កាលពីព្រឹកថ្ងៃទី១១ ខែមីនា ឆ្នាំ២០២៦ លោកជំទាវ នាយឧត្តមសេនីយ៍ ដាំ ដារីនី រដ្ឋលេខាធិការ ក្រសួងការពារជាតិ បានអញ្ជើញជាអធិបតីក្នុងពិធីអបអរសាទរខួបលើកទី១១៥ ទិវាអន្តរជាតិនារី ៨ មីនា ឆ្នាំ២០២៦ ក្រោមប្រធានបទ «សន្តិភាព និងសន្តិសុខសម្រាប់ស្រ្តី និងគ្រួសារ» និងចុះត្រួតពិនិត្យវឌ្ឍនភាពការងារ ព្រមទាំងស្តាប់របាយការណ៍សកម្មភាពការងារ នៅវិទ្យាស្ថានវិទ្យាសាស្ត្រសុខាភិបាលកងយោធពលខេមរភូមិន្ទ។
លោកជំទាវនាយឧត្តមសេនីយ៍ ដាំ ដារីនី រដ្ឋលេខាធិការ ក្រសួងការពារជាតិ បានថ្លែងកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំ មន្ត្រី និងបុគ្គលិកទាំងអស់ នៃវិទ្យាស្ថាន វិទ្យាសាស្ត្រសុខាភិបាលកងយោធពលខេមរភូមិន្ទ ដែលកន្លងមកបានចូលរួមយ៉ាងសកម្មក្នុងវិស័យសុខាភិបាលកងយោធពលខេមរភូមិន្ទ ឲ្យមានការរីកចម្រើនជាបន្តបន្ទាប់។ ការណ្តុះបណ្តាលបង្ហាត់បង្រៀន ផ្តល់ជំនាញវិជ្ជាជីវៈ បច្ចេកទេសជូនដល់សិក្ខាកាមយោធិន សិស្សនិស្សិតស៊ីវិល គឺជាមូលដ្ឋានគ្រឹះក្នុងការអភវឌ្ឍន៌ប្រទេស ជាមួយគ្នានេះ លោកជំទាវក៏បានលើកទឹកចិត្តឲ្យបន្តពង្រឹងសមត្ថភាពវិជ្ជាជីវៈ ការស្រាវជ្រាវផ្នែកវិជ្ជាសាស្ត្រ ជាពិសេសក្រមសីលធម៌ឲ្យប្រកបដោយគុណភាពប្រសិទ្ធភាព។
លោកជំទាវនាយឧត្តមសេនីយ៍ ក៏បានគូសបញ្ជាក់អំពីតួនាទីសំខាន់របស់ស្ត្រី ក្នុងជួរកងយោធពលខេមរភូមិន្ទ ដែលបានចូលរួមយ៉ាងសកម្ម ក្នុងការអភិវឌ្ឍសង្គម ជាពិសេសក្នុងការការពារជាតិ មាតុភូមិ ក្នុងន័យនេះ លោកជំទាវបានជំរុញឲ្យ លោកគ្រូ អ្នកគ្រូ បុគ្គលិកទាំងអស់ បន្តពង្រឹងសាមគ្គីភាព ការងារវិន័យ និងការប្តេជ្ញាចិត្តក្នុងការបំពេញភារកិច្ចឲ្យបានកាន់តែល្អប្រសើរថែមទៀត។ លោកជំទាវ នាយឧត្តមសេនីយ៍ បានថ្លែងអំណរគុណដល់ ថ្នាក់ដឹកនាំវិទ្យាស្ថាន លោកគ្រូ អ្នកគ្រូ នាយទាហាន នាយទាហានរង ពលទាហាន យោធិននារី សិស្ស និសិត្ស សិក្ខាកាមព្រមទាំងបុគ្គលិក ទាំងអស់ដែលបានចូលរួម និងបានប្រគល់លិខិតសរសើរ ថវិកា និងអំណោយជាវត្ថុអនុស្សាវរីយ៍ផងដែរ។
បើតាមសេចក្តីរាយការណ៍របស់ ឯកឧត្តម ឧត្តមសេនីយ៍ឯកសាសហរ្តាចារ្យ នឹម មាលា នាយកវិទ្យាស្ថានវិទ្យាសាស្ត្រសុខាភិបាល ខ.ភ.ម បានអោយដឹងថា៖ ក្រុមការងារយេនឌ័រនៃវិទ្យាស្ថាន បានយកចិត្តទុកដាក់ខ្ពស់ក្នុងការអនុវត្តគោលនយោបាយយេនឌ័រ ដោយផ្តោតលើការពង្រឹង សមភាពយេនឌ័រ ការផ្តល់ឱកាសស្មើភាពក្នុងការអប់រំ ការបណ្តុះបណ្តាល និងការអភិវឌ្ឍសមត្ថភាពដល់យោធិននារី បុគ្គលិក និងនិស្សិត។ ជាក់ស្តែង ក្នុងរយៈពេលកន្លងមក វិទ្យាស្ថានបានរៀបចំ និងចូលរួមសកម្មភាពជាច្រើន រួមមាន ការងារមនុស្សធម៌ ការចូលរួម សកម្មភាពសង្គម ការចុះសួរសុខទុក្ខ ការបណ្តុះបណ្តាល សិក្ខាសាលា និងវេទិកាចែក រំលែកបទពិសោធន៍ ស្តីពីតួនាទីស្ត្រី និងយេនឌ័រ ក្នុងការអប់រំវិជ្ជាជីវៈសុខាភិបាល និងក្នុងកងយោធពលខេមរភូមិន្ទ។ ថ្នាក់ដឹកនាំវិទ្យាស្ថានជឿជាក់ថា៖ ស្ថាប័នអប់រំដែលមានសុវត្ថិភាព និងសមភាព គឺជាគន្លឹះក្នុងការបង្កើតធនធានមនុស្សថ្មី ដែលមានវិជ្ជាជីវៈ គុណធម៌ និងការទទួលខុសត្រូវខ្ពស់។ នៅពេលស្ត្រី មានឱកាស និងការគាំទ្រត្រឹមត្រូវ ពួកគាត់អាចក្លាយជាអ្នកដឹកនាំ អ្នកជំនាញ និងកម្លាំង សំខាន់ ក្នុងការការពារសុខភាពប្រជាជន និងថែរក្សាសន្តិសុខសង្គម។ ឆ្នាំ២០២៦នេះ វិទ្យាស្ថាននឺងផ្តោតលើការអភិវឌ្ឍសមត្ថភាពធនធានមនុស្ស តាមរយ:ការបណ្តុះបណ្តាលបន្តការពង្រឹងចំនួនគ្រូពេញម៉ោង និងការកាត់បន្ថយការពឹងផ្អែកលើគ្រូវេលាកាល។ ជាមួយគ្នានេះ វិទ្យាស្ថាននឹងបន្តវិនិយោគលើហេដ្ឋារចនាសម្ព័ន្ធ សម្ភារៈឧបទេស និងបន្ទប់អនុវត្ត ដើម្បីគាំទ្រការអប់រំផ្អែកលើសមត្ថភាព។ ការពង្រឹងកិច្ចសហប្រតិបត្តិការ ជាមួយ ស្ថាប័នជាតិ និងអន្តរជាតិ នឹងយកចិត្តទុកដាក់បន្ថែម ដើម្បី លើកកម្ពស់គុណភាពបង្រៀន ស្រាវជ្រាវ និងការធ្វើសមាហរណកម្មថ្នាក់តំបន់ និងអន្តរជាតិ ៕
