រដ្ឋមន្ត្រី នៃក្រសួងការពារជាតិ កម្ពុជា-ឡាវ និងវៀតណាម បានអញ្ជើញជំនួបប្រាស្រ័យមិត្តភាព នៅបង្គោលព្រំដែន តំបន់មរកត (កន្ទុយនាគ) នៃប្រទេសទាំងបី កម្ពុជា ឡាវ និងវៀតណាម នាព្រឹកថ្ងៃទី១៤ ខែធ្នូ ឆ្នាំ២០២៣។ ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ, ឯកឧត្តម នាយឧត្តមសេនីយ៍ ហ្វាប វ៉ាន់ហ្សាង រដ្ឋមន្ត្រីក្រសួងការពារប្រទេសវៀតណាម និងឯកឧត្តម នាយឧត្តមសេនីយ៍ ច័ន្ទសាម៉ន ចាន់យ៉ាឡាត (CHANSAMONE CHANYALATH) រដ្ឋមន្ត្រីក្រសួងការពារជាតិឡាវ ត្រូវបានការស្វាគមន៍ដោយមានកងកិត្តិយស កងត្រែទ័ព បែបពិធីការកងទ័ព រួមនិងកងកម្លាំងប្រដាប់អាវុធ នៃប្រទេសទាំងបី ព្រមនិងបងប្អូនប្រជាពលរដ្ឋជាច្រើននាក់ផងដែរ។
នេះគឺជាព្រឹត្តិការណ៍ថ្មី ជាប្រវត្តិសាស្ត្រ លើកទី១ របស់ប្រមុខការពារជាតិទាំងបី ដែលមិនត្រឹមតែមានអត្ថន័យខាងផ្នែកយោធា, ការពារជាតិប៉ុណ្ណោះទេ គឺជាព្រឹត្តិការណ៍មានអត្ថន័យនយោបាយ សំខាន់, រួមចំណែកក្នុងការរឹតចំណងទំនាក់ទំនង សាមគ្គីភាព, មិត្តភាព, និងកិច្ចសហការកាន់តែជិតស្និទ្ធ រវាងកងទ័ព ក៏ដូចជាកងកម្លាំងការពារព្រំដែន, អាជ្ញាធរមូលដ្ឋាន និងប្រជាជននៅតាមបណ្តោយ តំបន់ព្រំដែនរួមគ្នាទាំង៣ប្រទេស កម្ពុជា-វៀតណាម-ឡាវ លើកិច្ចរក្សាសន្តិភាព ស្ថិរភាព និងការអភិវឌ្ឍសេដ្ឋកិច្ចសង្គម ជីវភាពរបស់ប្រជាពលរដ្ឋផងដែរ។ ក្នុងឱកាសនោះ ឯកឧត្តម រដ្ឋមន្ត្រី ក្រសួងការពារជាតិនៃប្រទេសទាំងបី កម្ពុជា-ឡាវ និងវៀតណាម ក៏បានអញ្ជើញគោរពបង្គោលព្រំដែនអធិបតេយ្យភាព និងបានលាបថ្នាំលើបង្គោលព្រំដែន តាមទិសបែរកតាមសាមីប្រទេសរៀងៗខ្លួន។ បង្គោលព្រំដែននេះ ស្ថិតនៅក្នុងតំបន់ប្រសព្វទាំងបីប្រទេស គឺកម្ពុជា ខេត្តរតនគិរី ជាប់នឹងឡាវ ខេត្តអាតាពើ ខណៈជាប់នឹងវៀតណាម នៃខេត្តកុនទុំ។
ជាសក្ខីភាពរួមគ្នានេះ ក៏មានការរៀបចំល្បាតរួម ត្រួតពិនិត្យបង្គោលព្រំដែន ពីសំណាក់កងកម្លាំងការពារព្រំដែន ទាំងបីប្រទេស។ ជាមួយគ្នានោះដែរ ឯកឧត្ដម រដ្ឋមន្ត្រីក្រសួងការពារជាតិ ទាំងបី បានចូលរួមដាំដើមឈើជានិមិត្តរូបមិត្តភាព នៅក្នុងតំបន់នេះផងដែរ។ បន្ទាប់មកឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី ក្រសួងការពារជាតិ, ឯកឧត្តម ហ្វាប វ៉ាន់ហ្សាង រដ្ឋមន្ត្រីក្រសួងការពារប្រទេសវៀតណាម និងឯកឧត្តម ច័ន្ទសាម៉ន ចាន់យ៉ាឡាត (CHANSAMONE CHANYALATH) រដ្ឋមន្ត្រី ក្រសួងការពារជាតិឡាវ បានអញ្ជើញទស្សនាលំហាត់សមយុទ្ធសុខាភិបាលកងទ័ព ៣ប្រទេស នៅច្រកទ្វាអន្តរជាតិព្រំដែន ប៊ីអ៊ី ដែលមានចម្ងាយ ១០គីឡូម៉ែត្រ ពីបង្គោលព្រំដែនកន្ទុយនាគ។ លំហាត់សមយុទ្ធសុខាភិបាលកងទ័ពបីប្រទេស កម្ពុជា-ឡាវ-វៀណាម បានប្រព្រឹត្តទៅដោយផ្តោតលើប្រធានបទ សង្គ្រោះគ្រោះមហន្តរាយ។ នៅក្នុងនោះ ដោយមានសកម្មភាពសុខាភិបាលរបស់កងទ័ពទាំងបីប្រទេស លើការជួយសង្គ្រោះជនរងគ្រោះ ដែលទទួលរងគ្រោះដោយសារគ្រោះមហន្តរាយផ្សេងៗ តាមរយៈការដឹកជញ្ជូនដោយរថយន្តសង្គ្រោះ មានចំនួន៦គ្រឿង និងតាមឧទ្ធម្ភាគចក្រ ចំនួន២គ្រឿង នៃក្រុមការងារសុខាភិបាល ខ.ភ.ម មានចំនួន១៤នាក់, រួមសហការប្រកបដោយការទទួលខុសត្រូវខ្ពស់ ជាមួយក្រុមការងារសុខាភិបាលកងទ័ពប្រជាជនឡាវ ចំនួន១៥នាក់ និងក្រុមការងារ សុខាភិបាលកងទ័ពប្រជាជនវៀតណាម ចំនួន៨០នាក់។ ហើយបន្ទាប់មកឯកឧត្តម នាយឧត្តមសេនីយ៍ ទៀ សីហា, ឯកឧត្តម ច័ន្ទសាម៉ន ចាន់យ៉ាឡាត (CHANSAMONE CHANYALATH) និងឯកឧត្តម ហ្វាប វ៉ាន់ហ្សាង បានអញ្ជើញជាអធិបតីភាពក្នុងពិធីកាត់ខ្សែបូរ បើកសម្ពោធដាក់ឲ្យប្រើប្រាស់ជាផ្លូវការនូវ សំណង់អគារវប្បធម៌មិត្តភាពព្រំដែន កម្ពុជា ឡាវ វៀតណាម នៅភូមិតាដា ស្រុកង៉ក់ហូយ ខេត្តកុនទុំ ប្រទេសវៀតណាមជាបន្តទៀត។ អគារវប្បធម៌មិត្តភាពព្រំដែន កម្ពុជា ឡាវ វៀតណាម ត្រូវបានក្រសួងការពារប្រទេសវៀតណាម បានធ្វើការសាងសង់ឡើង និងជាសំណង់អគារល្អជាងគេនៅក្នុងខេត្តកុនទុំ មានអត្ថប្រយោជន៍ជាច្រើន រួមចំណែកលើកកម្ពស់គុណភាព ជំនួបប្រាស្រ័យមិត្តភាពតទៅបណ្តាឆ្នាំខាងមុខទៀត លើផ្នែកវប្បធម៌ របស់ប្រជាពលរដ្ឋ និងសម្រាប់ជំនួបប្រាស្រ័យមិត្តភាពរបស់អាជ្ញាធរមូលដ្ឋាន និងប្រជាជន នៅជាប់ព្រំដែន នៃប្រទេសទាំងបី កម្ពុជា វៀតណាម និងឡាវ។
តមកឯកឧត្តម រដ្ឋមន្ត្រីក្រសួងការពារជាតិទាំង ៣ កម្ពុជា វៀតណាម ឡាវ បានអញ្ជើញសួរសុខទុក្ខ និងចែកអំណោយនៅសាលាបឋមសិក្សា បេ វ៉ាន់ដាន។ យោងតាមរបាយការណ៍របស់លោកគ្រូ ង្វៀន វ៉ាន់ដាយ នាយកសាលាបឋមសិក្សា បេ វ៉ាន់ដាន បានដឹងថា សាលាបឋមសិក្សា បេ វ៉ាន់ដាន បានបង្កើតឡើង នៅក្នុងអំឡុងឆ្នាំ២០០៩។ ក្រោយរយៈពេល១៤ឆ្នាំ នៃការកសាង និងអភិវឌ្ឍន៍ សម្រាប់ឆ្នាំ២០១៥ សាលាត្រូវបានទទួលស្គាល់ជាសាលារៀនជាប់លំដាប់ថ្នាក់ជាតិកម្រិតទី១ សម្រាប់ ឆ្នាំ២០២២ និងបានវាយតម្លៃគុណភាពអប់រំនាំមុខរបស់ស្រុកង៉ក់ហូយ។ លោក សន្យាថា នឹងខិតខំថែរក្សានូវបណ្តាសមិទ្ធផលដែលទទួលបានកន្លងមក និងបន្តលើកកម្ពស់គុណភាពជាច្រើនបែបក្នុងការអប់រំ ផ្សព្វផ្សាយអប់រំដល់សិស្សានុសិស្ស និងពង្រឹងចំណងទំនាក់ទំនងសាមគ្គីភាព មិត្តភាពដ៏ល្អ រវាងវៀតណាម កម្ពុជា ឡាវតទៅមុខទៀត។
នៅក្នុងថ្ងៃទី១៤ ខែធ្នូដដែលនេះដែរ ឯកឧត្តម នាយឧត្តមសេនីយ៍ ទៀ សីហា រដ្ឋមន្ត្រីក្រសួងការពារវៀតណាម និងក្រសួងការពារជាតិឡាវ បានបន្តដំណើរ មកកាន់ទីរួមខេត្តកុនទុំ(ចម្ងាយ៨០km) ពីបង្គោលព្រំដែន តំបន់មរកត (កន្ទុយនាគ) ចូលរួមក្នុងកិច្ចប្រជុំប្រចាំឆ្នាំ រវាងរដ្ឋមន្ត្រីក្រសួងការពារជាតិ កម្ពុជា វៀតណាម ឡាវ នៅសណ្ឋាគារឥណ្ឌូឆាយណា។ នៅក្នុងឳកាសនោះ ឯកឧត្តម ទៀ សីហា បានថ្លែងថា៖ ជំនួបប្រាស្រ័យមិត្តភាពការពារជាតិប្រទេសទាំងបីនាពេលនេះ គឺជាឱកាសសម្រាប់យើងទាំងអស់គ្នាធ្វើការវាយតម្លៃចំពោះសកម្មភាព និងលទ្ធផលការងារសម្រេចបាននាពេលកន្លងមក និងបញ្ជាក់សារជាថ្មីអំពីការប្ដេជ្ញាចិត្តឥតងាករេ ក្នុងការពង្រឹងទំនាក់ទំនងមិត្តភាពល្អប្រសើរជាប្រពៃណី ជាអ្នកជិតខាងល្អ និងផ្តល់ផលប្រយោជន៍ទៅវិញទៅមករវាងប្រទេស និងប្រជាជនយើងទាំងអស់គ្នា។ លើសពីនេះ ការរពង្រឹងកិច្ចសហប្រតិបត្តិការប្រទេសទាំងបី មិនត្រឹមតែបង្ហាញច្បាស់ពីសារៈសំខាន់យុទ្ធសាស្ត្រ នៃកិច្ចសហប្រតិបត្តិការវិស័យយោធាក្នុងតំបន់ប៉ុណ្ណោះទេ ប៉ុន្តែថែមទាំងរួមចំណែកដល់ការតភ្ជាប់អាស៊ាន និងការពង្រឹងសហគមន៍អាស៊ានផងដែរ ពិសេសការកាត់បន្ថយគម្លាតអភិវឌ្ឍក្នុងតំបន់ និងការលើកកម្ពស់សុខមាលភាព និងជីវភាពរស់នៅរបស់ប្រជាជនយើង។ ក្នុងនាមក្រសួងការពារជាតិ នៃព្រះរាជាណាចក្រកម្ពុជា ឯកឧត្តម ទៀ សីហា បានសម្តែងការកោតសរសើរ ចំពោះលទ្ធផលកិច្ចសហប្រតិបត្តិការ ដែលសម្រេចបានជាផ្លែផ្កានាពេលកន្លងមក តាមរយៈការទំនាក់ទំនងដ៏ល្អប្រសើរ រវាងកងទ័ពប្រទេសទាំងបី បានរីកចម្រើនលូតលាស់កាន់តែរឹងមាំលើគ្រប់វិស័យ និងគ្រប់កម្រិត បើទោះបីជាមានបញ្ហាប្រឈមជាច្រើនដែលកើតមានឡើងនៅក្នុងតំបន់ និងពិភពលោកយ៉ាងណាក្តី។ ក្រសួងការពារជាតិប្រទេសទាំងបី បានពង្រឹងពង្រីកកិច្ចសហប្រតិបត្តិការវិស័យការពារជាតិ តាមរយៈលើកកម្ពស់យន្ត ការដែលមានស្រាប់របស់ក្រសួងការពារជាតិបានកាន់តែស៊ីជម្រៅ និងគ្រប់ជ្រុងជ្រោយ ដោយឈរលើមូលដ្ឋាន គោរពគ្នា និងជឿទុកចិត្តគ្នាទៅវិញទៅមក “ភាពជាអ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយ និងស្ថិរភាពយូរអង្វែង” ដែលនាំមកនូវផលប្រយោជន៍ជាច្រើនសម្រាប់កងទ័ព និងប្រជាជន។
កងទ័ពប្រទេសទាំងបីបានលើកកម្ពស់កិច្ចសហប្រតិបត្តិការ វិស័យការពារជាតិទាំងនយោបាយ សន្តិសុខ ទំនាក់ទំនងការទូតយោធាកាន់តែប្រសើរឡើង ដែលជាមូលដ្ឋានគ្រឹះសម្រាប់នាំមកការអភិវឌ្ឍលើគ្រប់វិស័យ, រក្សាបានសន្តិភាព ស្ថិរភាព និងវិបុលភាពនៅតាមតំបន់ព្រំដែន ប្រែក្លាយជាតំបន់ព្រំដែនសន្តិភាពយូរអង្វែង និងការអភិវឌ្ឍ។ ជាមួយគ្នានេះ ឯកឧត្តម ក៏បានវាយតម្លៃខ្ពស់ ចំពោះសមិទ្ធផលនានា ដែលក្រសួងការពារជាតិប្រទេសទាំងបីសម្រេចបាន ក្នុងឆ្នាំកន្លងទៅ តាមរយៈការអនុវត្តការងារដ៏មានប្រសិទ្ធភាព តាមស្មារតីជំនួបកំពូលរបស់ថ្នាក់ដឹកនាំប្រទេសទាំងបីលើវិស័យការពារជាតិ, តាមយន្តការកិច្ចសហប្រតិបត្តិការ ដែលមានស្រាប់ ដូចជាការឃោសនាអប់រំប្រជាជន កងទ័ព នាយទាហានបន្តវេន ប្រវត្តិសាស្ត្រយោធា, ការរក្សាទំនាក់ទំនងសាមគ្គីភាព មិត្តភាព ការផ្លាស់ប្តូរទស្សនកិច្ចទៅវិញទៅមក ការចែករំលែកព័ត៌មាន ការគ្រប់គ្រងការពារព្រំដែន ការហ្វឹកហាត់រួមគ្នា និងការប្រយុទ្ធប្រឆាំងនឹងឧក្រិដ្ឋកម្មពាក់ព័ន្ធគ្រឿងញៀន និងឧក្រិដ្ឋកម្មឆ្លងដែនដទៃទៀត ព្រមទាំងការជួយគ្នាទៅវិញទៅមក លើវេទិកាពហុភាគីដឹកនាំដោយអាស៊ាន។ ក្នុងពិធីជំនួបប្រាស្រ័យមិត្តភាពការពារជាតិ រដ្ឋមន្ត្រី០៣ប្រទេស ក៏មានការ ចុះហត្ថលេខា លើខ្លឹមសារឯកសារ នៃកិច្ចសហប្រតិបត្តិការ រវាងក្រសួងការពារជាតិទាំងបី កម្ពុជា វៀតណាម ឡាវផងដែរ ៕
