សិក្ខាសាលាបូកសរុបការងារយេនឌ័រទូទាំងខ.ភ.ម ២០២២ ទិសដៅ២០២៣
លោកជំទាវ ដាំ ដារីនី រដ្ឋលេខាធិការ និងជាប្រធានក្រុមការងារយេនឌ័រក្រសួងការពារជាតិ បាន អញ្ជើញ ជាអធិបតីក្នុងពិធីសិក្ខាសាលាបូកសរុបការងារយេនឌ័រក្នុងខ.ភ.ម ២០២២ និងលើកទិសដៅ អនុវត្តការងារឆ្នាំ ២០២៣ នៅសាលប្រជុំក្រសួងការពារជាតិនាព្រឹកថ្ងៃទី២២ ខែធ្នូ ឆ្នាំ២០២២។
ក្នុងរបាយការណ៏ការងារយេនឌ័រទូទាំងខ.ភ.ម ២០២២ បានឲ្យដឹងថា៖ ដោយអនុវត្តទៅតាម ផែនការ យុទ្ធសាស្រ្ត បញ្រ្ជាបយេនឌ័រ របស់ក្រសួងការពារជាតិ ក្នុងឆ្នាំ២០២២កន្លងមកក្រុម ការងារយេនឌ័រនៅទូទាំង ខ.ភ.ម ទាំងអស់ បានខិតខំអនុវត្តការងារយ៉ាងសកម្ម ដោយសំរេចបានស្នាដៃ ធំៗ ជាច្រើននៅតាម បណ្តាកងឯកភាពរបស់ខ្លួន។ ជារួមក្រុមការងារបានរៀបចំបង្កើតឲ្យមានបណ្ដាញ ក្រុមការងារយេនឌ័រ នៅតាមបណ្ដា កងឯកភាពនីមួយៗ និងនៅតាមបណ្ដាយោធភូមិភាគទូទាំង ខ.ភ.ម។ ខិតខំបង្កើន ការយល់ដឹងអំពី ទស្សនៈ យេនឌ័រ ដល់នាយទាហាន, នាយទាហានរង និងពលទាហានទាំង ២ ភេទ។ បង្កើនបរិមាណ និងគុណភាព ដល់នាយទាហាន, នាយទាហានរង និងពលទាហានដែលជានារី។ ក្រុមការងារក៏បានផ្ដល់ឱកាស និង ជំរុញលើក ទឹកចិត្តដល់នាយទាហានជានារីក្នុងការទទួលបានតួនាទីធ្វើសេចក្ដីសំរេចនានាលើការងារកងទ័ព។ បានបង្កើនការយកចិត្តទុកដាក់ដល់គ្រួសារ យោធិន ពលីពិការ និងយោធិនមុនចូលនិវត្តន៏, បង្កើនការយក ចិត្តទុក ដាក់ដល់គ្រូ និងកីឡាការិនីក្នុងខ.ភ.ម ហើយនិងត្រួតពិនិត្យវាយតំលៃការអនុវត្តន៏ផែនការ យុទ្ធសាស្ត្រ បញ្ជ្រាបយេនឌ័រ។
ក្នុងឱកាសនោះលោកជំទាវ ដាំ ដារីនី បានថ្លែងការកោតសរសើរចំពោះបងប្អូនជានារីនៅក្នុង កងយោធពលខេមរភូមិន្ទទាំងអស់ ដែលខិតខំយកអស់កំលាំងកាយចិត្តចូលរួមចំណែកក្នុងការធ្វើឲ្យដំណើរការការងារយេនឌ័រ អនុវត្តទទួលបានជោគជ័យក្នុងឆ្នាំ២០២២ នេះ។ លោកជំទាវបានថ្លែងថា៖ រាជរដ្ឋាភិបាលបានដាក់ ចេញនូវគោលនយោបាយ និងយន្តការទាំងឡាយ គឺសំដៅជំរុញការយកចិត្តទុកដាក់ លើកស្ទួយតំលៃស្ត្រីខ្មែរក្នុងសង្គម ជំរុញលើការអភិវឌ្ឍលើគ្រប់ផ្នែក លប់បំបាត់រាល់ទស្សនៈឥរិយាបថរើសអើងចំពោះស្ត្រី។ រាជរដ្ឋាភិបាល ក៏បានដាក់ ចេញនូវច្បាប់គោលនយោបាយ និងយន្តការជាច្រើន ដើម្បីសមភាពយេនឌ័រ ដោយបានទទួល ស្គាល់ថា “ស្ត្រីជា ឆ្អឹងខ្នង នៃសេដ្ឋកិច្ច និងសង្គមជាតិ” និងបានចាត់ទុកស្រ្តីជាកម្លាំងដែលមិនអាចខ្វះបានក្នុងការអភិវឌ្ឍប្រទេសជាតិផងដែរ។ គោលនយោបាយ និងយន្តការទាំងឡាយដែលរាជរដ្ឋាភិបាលបានដាក់ចេញគឺសំដៅជំរុញយកចិត្តទុកដាក់ការលើកស្ទួយតម្លៃស្ត្រីខ្មែរក្នុង សង្គមជំរុញលើការអភិវឌ្ឍលើគ្រប់ផ្នែក លុបបំបាត់រាល់ទស្សនៈឥរិយាបថរើសអើង ចំពោះស្រ្តី សំដៅបង្កើនការចូលរួមដ៏សកម្មរបស់ស្ត្រី ក្នុងការអភិវឌ្ឍប្រទេសជាតិតាមរយៈការបន្តលើកកម្ពស់សមភាពយេនឌ័រ និងសិទ្ធិរបស់ស្ត្រី។ បច្ចុប្បន្ននេះនៅប្រទេសកម្ពុជា ការចូលរួមរបស់ស្រ្តីក្នុងវិស័យការពារជាតិ មានការកើនឡើង ជាពិសេសនោះ គឺការចូលរួមរបស់ស្រ្តីក្នុងកងកម្លាំងរក្សាសន្តិភាព បោសសំអាតមីន និងកាកសំណាល់សង្រ្គាម ក្រោមឆ័ត្រអង្កការសហប្រជាជាតិ ជាកិត្តយសរបស់ជាតិ ខ្មែរទាំងមូលផងដែរ។
លោកជំទាវរដ្ឋលេខាធិការក៏បានដាក់ចេញនូវទិសដៅអនុវត្តការងារឆ្នាំ២០២៣ ដូចខាងក្រោម៖
- ដាក់ចេញនូវផែនការយុទ្ធសាស្ត្របញ្រ្ជាបយេនឌ័រ ដំណាក់កាលទី២
- ជម្រុញ លើកម្ពស់សមត្ថភាព និងការចូលរួមរបស់យោធិននារី ក្នុងការអនុវត្តការងារ តាមជំនាញ
- បង្កើនព័ត៌មានបណ្តាញនារីតាមបណ្តាអង្គភាព ទូទាំងកងយោធពលខេមរភូមិន្ទ
- បង្កើនការយកចិត្តទុកដាក់ដល់យោធិននារីមានផ្ទៃពោះ និងសម្រាលមាតុភាព
- ជំរុញ និងបង្កើនការចូលរួមរបស់ស្រ្តីក្នុងការអនុវត្តការងារអន្តរជាតិ
ជាទីបញ្ចប់លោកជំទាវ ដាំ ដារីនី ក៏បានផ្តាំផ្ញើជូនដល់បងប្អូននារី ក្នុងកងយោធពលខេមរភូមិន្ទ ត្រូវបន្ត ពង្រឹងពង្រីកសមត្ថភាព សាមគ្គីភាព ដើម្បីឆ្លើយតបនឹងតម្រូវការការងារបច្ចុប្បន្ន ដើម្បីទទួលបានភាព ជោគជ័យក្នុងកាតព្វកិច្ចការពារជាតិ និងសន្តិភាពទាំងអស់គ្នា ៕
