នៅថ្ងៃទី១០ ខែមិថុនា ឆ្នាំ២០២៥ គណៈប្រតិភូក្រសួងការពារជាតិ ដឹកនាំដោយ ឯកឧត្តម ឧត្តមសេនីយ៍ឯក សៀក សុជាតិ រដ្ឋលេខាធិការ ក្រសួងការពារជាតិ បានបន្តពិភាក្សាការងារ និងផ្លាស់ប្តូរយោបល់ ដើម្បីស្វែងរកចំណុចរួម ក្នុងការធ្វើកិច្ចសហប្រតិបត្តិការ រវាងកម្ពុជា-ចិន លើការពារសន្តិសុខព្រំដែនឆ្លាតវៃ ជាមួយលោក ចាង វិនថៅ (Zhang Wentao) សាកលវិទ្យាធិការ នៃសាកលវិទ្យាល័យល័យគួយលីង អេឡិចត្រូនិច តិចណូឡូជី និងលោក ទូ គ័រឈាំង (Du Guoqiang) ប្រឹក្សាភិបាលក្រុមហ៊ុនគួយលីន ខនទ្រី សេថើឡាយ តិចណូឡូជី ស៊ីសស្ទេម ខូអិលធីឌី នៃសាធារណរដ្ឋប្រជាមានិតចិន។
ភាគីទាំង២ (កម្ពុជា និងចិន) បានពិភាក្សា និងការផ្លាស់ប្តូរយោបល់អំពីលក្ខណៈបច្ចេកទស និងជំនាញនៃការគ្រប់គ្រងបញ្ជា និងប្រសិទ្ធភាពនៃការប្រើប្រាស់ដ្រូនឆ្លាតវៃ ល្បាតយកការនៅតាមបណ្តោយព្រំដែន និងជួយការបណ្តុះបណ្តាលមន្រ្តីជូនក្រសួងការពារជាតិ លើជំនាញប្រើប្រាស់បញ្ជាគ្រប់គ្រងទៅលើសម្ភារៈបច្ចេកទេសឆ្លាតវៃដែលភ្ជាប់ជាមួយបញ្ញាសប្បនិមិត្ត ។ តាមរយៈ សំណើសុំរបស់ ឯកឧត្តម ឧត្តមសេនីយ៍ឯក សៀក សុជាតិ ភាគីចិន បានឯកភាពផ្តល់ដ្រូនចំនួន ៥ឈុត និងផ្តល់អាហារូបករណ៍ ជូនក្រសួងការពារជាតិផងដែរ។ ហើយភាគីចិនឯកភាពនឹងបន្តការឧបត្ថម្ភគាំទ្រកិច្ចសហប្រតិបត្តិការលើផ្នែកនេះ ជាមួយភាគីកម្ពុជា អោយបានយូរអង្វែងផងដែរ។
ជាលទ្ធផលភាគីទាំងពីរ កម្ពុជា និងចិន បានឯកភាព និងបានចុះហត្ថលេខាលើកំណត់ហេតុរួម ស្តីពីកិច្ចសហប្រតិបត្តិការលើគម្រោងប្រព័ន្ធការពារសន្តិសុខព្រំដែនឆ្លាតវៃ នៅទីក្រុងគួយលីន ខេត្តគួងស៊ី ប្រទេសចិនផងដែរ ៕
