ។ លោកបានបន្ថែមថា៖ កងកម្លាំងទាំងអស់បានពាក់មួកខៀវដ៏ល្បីល្បាញ បំពាក់និមិត្តសញ្ញាអង្គការសហប្រជាជាតិនៅលើឯកសណ្ឋាន និងចូលរួមអនុវត្តភារកិច្ចក្រោមទង់អង្គការសហប្រជាជាតិ។
នាយឧត្តមសេនីយ៍ ឧបនាយករដ្ឋមន្ត្រី ទៀ សីហា បានលើកឡើងថា៖ ការនិវត្តន៍របស់កម្លាំងរក្សាសន្តិភាព នាថ្ងៃនេះ គឺជាសមិទ្ធិផលថ្មីមួយថែមទៀត ក្នុងចំណោមសមិទ្ធផលជាច្រើន ដែលកងយោធពលខេមរភូមិន្ទសម្រេចបាននៅលើវិស័យរក្សាសន្តិភាព។ សមិទ្ធផលនេះបានបង្ហាញពីឆន្ទៈ ការគោរពវិន័យម៉ឺងម៉ាត់ សមត្ថភាព ប្រកបដោយវិជ្ជាជីវៈ របស់កងទ័ពមួកខៀវកម្ពុជា ក្នុងសកម្មភាពមនុស្សធម៌ ក្រោមឆត្រអង្គការសហប្រជាជាតិ ជាសក្ដានុពលដ៏ខ្លាំងក្លារបស់កងយោធពលខេមរភូមិន្ទ។ ឯកឧត្តម ទៀ សីហា បានលើកឡើងថា៖ ការធ្វើមាតុភូមិនិវត្តន៍របស់កងកម្លាំងទាំង៣កង ដែលបញ្ចប់បេសកកម្មរបស់សហប្រជាជាតិនៅសាធារណរដ្ឋម៉ាលី និងស៊ូដង់ខាងត្បូង នាពេលនេះ ជាជោគជ័យ និងស្នាដៃដ៏ត្រចះត្រចង់ថ្មីមួយបន្ថែមទៀត ដែលកម្លាំងមួកខៀវកម្ពុជា សម្រេចបានក្នុងការបំពេញបេសកកម្មអន្តរជាតិ ដើម្បីបុព្វហេតុសន្តិភាព និងមនុស្សធម៌នៅលើពិភពលោក។ ឯកឧត្តម ទៀ សីហា បានថ្លែងអំណរគុណដល់ជនរួមជាតិទាំងអស់ ដែលបាន លះបង់កូនចៅ ប្តីសី និងសាច់ញាតិជាទីស្រឡាញ់របស់ខ្លួន រួមចំណែកយ៉ាងស្មោះស្ម័គ្រ ក្នុងបេសកកម្មរក្សាសន្តិភាពរបស់អង្គការសហប្រជាជាតិ ដើម្បីបុព្វហេតុសន្តិភាព និងមនុស្សធម៌ដ៏ថ្លៃថ្លា និងសូមអំពាវនាវពាំនាំការសាកសួរសុខទុក្ខ និងសេចក្តីនឹករំឭក សម្តេចធិបតី ហ៊ុន ម៉ាណែត នាយករដ្ឋមន្ត្រី ជូនដល់នាយទាហាន នាយទាហានរង និងពលទាហាន ដែលបានបញ្ចប់បេសកកម្ម និងកំពុងបំពេញបេសកកម្មរក្សាសន្តិភាព របស់អង្គការសហប្រជាជាតិ។ បន្ថែមពីនេះ ឯកឧត្តម ឧបនាយករដ្ឋមន្ត្រី បានបញ្ជាក់ថា៖ ការបញ្ចប់ភារកិច្ចរបស់កងទ័ពមួកខៀវកម្ពុជា នៅក្នុងតំបន់បេសកកម្ម សុទ្ធតែបង្ហាញពីកិច្ចខិតខំប្រឹងប្រែងរបស់កម្ពុជា ក្នុងការពង្រឹង និងពង្រីកកិច្ចសហប្រតិបត្តិការល្អ ជាមួយប្រជាជាតិទូទាំងពិភពលោក តាមក្របខ័ណ្ឌទ្វេភាគី តំបន់ និងអន្តរ ដើម្បីរួមចំណែកដល់សន្តិភាព សន្តិសុខ ស្ថិរភាព ការអភិវឌ្ឍន៍ ប្រកបដោយចិរភាព និងវិបុលភាពរួមរបស់ពិភពលោក។
សូមរំឭកថា៖ តាមរយៈនយោបាយឈ្នះឈ្នះ របស់សម្តេចតេជោ ហ៊ុន សែន កម្ពុជាពិតជាមានមោទនភាពណាស់ បានរួមចំណែកយ៉ាងសំខាន់ ក្នុងវិស័យរក្សាសន្តិភាព ដែលបានបង្ហាញពីឆន្ទៈរួមវិភាគទាន ដល់កិច្ចប្រឹងប្រែងរបស់សហគមន៍អន្តរជាតិ ដើម្បីបុព្វហេតុសន្តិភាព សន្តិសុខ និងមនុស្សធម៌ នៅលើលោក ចាប់តាំងពីឆ្នាំ២០០៦ រហូតមកដល់បច្ចុប្បន្ន កម្ពុជាបានរួមចំណែកបញ្ជូនកងកម្លាំងទៅបំពេញបេសកកម្មរក្សាសន្តិភាពរបស់អង្គការសហប្រជាជាតិ ចំនួន ៩២០៥នាក់ ក្នុងនោះនារី ៧២៦នាក់ ទៅកាន់បេសកកម្មចំនួន១២ ក្នុងប្រទេសចំនួន១០ សម្រេចជោគជ័យ ជាបន្តបន្ទាប់ ដែលជាបុព្វហេតុថែរក្សាសន្តិភាព ស្ថិរភាព ពិភពលោក និងទទួលបានការកោតសរសើរលើឆាកអន្តរជាតិ ៕
