បន្ទាប់ពីបានអញ្ជើញចុះសាកសួរសុខទុក្ខ កងកម្លាំងប្រដាប់អាវុធនៅទិសទី១ ប្រាសាទព្រះវិហារ យោធភូមិភាគទី៤ ក្នុងឱកាសពិធីបុណ្យចូលឆ្នាំថ្មី ប្រពៃណីជាតិខ្មែររួចមក នៅព្រឹកថ្ងៃទី៣១ ខែមីនា ឆ្នាំ២០២៤ ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិអមដំណើរដោយ ឯកឧត្តម ជារដ្ឋលេខាធិការ អនុរដ្ឋលេខាធិការ ក្រសួងការពារជាតិ នាយសេនាធិការចំរុះ ខ.ភ.ម អគ្គនាយក អគ្គនាយករង និង នាយទាហានជាន់ខ្ពស់ នៅក្នុងស្ថាប័នក្រសួងការពារជាតិ អគ្គបញ្ជាការជាច្រើនរូបទៀត បានបន្តដំណើរអញ្ជើញចុះសាកសួរសុខទុក្ខកងកម្លាំងប្រដាប់អាវុធទិសទី៣ យោធភូមិភាគទី៤ ដែលពិធីសំណេះសំណាល បានប្រារពធ្វើនៅទីបញ្ជាការជួរមុខទិសទី៣ ក្នុងខេត្តឧត្តរមានជ័យ។
ឯកឧត្តម ឧត្តមសេនីយ៍ឯក កែវ ធី មេបញ្ជាការរងកងទ័ពជើងគោក មេបញ្ជាការកងពលធំអន្តរាគមន៍លេខ២ និងជាប្រធានគណៈបញ្ជាការទិសទី៣ ក្នុងនាម មេបញ្ជាការ មេបញ្ជាការរង នាយទាហាន នាយទាហានរង និងពលទាហាន ទិសទី៣ បានសម្តែងការស្វាគមន៍ចំពោះ ឯកឧត្តម នាយឧត្តមសេនីយ៍ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ដែលបានអញ្ជើញមកសាកសួរសុខទុក្ខ កងកម្លាំងប្រដាប់អាវុធ ដែលកំពុងឈរជើងការពារបូរណភាពទឹកដី និងសន្តិសុខជូនប្រជាពលរដ្ឋ នៅតាមខ្សែបន្ទាត់ព្រំដែន នាឱកាសបុណ្យចូលឆ្នាំថ្មី ប្រពៃណីជាតិខ្មែរ។ ឯកឧត្តម ឧត្តមសេនីយ៍ឯក កែវ ធី បានបញ្ជាក់ថា៖ ក្នុងរយៈពេលកន្លងមក កងកម្លាំងប្រដាប់អាវុធទិសទី ៣ យោធភូមិភាគទី ៤ បានខិតខំបំពេញការងារ ដោយរួមសហការជាមួយអាជ្ញាធរមូលដ្ឋាន សមត្ថកិច្ចជំនាញគ្រប់លំដាប់ថ្នាក់ រក្សាការពារសន្តិសុខសណ្តាប់ធ្នាប់សង្គម និងការពារភូមិសាស្ត្រទទួលខុសត្រូវ បានរឹងមាំ រក្សាបានប្រក្រតីភាពតាមព្រំដែន ដើម្បីកសាងព្រំដែនសន្តិភាព មិត្តភាព កិច្ចសហប្រតិបត្តិការ និងការអភិវឌ្ឍ។
មានប្រសាសន៍សំណេះសំណាលជាមួយ កងកម្លាំងប្រដាប់អាវុធទិសទី ៣ យោធភូមិភាគទី ៤ ក្នុងឱកាសនោះ ឯកឧត្តម នាយឧត្តមសេនីយ៍ ទៀ សីហា បានពាំនាំនូវការផ្ដាំផ្ញើសាកសួរសុខទុក្ខពី សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវ ផ្ញើជូននាយទាហាន នាយទាហានរង និងពលទាហាន ទាំងអស់ ដែលសម្តេចធិបតី និងលោកជំទាវ តែងតែយកចិត្តទុកដាក់ ចំពោះកងទ័ព និងគ្រួសារកងទ័ព ដែលកំពុងឈរជើងបំពេញភារកិច្ចការពារអធិបតេយ្យ បូរណភាពទឹកដី និងសន្តិសុខជូនប្រជាពលរដ្ឋនៅទិសជួរមុខនៃមាតុភូមិ។ ឯកឧត្តម ឧបនាយករដ្ឋមន្រ្តី រដ្ឋមន្ត្រីក្រសួងការពារជាតិ បានសម្តែងនូវការកោតសរសើរ និង វាយតម្លៃខ្ពស់ ចំពោះកងកម្លាំងប្រដាប់អាវុធទិសទី ៣ យោធភូមិភាគទី ៤ ទាំងអស់ ដែលបានខិតខំប្រឹងបំពេញភារកិច្ចជូនជាតិ មាតុភូមិ ការពារបាននូវអធិបតេយ្យ បូរណភាពទឹកដី និងភាពសុខក្សេមក្សាន្តជូនប្រជាពលរដ្ឋរស់នៅ។ ឯកឧត្តម ឧបនាយករដ្ឋមន្រ្តី រដ្ឋមន្ត្រីក្រសួងការពារជាតិបានបញ្ជាក់ថា៖ សន្តិភាពដែលរកបានដោយលំបាកត្រូវរួមគ្នាការពារអោយបានគង់វង្ស។ ឆ្លៀតក្នុងឱកាសនេះ ឯកឧត្តម ទៀ សីហា បានធ្វើការហាមប្រាម ដល់កងកម្លាំងប្រដាប់អាវុធទិសទី ៣ យោធភូមិភាគទី ៤ ទាំងអស់ មិនត្រូវប្រើប្រាស់បណ្តាញផ្សព្វផ្សាយសង្គម (Facebook) ធ្វើការរិះគន់ ឬវាយប្រហារលើមេបញ្ជាការ ឬអង្គភាពរបស់ខ្លួនឡើយ។ ព្រោះយើងមានយន្តការច្រើនណាស់សម្រាប់ដោះស្រាយ ដោយមិនចាំបាច់ប្រើប្រាស់បណ្តាញសង្គមមកធ្វើជាឈ្នាន់ មកធ្វើជាកន្លែងកាត់ក្តី នៃការប៉ះទង្គិចសត្តិអារម្មណ៍ជាមួយគ្នាទេ។ ឯកឧត្តម បានសំណូមពរ ដល់មេបញ្ជាការ មេបញ្ជាការរង នាយទាហាន ពលទាហាន បន្តដោះស្រាយជាមួយគ្នា ដោយមិនជ្រើសរើសយកបណ្តាញផ្សព្វផ្សាយសង្គមមកដោះស្រាយបញ្ហានោះទេ។
ក្នុងឱកាសនោះ ឯកឧត្តម បានជូនពរឆ្នាំថ្មីប្រពៃណីជាតិខ្មែរជូនដល់មេបញ្ជាការ មេបញ្ជាការរង នាយទាហាន នាយទាហាន និងពលទាហាន នៅទិសទី ៣ ទាំងអស់ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ សូមឲ្យទទួលបាននូវសេចក្តីសុខ សេចក្តីចម្រើន កម្លាំងខ្លាំងក្លា ប្រាជ្ញវៀងវៃ ព្រមទាំងសម្រេចបាននូវជោគជ័យថ្មីៗថែមទៀតក្នុងការបំពេញភារកិច្ចជូនជាតិមាតុភូមិ ៕
