បន្ទាប់ពីបានចុះជួបសំណេះសំណាលសាកសួរសុខទុក្ខកងទ័ព នៅទិសប្រាសាទព្រះវិហារ ទិសទី៣ ខេត្តឧត្តរមានជ័យ និងកងពលតូចថ្មើរជើងលេខ៥១ យោធភូមិភាគទី៥ ក្នុងឱកាសចូលរួមអបអរសាទរពិធីបុណ្យចូលឆ្នាំថ្មី ប្រពៃណីជាតិខ្មែរ ដែលឈានចូលមកដល់នាពេលខាងមុខរួចមក នៅព្រឹកថ្ងៃទី០៦ ខែមេសា ឆ្នាំ២០២៤ ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ អមដំណើរដោយ ឯកឧត្តម នាយឧត្តមសេនីយ៍ វង្ស ពិសេន អគ្គមេបញ្ជាការកងយោធពលខេមរភូមិន្ទ, ឯកឧត្តម នាយឧត្តមសេនីយ៍ ម៉ៅ សុផាន់ អគ្គមេបញ្ជាការរង កងយោធពលខេមរភូមិន្ទ និងជាមេបញ្ជាការកងទ័ពជើងគោក ព្រមទាំងឯកឧត្តម ជាអគ្គនាយក អគ្គនាយករង នាយទាហាន នៅក្នុងស្ថាប័នក្រសួងការពារជាតិ អគ្គបញ្ជាការ ជាច្រើនរូបទៀត បានបន្តអញ្ជើញចុះសាកសួរសុខទុក្ខ នាយទាហាន នាយទាហានរង និងពលទាហាន ដែលកំពុងឈរជើងបំពេញភារកិច្ចការពារអធិបតេយ្យបូរណភាពទឹកដី នៅទីបញ្ជាការជួរមុខយោធភូមិភាគទី១ ព្រំដែនកម្ពុជា-ឡាវ ក្នុងខេត្តស្ទឹងត្រែងបន្តទៀត។
ពេលអញ្ជើញដល់ទីបញ្ជាការជួរមុខយោធភូមិភាគទី១ ព្រំដែនកម្ពុជា-ឡាវ ឯកឧត្តម នាយឧត្តមសេនីយ៍ ទៀសីហា ព្រមទាំងប្រតិភូអមដំណើរបានអញ្ជើញទៅពិនិត្យមើលបង្គោលព្រំដែនលេខ០៧៨ ដែលបានបោះខណ្ឌព្រំដែន រវាងប្រទេសទាំងពីរ កម្ពុជា-ឡាវ ក្បែរទន្លេកុង ស្ថិតនៅក្នុងស្រុកសៀមប៉ាង ខេត្តស្ទឹងត្រែង។ បន្ទាប់ពីបានត្រួតពិនិត្យបង្គោលព្រំដែនលេខ០៧៨ រួចមក ឯកឧត្តម ទៀ សីហា ក៏បានអញ្ជើញទៅពិនិត្យមើលស្ពានទន្លេកុងសែនជ័យ ដែលស្ពានទន្លេកុងសែនជ័យនេះ មានប្រវែង២៦០ម៉ែត្រ ស្ថាបនាកាលពីឆ្នាំ២០១៧។ ឯកឧត្ដម នាយឧត្តមសេនីយ៍ ទៀ សីហា ក៏បានអញ្ជើញទៅពិនិត្យមើលស្ពានកោះទន្សាយ ដែលបានស្ថាបនាដោយកងស្ថាបនាស្ពានថ្នល់ ៧១៥ បញ្ជាការដ្ឋានវិស្វកម្ម អគ្គបញ្ជាការកងយោធពលខេមរភូមិន្ទ ដើម្បីសម្រួលដល់ការធ្វើដំណើរឆ្លងកាត់នូវការដឹកជញ្ជូនផ្សេងៗ ពីត្រើយម្ខាងដែលតភ្ជាប់ពីផ្លូវទីរួមស្រុកសៀមប៉ាង ខេត្តស្ទឹងត្រែង ឆ្ពោះទៅកាន់ត្រើយម្ខាងទៀតរហូតដល់ភូមិសាស្ត្រអូរអាឡៃ និងអូរតាង៉ាវ និងចំណុចខ្សោយបន្ទាប់ពីព្រំដែនជួរមុខនានា នៃព្រំដែនកម្ពុជា-ឡាវ។
តាមរបាយការណ៍របស់ទីបញ្ជាការជួរមុខយោធភូមិភាគទី១ បានបញ្ជាក់ឲ្យដឹងថា៖ កន្លងមកនេះយើង ចំពោះយោធភូមិភាគទី១ បានយកចិត្តទុកដាក់ខ្ពស់បំពេញតួនាទីភារកិច្ចការពារខ្សែបន្ទាត់ព្រំដែនកម្ពុជា-ឡាវ ដោយរក្សាបាននូវបូរណភាពទឹកដីរបស់យើង យ៉ាងរឹងមាំ និងរក្សាបាននូវសន្តិសុខសណ្ដាប់ធ្នាប់នៅតាមព្រំដែន បានយ៉ាងល្អប្រសើរ បើទោះបីជាមានបញ្ហាប្រឈមបន្តិចបន្តួចខ្លះៗ ក៏យើងបានធ្វើការសម្របសម្រួលដោយសន្តិវិធីជាមួយភាគីបានល្អប្រសើរគួរជាទីមោទនៈ ការពិតនេះអង្គភាពបានជម្រុញការបង្កបង្កើនផល ចិញ្ចឹមសត្វ ម្ចាស់ការផ្គត់ផ្គង់អង្គភាពដល់អង្គភាពបានយកចិត្តទុកដាក់លើការងារធានាជីវភាពរស់នៅ សកម្មភាពកងទ័ព និងកសាងជំរំជម្រកដល់យោធិនគ្រប់រូប ឲ្យមានជីវភាពល្អ ហូបចុកគ្រប់គ្រាន់ មានអនាម័យជាប់ជាប្រចាំ។
មានប្រសាសន៍សំណេះសំណាលជាមួយនាយទាហាន នាយទាហានរង និងពលទាហាននៅទីបញ្ជាការជួរមុខយុទ្ធភូមិភាគទីមួយព្រំដែនកម្ពុជា-ឡាវ នាឱកាសនោះ ឯកឧត្តម ទៀ សីហា បានពាំនាំនូវការផ្ដាំផ្ញើសាកសួរសុខទុក្ខពី សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ព្រមទាំងសម្ដេចពិជ័យសេនា ទៀ បាញ់ ឧត្តមប្រឹក្សាផ្ទាល់ព្រះមហាក្សត្រ និងជាអតីត ឧបកនាយករដ្ឋមន្ត្រី រដ្ឋមន្ត្រីក្រសួងការពារជាតិ ផ្ញើជូនដល់នាយទាហាន ពលទាហានទាំងអស់ គ្រាន់តែបានជូនពរសូមឲ្យទេវតាឆ្នាំថ្មីជួយបីបាច់ថែរក្សានាយទាហាន នាយទាហានរង និងពលទាហាន ដែលកំពុងបម្រើភារកិច្ចជួរមុខព្រំដែនកម្ពុជា-ឡាវ សូមឲ្យទទួលបាននូវសេចក្ដីសុខ សេចក្ដីចម្រើន មានសុខភាពល្អបរិបូរណ៍ កម្លាំងខ្លាំងក្លា បញ្ញាឈ្លាសវៃ និងសម្រេចបានជោគជ័យ ក្នុងការបំពេញភារកិច្ចជូនជាតិមាតុភូមិ។ ឯកឧត្តម ទៀ សីហា បានជំរុញដល់នាយទាហាន នាយទាហានរង និងពលទាហានទាំងអស់ បន្តខិតខំបំពេញភារកិច្ច និងយកចិត្តទុកដាក់លុតដំ រៀនសូត្រ គ្រប់ឲ្យបាននូវរាល់បទបញ្ជា ដែលរាជរដ្ឋាភិបាល ក្រសួងការពារជាតិ អគ្គបញ្ជាការកងទ័ពជើងគោក បានដាក់ចុះក្នុងនោះត្រូវការពារឲ្យបាននូវសន្តិភាព ដែលមានក្នុងពេលបច្ចុប្បន្នជាពិសេស នាយទាហាន នាយទាហានរង និងពលទាហានទាំងអស់ ត្រូវចៀសឲ្យឆ្ងាយដោយមិនទៅមានការពាក់ព័ន្ធនឹងគ្រឿងញៀនឡើយ ៕
