ឯកឧត្ដម នាយឧត្ដមសេនីយ៍ ភួង ស៊ីផាន រដ្ឋលេខាធិការ ក្រសួងការពារជាតិ បានអនុញ្ញាតឲ្យ ឯកឧត្តម ស៊ូជីរ៉ូ សៀម (SUJIRO SEAM) ឯកអគ្គរដ្ឋទូតសហភាពអឺរ៉ុប ប្រចាំអាស៊ាន ចូលជួបសម្តែងការគួរសម និងពិភាក្សាការងារ នៅទីស្តីការក្រសួងការពារជាតិ កាលពីព្រឹកថ្ងៃទី០៩ ខែមេសា ឆ្នាំ២០២៤។
ឯកឧត្តម ឯកឧត្តម ស៊ូជីរ៉ូ សៀម (SUJIRO SEAM) បញ្ជាក់ថា៖ វិស័យការពារជាតិ និងសន្តិសុខ គឺជាប្រធានបទមួយ ដែលឯកឧត្តម មានការយកចិត្តទុកដាក់ជាខ្លាំងទៅលើវិស័យទាំងនេះ ព្រោះថាបន្ទាប់ពីរូបលោក និងក្រុមគ្រួសារបានចាកចេញពីប្រទេសកម្ពុជា ហើយក្លាយទៅជាពលរដ្ឋរបស់ប្រទេសបារាំង រូបលោកក៏ធ្លាប់បានឆ្លងកាត់ជីវិតជាទាហានកាតព្វកិច្ចរបស់បារាំង ដែលមានឋានន្តរស័ក្តិជាអនុសេនីយ៍ត្រី។ ឯកឧត្តម ស៊ូជីរ៉ូ សៀម (SUJIRO SEAM) បានលើកឡើងថា៖ នៅពេលនិយាយដល់បញ្ហាអាស៊ាន សហភាពអឺរ៉ុបមិនមែនជាប្រទេសមួយដែលមានអំណាចផ្នែករឹងច្រើននោះទេ ប៉ុន្តែវាជាអំណាចផ្នែកទន់មួយ ក្នុងការពង្រឹងទំនាក់ទំនង រវាងអាស៊ាន និងសហភាពអឺរ៉ុប។
ជាការឆ្លើយតប ក្នុងនាមឯកឧត្តម ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ឯកឧត្ដម ភួង ស៊ីផាន បានសម្ដែងនៅការស្វាគមន៍ចំពោះឯកឧត្តម ឯកអគ្គរដ្ឋទូតសហភាពអឺរ៉ុប និងសហការីក្នុងដំណើរបំពេញការងារនៅកម្ពុជា។ ឯកឧត្តមបញ្ជាក់ថា៖ រាជរដ្ឋាភិបាលកម្ពុជា ដែលដឹកនាំដោយ សម្ដេចធិបតី ហ៊ុន ម៉ាណែត បាននិងកំពុងយកចិត្តទុកដាក់ជាខ្លាំង លើការពង្រឹងពង្រីកទំនាក់ទំនងជាមួយបណ្ដាប្រទេសនៅលើសកលលោក ក្នុងតំបន់ ពិសេសអាស៊ាន ក្នុងការធ្វើឲ្យតំបន់អាស៊ានទាំងមូលមានសន្តិភាព គ្មានសង្គ្រាម គ្មានការគំរាមកំហែងណាមួយពីអាវុធប្រល័យលោក អាវុធជីវសាស្ត្រ វិទ្យុសកម្ម និងនុយក្លេអ៊ែរ ដែលនាំឲ្យប្រទេសដែលជាសមាជិកអាស៊ានធ្លាក់ចូលទៅក្នុងគ្រោះមហន្តរាយ នៃសង្គ្រាមសាជាថ្មី ដូចជាប្រទេសកម្ពុជាពីអតីតកាលបានឡើយ។ តាមរយៈនៃជំនួបនេះ ឯកឧត្តម ផួង ស៊ីផាន បានស្នើតាមរយៈឯកឧត្តម ឯកអគ្គរដ្ឋទូតសហភាពអឺរ៉ុប បន្តជួយគ្រប់ផ្នែកទន់ និងផ្នែករឹង ដល់មជ្ឈមណ្ឌលហ្វឹកហ្វឺនកងរក្សាសន្តិភាពបោសសម្អាតមីន និងកាកសំណល់សង្គ្រាមបន្តទៀត ដើម្បីកម្ពុជាមានគ្រប់លទ្ធភាពបញ្ជូនកម្លាំងរបស់ខ្លួនចូលរួមថែរក្សាសន្តិភាព ជាមួយអង្គការសហប្រជាជាតិ ជួយដល់បណ្ដាប្រទេសដែលជួបវិបត្តិនៃសង្គ្រាម ៕
