នៅព្រឹកថ្ងៃទី១១ ខែវិច្ឆិកា ឆ្នាំ២០២៤ ឧត្តមសេនីយ៍ឯក ខៀវ ឆេន រដ្ឋលេខាធិការក្រសួងការពារជាតិ និងជាប្រធានលេខាធិការដ្ឋាន នៃគណៈកម្មការអន្តរក្រសួង បានអញ្ជើញចុះត្រួតពិនិត្យទីតាំង និងដឹកនាំកិច្ចប្រជុំត្រួតពិនិត្យវឌ្ឍនភាពការងារ ត្រៀមរៀបចំពិធីសំណេះសំណាលជាមួយនឹងលោកគ្រូ អ្នកគ្រូ និងសិស្សានុសិស្ស ក្រោមអធិបតីភាពដ៏ខ្ពង់ខ្ពស់ ឯកឧត្តម រដ្ឋមន្ត្រីការពារជាតិទាំងបីប្រទេសកម្ពុជា-ឡាវ-វៀតណាម ដែលទីតាំងនោះស្ថិតនៅវិទ្យាល័យទេពប្រណម្យ នៅក្នុងឃុំកំពង់ហ្លួង ស្រុកពញាឮ ខេត្តកណ្ដាល។
ឧត្ដមសេនីយ៍ឯក ខៀវ ឆេន បានគូសបញ្ជាក់ថា៖ ឆ្នាំនេះក្រសួងការពារជាតិកម្ពុជា នឹងធ្វើជាម្ចាស់ផ្ទះរៀបចំកិច្ចប្រជុំរដ្ឋមន្ត្រីការពារជាតិ និងធ្វើលំហាត់សមយុទ្ធរួម រវាងកងទ័ពបីប្រទេសកម្ពុជា-ឡាវ-វៀតណាម នៅចុងខែវិច្ឆិកា ឆ្នាំ២០២៤។ តាមកម្មវិធីគ្រោងទុក ឯកឧត្ដម រដ្ឋមន្ត្រីការពារជាតិបីប្រទេសកម្ពុជា-ឡាវ-វៀតណាម និងអញ្ជើញចូលរួមពិធីសំណេះសំណាលជាមួយនឹងលោកគ្រូ អ្នកគ្រូ សិស្សានុសិស្ស នៅវិទ្យាល័យទេពប្រណម្យផងដែរ។ នេះជាប្រពៃណីដ៏សប្បុរសរបស់កងទ័ពបីប្រទេសកម្ពុជា-ឡាវ-វៀតណាម ដែលតែងតែប្រតិបត្តិរួមគ្នាលើការងារសុខាភិបាល អប់រំ បន្ថែមលើប្រតិបត្តិការលើវិស័យការពារជាតិ ដូចជាការល្បាតព្រំដែនគោក ការទប់ស្កាត់ និងបង្ក្រាបបទល្មើសឆ្លងដែន សំដៅរួមចំណែកពង្រឹងចំណងទំនាក់ទំនងភាពជាអ្នកជិតខាងល្អ មិត្តភាពជាប្រពៃណី និងកិច្ចសហប្រតិបត្តិការយុទ្ធសាស្ត្រគ្រប់ជ្រុងជ្រោយ និងរឹងមាំយូរអង្វែង។
តាមសេចក្ដីរាយការណ៍របស់ ឯកឧត្ដម ណុប ដារ៉ា អភិបាលរងខេត្តកណ្តាល បានជម្រាបជូន ឯកឧត្តម រដ្ឋលេខាធិការ ក្រសួងការពារជាតិថា៖ រដ្ឋបាលខេត្តកណ្តាល បានត្រៀមរៀបចំការងារគ្រប់ផ្នែកតាមលំដាប់ ទៅតាមការប្រគល់ភារៈកិច្ចរបស់គណៈកម្មការអន្តរក្រសួងរួចរាល់ សម្រាប់ការត្រៀមទទួលរដ្ឋមន្ត្រីទាំងបីប្រទេស។ ជាមួយគ្នានេះផងដែរ រដ្ឋបាលខេត្តគ្រោងអញ្ជើញថ្នាក់ដឹកនាំមន្ត្រីរាជការ លោកគ្រូ អ្នកគ្រូ និងសិស្សានុសិស្សចូលរួមពិធីសំណេះសំណាលរបស់រដ្ឋមន្ត្រីការពារជាតិទាំងបីប្រទេសមានចំនួនប្រមាណ៥០០នាក់។ ក្នុងនោះផងដែរ រដ្ឋបាលខេត្តនឹងរៀបចំតុបតែងលម្អនៅវិទ្យាល័យទេពប្រណម្យ និងទីប្រជុំជនសាធារណៈ និងត្រៀមខ្លួនរួចជាស្រេចផ្តល់កិច្ចសហការ និងអនុវត្តការងារផ្សេងៗទៀត តាមការប្រគល់ភារៈកិច្ចរបស់គណៈកម្មការអន្តរក្រសួង។
ឧត្តមសេនីយ៍ឯក ខៀវ ឆេន បានផ្តល់អនុសាសន៍ណែនាំដល់ក្រុមការងារទាំងអស់ ត្រូវបន្តយកចិត្តទុកដាក់រៀបចំ ត្រួតពិនិត្យការងារគ្រប់ផ្នែកឲ្យបានរួចរាល់ តាមការប្រគល់ភារៈកិច្ចរបស់គណៈកម្មការអន្តរក្រសួង ក្នុងនោះស្នើឲ្យរដ្ឋបាលខេត្ត ស្រុក ពិសេសគណៈគ្រប់គ្រងវិទ្យាល័យទេពប្រណម្យបន្តផ្សព្វផ្សាយ និងធ្វើការណែនាំដូចជាការប្រើប្រាស់សម្លៀកបំពាក់សិស្ស ឲ្យបានសមរម្យ ការរៀបចំសិស្សានុសិស្សជូនបាច់ផ្កា ឈរកាន់ដងទង់ជាតិទាំងបីប្រទេស ទទួលស្វាគមន៍យ៉ាងកក់ក្តៅចំពោះរដ្ឋមន្ត្រីការពារជាតិបីប្រទេស ការរៀបចំពិធី និងតុបតែងលម្អ ការងារពិធីការ និងបដិសណ្ឋារកិច្ច ការរៀបចំនូវវត្ថុអនុស្សាវរីយ៍ ការថតរូបភាព វីដេអូការ ការការពារសន្តិសុខ និងកិច្ចការងារពាក់ព័ន្ធផ្សេងៗទៀត ៕
