នារសៀលថ្ងៃទី២៤ ខែមករា ឆ្នាំ២០២៤ នៅក្រសួងការពារជាតិ គណៈប្រតិភូកងទ័ពអាកាសភូមិន្ទថៃ ដឹកនាំដោយ ឯកឧត្តម នាយឧត្តមសេនីយ៍ ផុនផាកឌី ផាត់តាណាគុល (PUNPAKDEE PATTANAKUL) មេបញ្ជាការកងទ័ពអាកាសភូមិន្ទថៃ បានអញ្ជើញចូលជួបសម្តែងការគួរសម ជាមួយនាយឧត្តមសេនីយ៍ នាង ផាត រដ្ឋលេខាធិការប្រចាំការ ក្រសួងការពារជាតិ ក្នុងឱកាសដែលប្រតិភូបានអញ្ជើញមកបំពេញទស្សនកិច្ច ជាផ្លូវការ នៅលើទឹកដី នៃព្រះរាជាណាចក្រកម្ពុជា។
នាយឧត្តមសេនីយ៍ នាង ផាត បានសម្ដែងនូវក្ដីរីករាយចំពោះ ដំណើរទស្សនកិច្ចរបស់គណៈប្រតិភូ កងទ័ពអាកាសភូមិន្ទថៃ ដែលបានមកកាន់កម្ពុជានាពេលនេះ ហើយបានបង្ហាញនូវវត្តមាន របស់មេបញ្ជាការកងទ័ពអាកាសភូមិន្ទថៃ ក្នុងអាណត្តិថ្មីផងដែរ។ ក្នុងឱកាសនោះ នាយឧត្តមសេនីយ៍ ក៏បានលើកឡើងអំពីទំនាក់ទំនងដ៏ជិតស្និទ្ធ និងកិច្ចសហប្រតិបត្តិការ រវាងកងទ័ពជើងអាកាស នៃប្រទេសទាំងពីរ កម្ពុជា និងថៃ នាពេលកន្លងមកនេះ ទទួលបានលទ្ធផលជាផ្លែផ្កាដ៏ល្អបំផុត ហើយនៅក្នុងនោះផងដែល ឯកឧត្តម រដ្ឋលេខាធិការក៏បានលើកឡើងជូនចំពោះ នាយឧត្តមសេនីយ៍ មេបញ្ជាការកងទ័ពអាកាសភូមិន្ទថៃ នូវការបន្តពង្រឹងពង្រីក នៃកិច្ចសហប្រតិបត្តិការបន្ថែមទៀត លើការបណ្ដុះបណ្ដាលធនធានមនុស្ស ជូនចំពោះនាយទាហានបន្តវេនកម្ពុជា ក្នុងន័យពង្រឹងសមត្ថភាព និងការស្វែងយល់ ការផ្លាស់ប្តូរព័ត៌មានគ្នាទៅវិញមក រវាងកងទ័ពអាកាសទាំងពីរ ដែលជាប្រទេសជាប់ភូមិផងរបងជាមួយគ្នា និងជាប្រទេសសមាជិកអាស៊ានដូចគ្នា។ ឯកឧត្តម នាង ផាត ក៏បានជម្រាបជូនដល់គណៈប្រតិភូកងទ័ពអាកាសភូមិន្ទថៃ ឲ្យបានជ្រាបផងដែរថា៖ នៅក្នុងខែកញ្ញា ឆ្នាំ២០២៤ខាងមុខនេះ កម្ពុជាគ្រោងនឹងរៀបចំធ្វើជាម្ចាស់ផ្ទះ ស្ដីអំពីសន្និសីទមេបញ្ជាការកងទ័ពជើងអាកាសអាស៊ាន លើកទី២១ ដែលប្រព្រឹត្តទៅនៅក្នុងខេត្តសៀមរាប។ ឯកឧត្តមក៏មានជំនឿជឿជាក់ថា ឯកឧត្តម មេបញ្ជាការកងទ័ពអាកាសភូមិន្ទថៃ នឹងចូលរួមនៅក្នុងសន្និសីទនោះផងដែរ។
ជាកិច្ចឆ្លើយតប នាយឧត្តមសេនីយ៍ PUNPAKDEE PATTANAKUL អគ្គមេបញ្ជាការកងទ័ពអាកាសភូមិន្ទថៃ ក៏បានសម្តែងនូវអំណរគុណ និងការទទួលបដិសណ្ឋារកិច្ចដ៏កក់ក្តៅ ចំពោះគណៈប្រតិភូកងទ័ពអាកាសភូមិន្ទថៃមកកាន់កម្ពុជា នៅក្នុងឱកាសដែលកម្ពុជា មានសុខសន្តិភាព ហើយទទួលបាននូវរាជរដ្ឋាភិបាលថ្មី ដឹកនាំដោយ សម្ដេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី នៃព្រះរាជាណាចក្រកម្ពុជា។ ហើយក៏បានអញ្ជើញកងទ័ពជើងអាកាស នៃកងយោធពលខេមរភូមិន្ទ ចូលរួមការហ្វឹកហាត់ជួយសង្គ្រោះមហន្តរាយ នៅក្នុងប្រទេសថៃ នាចុងឆ្នាំ២០២៤ខាងមុខនេះផងដែរ។ នាយឧត្តមសេនីយ៍ PUNPAKDEE PATTANAKUL ក៏បានលើកឡើងអំពីការផ្លាស់ប្តូរដំណើរទស្សនកិច្ចរបស់នាយទាហាន និងនាយទាហានជាន់ខ្ពស់ នៃកងទ័ពអាកាសទាំងពីរ នឹងបន្តទៅឆ្នាំក្រោយៗទៀត ដើម្បីពង្រីកនូវកិច្ចសហប្រតិបត្តិការដ៏ល្អនឹងគ្នា ៕
