ថ្ងៃទី២២ ខែមេសា ឆ្នាំ២០២៤ នាយឧត្តមសេនីយ៍ ភួង ស៊ីផាន រដ្ឋលេខាធិការក្រសួងការពារជាតិ បានអនុញ្ញាតឲ្យ ឧត្ដមសេនីយ៍ត្រី Djonny Indramawan,S.t M.Han នាយកផ្នែកគ្រប់គ្រង និងការអភិវឌ្ឍ នៃមហាវិទ្យាល័យបញ្ជាការសេនាធិការ នៃកងទ័ពឥណ្ឌូនេស៊ី ចូលជួបសម្តែងការគួរសម នៅទីស្តីការក្រសួងការពារជាតិ។
ក្នុងឱកាសនោះ នាយឧត្តមសេនីយ៍ ភួង ស៊ីផាន ក្នុងនាមនាយឧត្តមសេនីយ៍ ឧបនាយករដ្ឋមន្ត្រី រដ្ឋមន្ត្រី ក្រសួងការពារជាតិ បានសម្តែងការស្វាគមន៍ ចំពោះលោកនាយកផ្នែកគ្រប់គ្រង និងការអភិវឌ្ឍ នៃមហាវិទ្យាល័យបញ្ជាការសេនាធិការ នៃកងទ័ពឥណ្ឌូនេស៊ី និងសហការី ក្នុងការធ្វើដំណើរបំពេញការងារនៅលើទឹកដី នៃព្រះរាជាណាចក្រកម្ពុជា។ ឯកឧត្តម ភួង ស៊ីផាន បញ្ជាក់ថា៖ ទោះបីប្រទេសកម្ពុជា និងឥណ្ឌូនេស៊ី នៅឆ្ងាយពីគ្នាមែន តែប្រទេសទាំងពីរ បានរឹតចំណង និងមានទំនាក់ទំនងមិត្តភាព សាមគ្គីភាព និងមានកិច្ចសហប្រតិបត្តិការជាមួយគ្នា តាំងពីយូរលង់ណាស់មកហើយ។ នាយឧត្តមសេនីយ៍បានបន្តថា៖ រាជរដ្ឋាភិបាលកម្ពុជា ដែលដឹកនាំដោយ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក៏ដូចជាក្រសួងការពារជាតិកម្ពុជា បាននិងកំពុងយកចិត្តទុកដាក់ជាខ្លាំង លើការពង្រឹងពង្រីកទំនាក់ទំនងជាមួយបណ្ដាប្រទេសនៅលើសកលលោក ក្នុងតំបន់ ពិសេសអាស៊ាន ក្នុងការធ្វើឲ្យតំបន់អាស៊ានទាំងមូល មានសន្តិភាពគ្មានសង្គ្រាម គ្មានការគំរាមកំហែងណាមួយ ដែលនាំឲ្យប្រទេសដែលជាសមាជិកអាស៊ានធ្លាក់ចូលទៅក្នុងគ្រោះមហន្តរាយ នៃសង្គ្រាមវិនាសកម្ម សាជាថ្មីដូចពីអតីតកាល នៃប្រទេសកម្ពុជាបានឡើយ។ តាមរយៈនៃជំនួបនេះ ឯកឧត្ដម ភួង ស៊ីផាន បានគាំទ្រ និងស្នើតាមរយៈលោកនាយកផ្នែកគ្រប់គ្រង និងការអភិវឌ្ឍ នៃមហាវិទ្យាល័យបញ្ជាការសេនាធិការ នៃកងទ័ពឥណ្ឌូនេស៊ី បានបន្តធ្វើកិច្ចសហការយ៉ាងជិតស្និទ្ធជាមួយមហាវិទ្យាល័យបញ្ជាការសេនាធិការ នៃសាកលវិទ្យាល័យការពារជាតិកម្ពុជា ដើម្បីពង្រឹង និងពង្រីកកិច្ចសហការ នៅលើការបណ្ដុះបណ្ដាលធនធានមនុស្ស កងទ័ពទាំងពីរ ឲ្យកាន់តែប្រសើរឡើង ដើម្បីផលប្រយោជន៍រួមគ្នា នៃកងទ័ពទាំងពីរតទៅអនាគត។
ជាការឆ្លើយតប ឧត្តមសេនីយ៍ត្រី Djonny Indramawan,S.t M.Han នាយកផ្នែកគ្រប់គ្រង និងការអភិវឌ្ឍ នៃមហាវិទ្យាល័យបញ្ជាការសេនាធិការ នៃកងទ័ពឥណ្ឌូនេស៊ី បានសម្តែងនូវអំណរគុណចំពោះឯកឧត្តម រដ្ឋលេខាធិការក្រសួងការពារជាតិកម្ពុជា ដែលបានផ្តល់ពេលវេលាដ៏មមាញឹក អនុញ្ញាតឲ្យលោកចូលជួបសម្តែងការគួរសមនាពេលនេះ។ លោកឧត្តមសេនីយ៍ត្រី ជម្រាបជូនឯកឧត្តមរដ្ឋលេខាធិការ ក្រសួងការពារជាតិថា៖ លោកពិតជាមានមោទនភាពណាស់ ដែលបានមកបំពេញការងារនៅក្នុងប្រទេសកម្ពុជា។ លោកនាយកក៏បានបញ្ជាក់ថា៖ មហាវិទ្យាល័យបញ្ជាការសេនាធិការកងទ័ព នៃសាធារណរដ្ឋឥណ្ឌូនេស៊ី គឺជាមហាវិទ្យាល័យមួយ ដែលបាននិងកំពុងទទួលការបណ្ដុះបណ្ដាលសិក្ខាកាមនាយទាហាន ទាំងកងទ័ពជើងគោក ជើងទឹក និងកងទ័ពជើងអាកាស ក្នុងនោះក៏បានទទួលការបណ្ដុះបណ្ដាលផងដែរ កងទ័ពបណ្ដាប្រទេសជាមិត្ត ហើយក៏សង្ឃឹមថាថ្នាក់ដឹកនាំ នៃកងយោធពលខេមរភូមិន្ទ នឹងបន្តចាត់បញ្ជូនសិក្ខាកាមនាយទាហាន នៃកងយោធពលខេមរភូមិន្ទ ទៅសិក្សានៅក្នុងមហាវិទ្យាល័យនេះផងដែរ ដែលបច្ចុប្បន្ននេះមានសិក្ខាកាម នៃកងយោធពលខេមរភូមិន្ទចំនួនពីររូប បាននិងកំពុងសិក្សានៅក្នុងមហាវិទ្យាល័យនេះ។ លោកឧត្តមសេនីយ៍ត្រី ក៏បានសម្ដែងនូវការកោតសរសើរ និងវាយតម្លៃខ្ពស់ចំពោះប្រទេសកម្ពុជា ក្នុងការទទួលបាននូវសុខសន្តិភាព និងការកសាងអភិវឌ្ឍជាតិកម្ពុជានាពេលកន្លងមកនេះ ហើយសង្ឃឹមថាទំនាក់ទំនងមិត្តភាពដ៏ល្អប្រពៃ នៃការរឹតចំណងមិត្តភាព សាមគ្គីភាព និងកិច្ចសហប្រតិបត្តិការយ៉ាងជិតស្និទ្ធ ដែលមានតាំងពីយូរលង់ណាស់មកហើយ រវាងថ្នាក់ដឹកនាំប្រមុខរដ្ឋាភិបាល ប្រជាជន និងកងទ័ពទាំងពីរ ឥណ្ឌូនេស៊ី និងកម្ពុជា នឹងបន្តជារៀងរហូត ៕
