ឯកឧត្តម ឧត្តមសេនីយ៍ឯក លី កុសល រដ្ឋលេខាធិការក្រសួងការពារជាតិ ជួយរដ្ឋមន្ត្រីលើការងារអគ្គនាយកដ្ឋានភ័ស្តុភារ-ហិរញ្ញវត្ថុ កម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ និងលទ្ធកម្មសាធារណៈ បានអញ្ជើញធ្វើបាឋកថាស្ដីពី ការងារគ្រប់គ្រងធានាភ័ស្តុភារ-ហិរញ្ញវត្ថុយោធា ជូនទៅដល់ថ្នាក់ដឹកនាំ យោធាចារ្យ និងនិស្សិតសិក្ខាកាម នៃសាកលវិទ្យាល័យការពារជាតិ នាព្រឹកថ្ងៃទី២១ ខែវិច្ឆិកា ឆ្នាំ២០២៤។
ក្នុងសុន្ទរកថាស្វាគមន៍របស់ ឧត្តមសេនីយ៍ឯក ដោក សុផា សាកលវិទ្យាធិការ សាកលវិទ្យាល័យការពារជាតិ បានជម្រាបថា៖ សាកលវិទ្យាល័យការពារជាតិ បាននិងកំពុងអភិវឌ្ឍសមត្ថភាព លើវិជ្ជាជីវៈរបស់បុគ្គលិកសាស្ត្រាចារ្យ យោធាចារ្យ ក៏ដូចជានិស្សិត និងសិក្ខាកាម នៃសាកលវិទ្យាល័យការពារជាតិ លើចំណុចគ្រប់គ្រងភស្តុភារ-ហិរញ្ញវត្ថុយោធាផងដែរ។ ឧត្តមសេនីយ៍ឯក ដោក សុផា បន្តថា៖ វត្តមានរបស់ ឧត្តមសេនីយ៍ឯក លី កុសល រដ្ឋលេខាធិការធ្វើបាឋកថាស្ដីពី ការងារគ្រប់គ្រងធានាភស្តុភារ-ហិរញ្ញវត្ថុយោធានាថ្ងៃនេះ នឹងជួយលើកតម្កើងនូវការយល់ដឹង ដ៏មានតម្លៃចំពោះភាពស្មុគស្មាញ នៃការគ្រប់គ្រងធានាភ័ស្តុភារ-ហិរញ្ញវត្ថុ នៅក្នុងវិស័យការពារជាតិរបស់យើង។ នៅក្នុងយុគ្គសម័យបច្ចេកវិទ្យាឌីជីថល និងការគ្រប់គ្រងភ័ស្តុភារ-ហិរញ្ញវត្ថុយោធា ទាមទារឲ្យមានប្រសិទ្ធភាពកាន់តែខ្ពស់ នោះគឺការណែនាំរបស់ឯកឧត្តម រដ្ឋលេខាធិការ នៅព្រឹកនេះ និងបានផ្តល់នូវគំនិតល្អៗ ដល់និស្សិត និងសិក្ខាកាមរបស់យើងទទួលបាននូវចំណេះដឹង ដែលពួកគេត្រូវការ ដើម្បីបម្រើដល់កងកម្លាំងប្រដាប់អាវុធ នៃកងយោធពលខេមរភូមិន្ទរបស់យើង នាពេលអនាគត។
នៅក្នុងឱកាសនោះ ឧត្តមសេនីយ៍ឯក លី កុសល រដ្ឋលេខាធិការ ក្រសួងការពារជាតិ បានឧទ្ទេសនាមពីបទពិសោធមួយចំនួន ក្នុងការងារគ្រប់គ្រងធានាភ័ស្តុភារ-ហិរញ្ញវត្ថុ ជូនកងយោធពលខេមរភូមិន្ទ ក្នុងនោះ ឯកឧត្តមក៏បានលើកពីសភាពការណ៍វិវឌ្ឍជាបន្តបន្ទាប់ របស់ការងារភ័ស្តុភារ-ហិរញ្ញវត្ថុ ក្នុងកងយោធពលខេមរភូមិន្ទ ចាប់តាំងពីក្រោយរំដោះផុតពីរបបប្រល័យពូជសាសន៍ នាថ្ងៃទី៧ ខែមករា ឆ្នាំ១៩៧៩ រហូតដល់មានការចរចាស្វែងរកសន្តិភាពរបស់ភាគីជម្លោះនៅកម្ពុជា ការបោះឆ្នោតជាសកលលើកដំបូង នឹងរៀបចំឲ្យអាជ្ញាធរបណ្ដោះអាសន្ន ដែលរៀបចំដោយអាជ្ញាធរបណ្ដោះអាសន្ន អង្គការសហប្រជាជាតិប្រចាំប្រទេសកម្ពុជា អ៊ុនតាក់ នៅថ្ងៃទី២៣ ខែឧសភា ឆ្នាំ១៩៩៣។ ឧត្តមសេនីយ៍ឯក លី កុសល បានលើកឡើងថា ទោះជាកងទ័ពជាតិត្រូវបានបង្កើតឡើងវិញ ហើយរាជរដ្ឋាភិបាលចម្រុះមួយ ត្រូវបានតែងតាំង និងដឹកនាំជាតិ រួចទៅហើយក្ដី ក៏សង្គ្រាមនៅតែបន្តរហូតដល់ចុងឆ្នាំ១៩៩៨ ទើបត្រូវបានបញ្ចប់ទាំងស្រុង ដោយនយោបាយឈ្នះ ឈ្នះ របស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។ ឯកឧត្តមរដ្ឋលេខាធិការបានបន្តថា៖ ការងារហិរញ្ញវត្ថុត្រូវបានយកចិត្តទុកដាក់លើការទ្រទ្រង់ជីវភាពរស់នៅ ធានាបម្រើជូនកងទ័ពបំពេញភារៈកិច្ចការងារហ្វឹកហ្វឺន រៀនសូត្រ និងចល័តកម្លាំងបន្ទាន់តាមបទបញ្ជា សម្រេចបានតាមផែនការ និងបានចូលរួម ប្រើឲ្យកិច្ចការមនុស្សធម៌ ការងារត្រៀមចូលរួមសង្គ្រោះគ្រោះធម្មជាតិផ្សេងៗ។ ឯកឧត្តម លី កុសល ក៏បានបញ្ជាក់ថា៖ ដើម្បីធានាជូនបណ្ដាអង្គភាពក្នុងកងទ័ព ឲ្យបានឆាប់រហ័ស ឆ្លើយតបទៅនឹងតម្រូវការរបស់កងឯកភាព បណ្ដាស្ថាប័នជំនាញភ័ស្តុភារ-ហិរញ្ញវត្ថុទាំងអស់ បន្តខិតខំបំពេញភារកិច្ចរបស់ខ្លួន ដោយស្មារតីយកចិត្តទុកដាក់ សហការយ៉ាងជិតស្និទ្ធជាមួយបណ្ដាអង្គភាព ដើម្បីធានាដោះស្រាយថវិកា សម្ភារៈ ទំនិញបម្រើជូនយោធិនទូទាំងកងយោពលខេមរភូមិន្ទឲ្យបានឆាប់រហ័ស ទាន់ពេលវេលា ប្រកបដោយតម្លាភាព និងប្រសិទ្ធភាពខ្ពស់ ៕
