អគ្គនាយកដ្ឋាននយោបាយ និងកិច្ចការបរទេស ក្រសួងការពារជាតិ ដែលមាននាយកដ្ឋានកិច្ចការអាស៊ានជាសេនាធិការ និងមជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាពបោសសម្អាតមីន និងកាកសំណល់សង្គ្រាម បានរៀបចំសិក្ខាសាលាលើកទី២ ស្ដីពីការលើកកម្ពស់យន្តការគាំទ្រសម្រាប់ស្ត្រីរក្សាសន្តិភាពអាស៊ាន ដែលបានប្រព្រឹត្តទៅចាប់ពីថ្ងៃទី២២ ដល់ថ្ងៃទី២៤ ខែមេសា ឆ្នាំ២០២៤ នៅក្រុងព្រះសីហនុ ខេត្តព្រះសីហនុ ដោយមានការចូលរួមពីតំណាងមជ្ឈមណ្ឌលរក្សាសន្តិភាព និងស្ថាប័នការពារជាតិ នៃបណ្ដាប្រទេសសមាជិកអាស៊ាន តំណាងលេខាធិការដ្ឋានអាស៊ាន និងប្រទេសទីម័រខាងកើតចូលរួមនៅក្នុងនាមជាប្រទេសសង្កេតការណ៍។
ពិធីបើកសិក្ខាសាលាប្រព្រឹត្តទៅក្រោមអធិបតីភាព ឯកឧត្តម នាយឧត្តមសេនីយ៍ ណឹម សុវត្ថិ អគ្គនាយក អគ្គនាយកដ្ឋាននយោបាយ និងកិច្ចការបរទេស និងជាប្រធានឧត្តមមន្ត្រីការពារជាតិអាស៊ានADSOM របស់កម្ពុជា ជាតំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ។
ថ្លែងក្នុងពិធីបើក ឯកឧត្តម នាយឧត្តមសេនីយ៍ ណឹម សុវត្ថិ បានសម្តែងការស្វាគមន៍ចំពោះប្រតិភូ នៃបណ្ដាប្រទេសអាស៊ាន ទីម័រខាងកើត និងតំណាងលេខាធិការដ្ឋានអាស៊ាន ដែលបានចូលរួមសិក្ខាសាលា ដើម្បីអនុវត្តគំនិតផ្តួចផ្តើម ស្តីពីការលើកកម្ពស់យន្តការគាំទ្រសម្រាប់ស្ត្រីរក្សាសន្តិភាពអាស៊ាន ដែលបានអនុម័តដោយកិច្ចប្រជុំរដ្ឋមន្ត្រីការពារជាតិអាស៊ានលើកទី១៦ កាលពីឆ្នាំ២០២២ ឲ្យទៅជាកិច្ចសហប្រតិបត្តិការជាក់ស្ដែង ក្នុងចំណោមប្រទេសជាសមាជិកអាស៊ាន។ ទន្ទឹមនឹងពិធីបុណ្យចូលឆ្នាំថ្មីប្រពៃណីជាតិ ដែលទើបបានបញ្ចប់កាលពីពេលថ្មីៗនេះ ឯកឧត្តម នាយឧត្តមសេនីយ៍ ក៏បានបង្ហាញអំពីភាពរីកចម្រើន ការអភិវឌ្ឍ និងសិទ្ធសេរីភាពពេញលេញរបស់ប្រជាជនកម្ពុជា ក្នុងការរៀបចំពិធីអបអរសាទរឆ្នាំថ្មី ក៏ដូចជាពិធីសាសនានានា ក្នុងសម័យកាលបច្ចុប្បន្ន ដែលនេះគឺពិតជាទទួលបានដោយសារការលះបង់ និងដឹកនាំរបស់ សម្ដេចតេជោ ហ៊ុន សែន និងគោលនយោបាយឈ្នះឈ្នះ ដ៏មានគុណតម្លៃរបស់សម្ដេច ទើបធ្វើឲ្យប្រជាជនកម្ពុជាទទួលបាននូវសុខសន្តិភាព និងសិទ្ធសេរីភាពក្នុងពេលបច្ចុប្បន្ន។ ឯកឧត្តមក៏បានជម្រាបអង្គសិក្ខាសាលាអំពីភាពជូរចត់របស់កម្ពុជា ដែលធ្លាប់បានឆ្លងកាត់ក្នុងសម័យកាលខ្មែរក្រហម ពីឆ្នាំ១៩៧៥ ដល់ឆ្នាំ១៩៧៩ ដែលពេលនោះពិធីបុណ្យសាសនាក៏ដូចជាការអបអរសាទរពិធីបុណ្យប្រពៃណីជាតិនានា ត្រូវបានហាមឃាត់ ហើយសិទ្ធសេរីភាពរបស់ប្រជាជនកម្ពុជាត្រូវបានបំបិទទាំងស្រុង។ ក្នុងនាមជាប្រទេសដែលឆ្លងកាត់សង្គ្រាម និងជម្លោះផ្ទៃក្នុងរ៉ាំរ៉ៃ កម្ពុជាយល់ច្បាស់អំពីទុក្ខលំបាក និងការឈឺចាប់ដែលបណ្ដាលមកពីសង្គ្រាម ហើយនេះគឺជាហេតុផលដែលរាជរដ្ឋាភិបាលកម្ពុជា សម្រេចចូលរួមចំណែកកងទ័ពក្នុងបេសកកម្មរក្សាសន្តិភាព របស់អង្គការសហប្រជាជាតិ ចាប់តាំងពីឆ្នាំ២០០៦។ តាមរយៈបទពិសោធ និងមេរៀនដែលទទួលបាន កម្ពុជាដឹងច្បាស់អំពីតួនាទីសំខាន់ដែលស្ត្រីបានរួមចំណែកក្នុងប្រតិបត្តិការរក្សាសន្តិភាព ក្នុងនោះចាប់តាំងពីឆ្នាំ២០០៦មក កងទ័ពមួកខៀវកម្ពុជាជាង៩៥០០នាក់ បានចូលរួមចំណែក ក្នុងការរក្សាសន្តិភាពក្រោមឆត្ររបស់អង្គការសហប្រជាជាតិ ក្នុងប្រទេសចំនួន៩ បច្ចុប្បន្ននេះកងទ័ពកម្ពុជា មានចំនួន៦៣៩នាក់ ក្នុងនោះស្ត្រី១២៤នាក់ កំពុងបម្រើការនៅប្រទេសស៊ូដង់ខាងត្បូង លីបង់ សាធារណរដ្ឋអាហ្វ្រិកកណ្តាល និងប្រទេសម៉ាលី។ ចំពោះការចូលរួមចំណែករបស់កងរក្សាសន្តិភាពជាស្ត្រី បច្ចុប្បន្នកម្ពុជាជាប់ចំណាត់ថ្នាក់លេខ១ក្នុងអាស៊ាន និងចំណាត់ថ្នាក់លេខ១១ ក្នុងចំណោមបណ្ដាប្រទេសដែលចូលរួមប្រតិបត្តិការរក្សាសន្តិភាពទាំងអស់។
ក្នុងឱកាសនោះផងដែរ ឯកឧត្តម នាយឧត្តមសេនីយ៍ ក៏បានគូសបញ្ជាក់ថា៖ សហគមន៍អន្តរជាតិបានកំពុងខិតខំជំរុញការចូលរួមរបស់ស្ត្រី ក្នុងបេសកកម្មរក្សាសន្តិភាពអង្គការសហប្រជាជាតិ ប៉ុន្តែការចូលរួមរបស់ស្ត្រី ក្នុងដំណើរការសន្តិភាព នៅមានកម្រិតទាបនៅឡើយ ជាមួយគ្នានេះដោយសារការទទួលស្គាល់ពីសារៈសំខាន់ នៃការចូលរួមរបស់ស្ត្រី ក្នុងគ្រប់ដំណាក់កាល នៃការរក្សាសន្តិភាព និងដំណាក់កាលកសាងសន្តិភាពក្រោយជម្លោះ ទើបរដ្ឋមន្ត្រីការពារជាតិអាស៊ាន បានអនុម័តឯកសារទស្សនទាន ស្តីអំពីការលើកកម្ពស់យន្តការគាំទ្រសម្រាប់ស្ត្រីរក្សាសន្តិភាពអាស៊ាន នៅក្នុងកិច្ចប្រជុំរដ្ឋមន្ត្រីការពារជាតិអាស៊ាន លើកទី១៦ នាឆ្នាំ២០២២។ បន្ទាប់មកនៅឆ្នាំ២០២៣ កិច្ចប្រជុំADMM-បូក ក៏បានអនុម័តសេចក្ដីថ្លែងការណ៍រួម ស្តីអំពីស្ត្រីសន្តិភាព និងសន្តិសុខ ដោយទទួលស្គាល់ពីតម្រូវការក្នុងការបន្តលើកកម្ពស់ ការចូលរួម ការដឹកនាំប្រកបដោយភាពពេញលេញ និងមានអត្ថន័យរបស់ស្ត្រី នៅគ្រប់ដំណាក់កាល និងគ្រប់កម្រិត នៃដំណើរការសន្តិភាព។ ជាចុងក្រោយ ឯកឧត្តម នាយឧត្តមសេនីយ៍ ក៏បានសង្កត់ធ្ងន់អំពីគោលបំណង នៃសិក្ខាសាលា ដែលនឹងពិភាក្សាបញ្ចប់លក្ខខណ្ឌប្រតិបត្តិ ដែលជាគោលការណ៍ណែនាំសកម្មភាព កិច្ចសហប្រតិបត្តិការរួមគ្នា ក្នុងចំណោមរដ្ឋសមាជិកអាស៊ាន ស្ដីអំពីគំនិតផ្ដួចផ្ដើមនេះ ក៏ដូចជាដើម្បីចែករំលែកនូវបទពិសោធ ក្នុងចំណោមបណ្ដាប្រទេសអ្នកចូលរួមផងដែរ។
សូមរំឭកជម្រាបជូនថា៖ គំនិតផ្តួចផ្តើមស្តីពីការលើកកម្ពស់យន្តការគាំទ្រសម្រាប់ស្ត្រីរក្សាសន្តិភាពអាស៊ាន ជាគំនិតផ្ដួចផ្ដើមរបស់កម្ពុជា ដែលត្រូវឯកភាពនឹងអនុម័តនៅឆ្នាំ២០២២ ដោយរដ្ឋមន្ត្រីការពារជាតិអាស៊ាន បង្កើតឡើងក្នុងគោលបំណងប្រមូលផ្ដុំចងជាបណ្ដាញមួយក្នុងចំណោមស្ត្រីជាអ្នករក្សាសន្តិភាពអាស៊ានទាំងឡាយ ដើម្បីរួមគ្នាចែករំលែកនូវបទពិសោធការងារ បញ្ហាប្រឈម ដែលជួបប្រទះក្នុងបេសកកម្ម ក៏ដូចជាចែករំលែកយុទ្ធសាស្ត្រនានា សម្រាប់ដោះស្រាយបញ្ហាប្រឈមតាមរយៈសកម្មភាព កិច្ចប្រជុំ សិក្ខាសាលា ឬកម្មវិធីហ្វឹកហ្វឺន និងបណ្ដុះបណ្ដាលរួមគ្នាជាដើម។ នៅក្នុងដំណើរការសិក្ខាសាលាបណ្តាប្រទេសចូលរួម បានធ្វើបទបង្ហាញពិភាក្សាចែករំលែកនូវបទពិសោធទៅវិញទៅមក និងបានពិភាក្សាយ៉ាងស៊ីជម្រៅ លើការបង្កើតបណ្ដាញអ្នករក្សាសន្តិភាពជាស្ត្រី ក្នុងចំណោមបណ្ដាប្រទេសអាស៊ាន ក៏ដូចជាពិគ្រោះយោបល់បញ្ចប់សេចក្ដីព្រាងលក្ខខណ្ឌប្រតិបត្តិTOR សម្រាប់អនុវត្តឯកសារទស្សនទាននេះផងដែរ ៕
