ឯកឧត្ដម នាយឧត្ដមសេនីយ៍ ទៀ សីហា ឧបនាយករមន្ត្រី រដ្ឋមន្ត្រីក្រសួងការពារជាតិ តំណាងដ៏ខ្ពង់ខ្ពស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នៅរសៀលថ្ងៃទី២៨ ខែមេសា ឆ្នាំ២០២៤ បានដឹកនាំគណៈប្រតិភូរាជរដ្ឋាភិបាល ក្រសួងការពារជាតិ អគ្គមេបញ្ជាការ នៃកងយោធពលខេមរភូមិន្ទ អញ្ជើញចូលរួមគោរពវិញ្ញាណក្ខន្ធ បំពាក់ឋានន្តរស័ក្តិយោធិន២០រូប ដែលបានពលីជីវិត ដោយឧបទ្ទវហេតុផ្ទុះគ្រាប់ នៅបញ្ជាការដ្ឋានយោធភូមិភាគទី៣ ខេត្តកំពង់ស្ពឺ កាលពីរសៀលថ្ងៃសៅរ៍ ទី២៧ ខែមេសា ឆ្នាំ២០២៤។ ពិធីនេះក៏មានការអញ្ជើញចូលរួមពី ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងមន្ត្រីអ្នកមុខអ្នកការ ក្នុងជួររាជរដ្ឋាភិបាល ថ្នាក់ដឹកនាំជាន់ខ្ពស់ ក្នុងក្រសួងការពារជាតិ អគ្គមេបញ្ជាការ មន្ត្រីរាជការយ៉ាងច្រើនកុះករផងដែរ។
នៅក្នុងឱកាសអញ្ជើញ គោរបវិញ្ញាណក្ខន្ធ បំពាក់ឋានន្តរស័ក្តិយោធិន ដែលបានពលីជីវិតទាំង២០រូបនេះដែរ នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ក៏បាននាំយកនូវសារចូលរួមរំលែកទុក្ខរបស់ សម្ដេចតេជោ ហ៊ុន សែន ប្រធានឧត្តមក្រុមប្រឹក្សាព្រះមហាក្សត្រ និងជាប្រធានព្រឹទ្ធសភាជាតិ និងសម្ដេចមហាបវរធិបតី ហ៊ុន ម៉ាណែត ជូនដល់ក្រុមគ្រួសារសពយោធិនទាំង២០រូបផងដែរ។ ក្នុងឱកាសនោះ ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ក៏បាននាំយកថវិកាប្រគល់ជូនក្រុមគ្រួសារសពយោធិនទាំង២០រូប ដោយក្នុងមួយគ្រួសារៗទទួលបានថវិកា២ម៉ឺនដុល្លារ ជាថវិការបស់សម្ដេចធិបតីហ៊ុន ម៉ាណែត, ៣លានរៀលជាថវិកាក្រសួងការពារជាតិ, ៥ពាន់ដុល្លារជាថវិកាមកពីសប្បុរសជននានា និងមួយគ្រួសារ១លានរៀលជាថវិការបស់ឯកឧត្តម ឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈ។
សូមបញ្ជាក់ថា៖ កាលពីរសៀលថ្ងៃសៅរ៍ ទី២៧ ខែមេសា ឆ្នាំ២០២៤ មានករណីឧបទ្ទវហេតុផ្ទុះគ្រាប់ នៅបញ្ជាការដ្ឋានយោធភូមិភាគទី៣ បណ្តាលឲ្យយោធិនចំនួន២០នាក់ បានពលីជីវិត និងយោធិនមួយចំនួនទៀតបានរងរបួស។ ជាមួយនឹងសារចូលរួមរំលែកទុក្ខ និងជួយថវិកាទៅក្រុមគ្រួសារសពយោធិន សម្តេចអធិបតី ហ៊ុន ម៉ាណែត ក៏បានផ្តល់ថវិកាចំពោះយោធិនដែលរងរបួស ក្នុងឧបទ្ទវហេតុនេះ ក្នុងម្នាក់ៗចំនួន ២០លានរៀលផងដែរ។
ថ្លែងនៅក្នុងពិធីប្រទានភ្លើងបូជាសពយោធិនពលី នៅក្នុងបញ្ជាការដ្ឋានយោធភូមិភាគទី៣ នាពេលនោះ នាយឧត្តមសេនីយ៍ ទៀ សីហា ជំនួសមុខឲ្យ សម្ដេចធិបតី ហ៊ុន ម៉ាណែត បានសម្ដែងនៅការសោកស្ដាយ ស្រណោះអាឡោះអាល័យជាទីបំផុត ជាមួយក្រុមគ្រួសារយោធិនពលី ព្រោះការបាត់បង់នេះ គឺជាការបាត់បង់នាយទាហាន នាយទាហានរង និងពលទាហានឆ្នើម ដែលបានធ្វើពលិកម្មបូជាសាច់ស្រស់ឈាមស្រស់ ដើម្បីបុព្វហេតុជាតិមាតុភូមិជាទីស្នេហា ពិសេសរួមចំណែកយ៉ាងសំខាន់ក្នុងបុព្វហេតុការពារបូរណភាពទឹកដី កសាងសុខសន្តិភាព ស្ថិរភាពសង្គម និងរួមសុខទុក្ខជាមួយប្រជាជនកម្ពុជា រហូតដល់ថ្ងៃអវសាននៃជីវិត។ ឯកឧត្តម ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ក្នុងនាមកងយោធពលខេមរភូមិន្ទទាំងមូល បានឧទ្ទិសបួងសួងដល់ដួងវិញ្ញាណក្ខន្ធយោធិនពលីទាំង២០នាក់ សុំឆាប់បានចាប់កំណើតក្នុងសុគតិភពគ្រប់ៗជាតិកុំបីឃ្លៀងឃ្លាតឡើយ និងក៏សូមជូនពរយោធិន និងជនរងគ្រោះទាំងអស់ ឆាប់បានជាសះស្បើយពីមុខរបួស។ បន្ទាប់មកឯកឧត្តម ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ក៏បានប្រទានភ្លើងបូជាសពយោធិនទាំង២០រូបទៅតាមប្រពៃណី ព្រះពុទ្ធសាសនា និងតាមបែបបទនៃពិធិការកងទ័ព ៕
