ក្រសួងការពារជាតិកម្ពុជាបានទទួលធ្វើជាម្ចាស់ផ្ទះ កិច្ចប្រជុំប្រចាំឆ្នាំថ្នាក់រដ្ឋមន្ត្រីការពារជាតិបីប្រទេស កម្ពុជា-ឡាវ-វៀតណាម។ កិច្ចប្រជុំនេះបានប្រព្រឹត្តទៅនៅសណ្ឋាគារហ្គាឌិនស៊ីធី (Garden city) រាជធានីភ្នំពេញ រសៀលថ្ងៃទី២៥ ខែវិច្ឆិកា ឆ្នាំ២០២៤ ក្រោមអធិបតីភាព ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងមានការចូលរួមពីគណៈប្រតិភូក្រសួងការពារប្រទេសឡាវ ដឹកនាំដោយ ឯកឧត្តម នាយឧត្តមសេនីយ៍ ចាន់សាម៉ន ចាន់ញ៉្ញាឡាត ឧបនាយករដ្ឋមន្ត្រី រដ្ឋមន្ត្រីក្រសួងការពារប្រទេសឡាវ និងវៀតណាម ដឹកនាំដោយឯកឧត្តម នាយឧត្តមសេនីយ៍ ហ្វាង វ៉ាន់ យ៉ាង រដ្ឋមន្ត្រីក្រសួងការពារប្រទេសវៀតណាម។
ក្នុងកិច្ចប្រជុំប្រចាំឆ្នាំថ្នាក់រដ្ឋមន្ត្រីការពារជាតិបីប្រទេស កម្ពុជា-ឡាវ-វៀតណាម សម្រាប់ឆ្នាំនេះ ដែលកម្ពុជាធ្វើជាម្ចាស់ផ្ទះ បានប្រព្រឹត្តទៅរួមជាមួយ និងការធ្វើលំហាត់ហ្វឹកហ្វឺនរួមគ្នាកងទ័ពបីប្រទេសកម្ពុជា-ឡាវ-វៀតណាម ដែលមានរយៈពេល ១០ថ្ងៃ នៅមជ្ឈមណ្ឌលហ្វឹកហ្វឺនកងរាជអាវុធហត្ថ ”ភ្នំជុំសែនរីករាយ” ស្ថិតក្នុងភូមិសាស្ត្រស្រុកសាមគ្គីមានជ័យ ខេត្តកំពង់ឆ្នាំង ដែលបានប្រព្រឹត្តទៅប្រកបដោយជោគជ័យ។
ថ្លែងបើកកិច្ចប្រជុំប្រចាំឆ្នាំថ្នាក់រដ្ឋមន្ត្រីការពារជាតិបីប្រទេសកម្ពុជា-ឡាវ-វៀតណាម ឯកឧត្តម នាយឧត្តមសេនីយ៍ ទៀ សីហា បានចាត់ទុកកិច្ចប្រជុំនេះថា៖ ពិតជាមានសារសំខាន់ណាស់សម្រាប់កងទ័ពនៃប្រទេសទាំងបី ក្នុងការពង្រឹងពង្រីកចំណងសាមគ្គីភាព មិត្តភាព កិច្ចសហប្រតិបត្តិការ ក្នុងការថែរក្សាសន្តិសុខសណ្ដាប់ធ្នាប់ និងការអភិវឌ្ឍសេដ្ឋកិច្ចរីកចម្រើនសម្រាប់តំបន់ព្រំដែន រវាងប្រទេសទាំងបីកម្ពុជា-ឡាវ-វៀតណាម ឱ្យមានស្ថិរភាព សន្តិសុខ កាន់តែល្អប្រសើរ និងមានសន្តិភាពដូចអ្វីដែលប្រទេសយើងទាំងបីធ្លាប់មានទំនាក់ទំនងជាប្រពៃណី តាំងពីយូរយារណាស់មកហើយ។ ឯកឧត្តម ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិកម្ពុជា បានលើកបញ្ជាក់ថា៖ នេះគឺជាលើកទី៣ ហើយដែលកងទ័ពប្រទេសទាំងបីប្រទេសកម្ពុជា-ឡាវ-វៀតណាម បានជួបប្រជុំពិភាក្សាផ្លាស់ប្ដូរយោបល់ និងការបញ្ចេញនូវទស្សនៈ បទពិសោធន៍ ពីគ្នាទៅវិញទៅមក និងផ្ដល់ឱកាសឲ្យកងទ័ពប្រទេសយើងទាំងបី បានធ្វើការផ្លាស់ប្ដូរបទពិសោធន៍ពីគ្នាទៅវិញទៅមក តាមរយៈនៃការរៀបចំឲ្យមានការធ្វើលំហាត់ហ្វឹកហ្វឺនសមយុទ្ធរួមគ្នា កងទ័ពបីប្រទេសលើប្រធានបទ ”សង្គ្រោះគ្រោះមហន្តរាយ ការបាក់រលំអាគារ និងការងារសុខាភិបាលមនុស្សធម៌សង្គ្រោះគ្រោះមហន្តរាយ” សម្រាប់ឆ្នាំ២០២៤នេះ។ កិច្ចប្រជុំរដ្ឋមន្ត្រីការពារជាតិបីប្រទេសកម្ពុជា-ឡាវ-វៀតណាម ក៏បានវាយតម្លៃបន្ថែមផងដែរ ទៅលើយន្តការតំបន់ និងអន្តរជាតិ ដែលតម្រូវឲ្យមានការគិតគូរ និងពិចារណាឡើងវិញនូវប្រសិទ្ធភាពក្នុងការដោះស្រាយជម្លោះ បញ្ហាប្រឈមនានា ដើម្បីថែរក្សាសន្តិសុខ សន្តិភាព និងភាពរីកចម្រើនក្នុងតំបន់ និងសកលលោក។
ឆ្លងតាមកិច្ចប្រជុំប្រចាំឆ្នាំថ្នាក់រដ្ឋមន្ត្រីការពារជាតិបីប្រទេសកម្ពុជា-ឡាវ-វៀតណាមលើកទីបី និងការធ្វើលំហាត់ហ្វឹកហ្វឺនរួមគ្នាកងទ័ពបីប្រទេសឆ្នាំ២០២៤នៅកម្ពុជាលើកនេះ បានវាយតម្លៃថា កងទ័ពយើងទាំងបីប្រទេស និងកាន់តែពង្រឹងពង្រីកបានកាន់តែល្អប្រសើរ នូវកិច្ចសហប្រតិបត្តិការក្នុងការថែរក្សាសន្តិសុខ របៀបរៀបរយតាមបណ្ដោយព្រំដែនកម្ពុជា-ឡាវ-វៀតណាម ពិសេសកងទ័ពដែលឈរជើងការពារតាមបណ្ដោយព្រំដែន នៃប្រទេសយើងទាំងបី នឹងអនុវត្តឲ្យបានល្អត្រឹមត្រូវតាមអនុសាសន៍របស់ប្រមុខដឹកនាំរដ្ឋាភិបាល នៃប្រទេសទាំងបីកម្ពុជា-ឡាវ-វៀតណាម។
ឆ្លងតាមកិច្ចប្រជុំនេះដែរ កងទ័ពទាំងបីប្រទេសបានឯកភាពគ្នាសហការគ្នា ក្នុងការការពារថែរក្សាសន្តិសុខ តាមតំបន់បណ្ដោយព្រំដែន នៃប្រទេសទាំងបី ជាព្រំដែនសន្តិភាព ដោយរក្សាឲ្យបាននូវសន្តិសុខ សុវត្ថិភាពតាមបណ្ដោយព្រំដែន ដើម្បីបង្កគ្រប់លក្ខណសម្បត្តិដល់ពលរដ្ឋដែលរស់នៅប្រកបរបររកស៊ីតាមព្រំដែន ឲ្យមានជីវភាពកាន់តែធូរធារ សហការជាមួយគ្រប់សមត្ថកិច្ចពាក់ព័ន្ធ និងមន្ត្រីដែលមានការពាក់ព័ន្ធ នៃប្រទេសទាំងបី ក្ដាប់សភាពការណ៍ សហការអនុវត្តភារៈកិច្ច ក្នុងការទប់ស្កាត់បទល្មើសឆ្លងដែនដោយខុសច្បាប់ ទប់ស្កាត់រាល់សកម្មភាពភេរវកម្ម ឧក្រិដ្ឋកម្មឆ្លងដែន ការជួញដូរមនុស្ស ការជួញដូរគ្រឿងញៀន ការបរបាញ់សត្វព្រៃ ការជីករុករកសម្បត្តិធម្មជាតិ ការកាប់និងបំផ្លាញព្រៃឈើ ការជួញដូរវត្ថុបុរាណ ការជួញដូរអាវុធយុទ្ធភណ្ឌ និងការប្រព្រឹត្តបទល្មើសខុសច្បាប់ផ្សេងៗទៀត។ រាល់បញ្ហាដែលកើតមានឡើងប្រការណាមួយនៅតំបន់ព្រំដែន ប្រទេសទាំងបី កងទ័ព និងអាជ្ញាធរពាក់ព័ន្ធតាមតំបន់ព្រំដែនជាប់គ្នានៅតំបន់នោះ ត្រូវទំនាក់ទំនងល្អជាមួយគ្នា ដោះស្រាយដោយសន្តិវិធី ជួបប្រជុំផ្លាស់ប្តូរព័ត៌មានដោះស្រាយបញ្ហា ដែលកើតមានឡើងតាមបណ្ដោយព្រំដែន ដោយសន្តិវិធី ហើយត្រូវរាយការណ៍ និងសុំមតិយោបល់ពីថ្នាក់លើ ព្រមទាំងចូលរួមទប់ស្កាត់រាល់ការឃោសនារបស់ភាគីអមិត្តផ្សេងៗ ដែលបង្កការញុះញង់ឲ្យមានអំពើហិង្សាកើតឡើង ដែលជាការបំបែកបំបាក់នូវចំណងសាមគ្គីភាព មិត្តភាព របស់ប្រជាជាតិ និងកងទ័ពប្រទេសទាំងបីកម្ពុជា-ឡាវ-វៀតណាម។ ជាមួយគ្នានេះដែរ ក៏ត្រូវយកចិត្តទុកដាក់សហការជាមួយអាជ្ញាធរមូលដ្ឋាន និងមន្ត្រីពាក់ព័ន្ធ ដើម្បីអប់រំប្រជាពលរដ្ឋប្រទេសនីមួយៗ ដែលរស់នៅតាមបណ្ដោយព្រំដែនប្រទេសទាំងបី ឲ្យមានការយល់ដឹងអំពីច្បាប់ និងសេចក្ដីកំណត់ផ្សេងៗ របស់ប្រទេសនីមួយៗ ចៀសវាងការប្រព្រឹត្តអំពើល្មើសច្បាប់ និងធ្វើឲ្យប៉ះពាល់ដល់សន្តិសុខ សុវត្ថិភាពតាមបណ្ដោយព្រំដែន នៃប្រទេសទាំងបី។
ជាចុងក្រោយរដ្ឋមន្ត្រីការពារជាតិទាំងបីប្រទេសកម្ពុជា-ឡាវ-វៀតណាម ក៏បានឯកភាពគ្នាក្នុងការរៀបចំកិច្ចប្រជុំប្រចាំឆ្នាំថ្នាក់រដ្ឋមន្ត្រីការពារជាតិ និងធ្វើលំហាត់ហ្វឹកហ្វឺនសមយុទ្ធរួមគ្នាកងទ័ពបីប្រទេសកម្ពុជា-ឡាវ-វៀតណាមបន្តទៀត នៅលើទឹកដីនៃសាធារណរដ្ឋប្រជាធិបតេយ្យប្រជាមានិតឡាវ នៅឆ្នាំ២០២៥ ព្រមទាំងបានចុះហត្ថលេខាលើកំណត់ហេតុ នៃកិច្ចប្រជុំនេះ ប្រកបដោយភាពស្និទ្ធស្នាល យោគយល់គ្នា ក្នុងនាមប្រទេសជិតខាងល្អ មិត្តភាពជាប្រពៃណី និងគោរពអធិបតេយ្យភាពរបស់ប្រទេសនីមួយៗ ៕
