នៅព្រឹកថ្ងៃទី៨ ខែវិច្ឆិកា ២០២៤ ក្រសួងការពារជាតិ បានប្រារព្ធពិធីអបអរសាទរខួបអនុស្សាវរីយ៏លើកទី៧១ ទិវាកំណើត ខ.ភ.ម ៩ វិច្ឆិកា ១៩៥៣-៩ វិច្ឆិកា ២០២៤ ក្រោមអធិបតីភាព ឯ.ឧ នាយឧត្តមសេនីយ៏ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ដោយមានការអញ្ជើញ ចូលរួមពីសំណាក់ ឯ.ឧ នាយឧត្តមសេនីយ៏ អគ្គមេបញ្ជាការ នៃខ.ភ.ម, មេបញ្ជាការកងទ័ពជើងគោក, ជើងទឹក, ជើងអាកាស, កងរាជអាវុធហត្ថ ព្រមទាំង ឯ.ឧ នាយទាហានជាន់ខ្ពស់ ចំណុះក្រសួងការពារជាតិជាច្រើន។
ក្នុងសុន្ទរកថាប្រវត្តិសង្ខេប នៃថ្ងៃកំណើតខ.ភ.ម ដែលអានដោយ ឯ.ឧ នាយឧត្តមសេនីយ៏ វង្ស ពិសេន អគ្គមេបញ្ជាការ នៃខ.ភ.ម បានឲ្យដឹងថា៖ ខួបអនុស្សាវរីយ៏លើកទី៧១ ទិវាកំណើត ខ.ភ.ម នាឆ្នាំនេះបានបង្កប់នូវអត្ថន័យយ៉ាងជ្រាលជ្រៅ ព្រោះថាជាឆ្នាំចាប់ផ្ដើមដែល ខ.ភ.ម បានកំពុងប្តេជ្ញាចិត្តខ្ពស់ ខិតខំប្រឹងប្រែងពុះពារ អនុវត្តឲ្យបានជោគជ័យធំធេងជាបន្តបន្ទាប់ទៀត នៃផែនការកែរទម្រង់ ខ.ភ.ម ៥ឆ្នាំ ដំណាក់កាលទី៥កន្លងមក(២០១៩.២០២៤)។ ឯ.ឧ អគ្គមេបញ្ជាការ បានបន្តទៀតថា៖ ព្រះរាជាណាចក្រកម្ពុជា បានទទួលឯករាជ្យភាពពេញបរិបូណ៌នាថ្ងៃទី៩ វិច្ឆិកា ១៩៥៣ ដោយចលនាទាមទាររបស់កងទ័ព និងប្រជារាស្ត្រគ្រប់ស្រទាប់វណ្ណៈ ក្រោមព្រះរាជបូជនីយ៏កិច្ចរបស់ ព្រះករុណាព្រះបាទសម្ដេច ព្រះនរោត្តម សីហនុ។ ស្ថិតក្រោមបញ្ជារបស់ព្រះអង្គផ្ទាល់ ខ.ភ.ម បានបង្ហាញនូវភាពអង់អាច មោះមុត ក្នុងប្រតិបត្តិការសឹក រំដោះតំបន់ខ្លះពីកណ្ដាប់ដៃបរទេស និងពួកឧទ្ទាម។ ក្រោយរដ្ឋប្រហារឆ្នាំ១៩៧០ កម្ពុជាបានធ្លាក់ក្នុងសង្គ្រាមស៊ីវីល ជាពិសេសក្នុងរបបប្រល័យពូជសាសន៏ ខ្មែរក្រហម កាន់អំណាច, ខ.ភ.ម បានបាត់បង់លក្ខណៈសម្បត្តិ អត្តចរិត និងឈ្មោះជាខ.ភ.ម តាំងពីពេលនោះមក។ កិច្ចព្រមព្រៀងសន្តិភាពទីក្រុងប៉ារីសថ្ងៃទី២៣ ខែតុលា ឆ្នាំ១៩៩១ បានធ្វើឲ្យខ.ភ.ម ត្រូវបានដំណើរការកសាងឡើងវិញ នៅថ្ងៃទី១៤ ខែមីនា ឆ្នាំ១៩៩៣។ ក្រោមការដឹកនាំរបស់រាជរដ្ឋាភិបាល ខ.ភ.ម បានបំពេញតួនាទីរបស់ខ្លួន ជាកំលាំងអព្យាក្រិត្យ និងបានចូលរួមយ៉ាងសកម្មអនុវត្តនយោបាយ ឈ្នះ ! ឈ្នះ ! របស់សម្តេចតេជោ ហ៊ុន សែន ក្នុងគោលដៅបញ្ចប់ការបង្ហូរឈាម និងធ្វើការបង្រួបបង្រួមជាតិ។ លើសពីនេះខ.ភ.ម បានបំពេញភារកិច្ច ស្នូលរបស់ខ្លួន ក្នុងកិច្ចការពារទឹកដី និងទប់ស្កាត់ការវិលត្រឡប់នៃរបប ប៉ុល ពត ព្រមទាំងចូលរួម ចំណែកថែរក្សាការពារសន្តិសុខ និងសណ្ដាប់ធ្នាប់សង្គមជាតិ។
ថ្លែងក្នុងឱកាសនោះដែរ ឯកឧត្តម នាយឧត្តមសេនី ទៀ សីហា បានសម្តែងនូវការកោតសរសើរ ដោយមនោសញ្ចេតនា គោរពស្រឡាញ់យ៉ាងជ្រាលជ្រៅ ចំពោះវីរកងទ័ព នាយទាហាន នាយទាហានរង និងពលទាហាន នៃខ.ភ.មគ្រប់រូប ដែលបាននឹងកំពុងបំពេញបេសកកម្មប្រកបដោយវីរភាព និងពលិកម្មដើម្បីបុព្វហេតុទាមទារ និងការពារឯករាជ្យ សន្តិភាព ការពារបូរណភាពទឹកដី និងសេចក្ដីសុខក្សេមក្សាន្តរបស់ប្រជាពលរដ្ឋ។ ឯ.ឧ ក៏បានសម្តែងនូវការដឹងគុណចំពោះជនរួមជាតិទាំងអស់ ដែលបានលះបង់កូនចៅ ប្តីសី និងសាច់ញាតិ ឲ្យចូលបំរើក្នុងជួរកងទ័ព ដើម្បីការពារជាតិ មាតុភូមិ នៅគ្រប់ជំនាន់ និងផ្ដាំផ្ញើរសាកសួរសុខទុក្ខ និងដឹងគុណចំពោះគ្រួសារយោធិន, អតីតយុទ្ធជនគ្រប់រូបរួមមាន៖ យោធិនពលី មរណៈ ពិការ យោធិនចូលនិវត្តន៏ យោធិនបាត់បង់សមត្ថភាពការងារ យោធិនរំសាយ និងយោធិនរបួស-ជំងឺ ដែលកំពុងសំរាកព្យាបាលនៅតាមមន្ទីរពេទ្យ និងនៅគ្រប់ទីកន្លែង សូមឲ្យបានឆាប់ជាសះស្បើយ និងមានសុខភាពបរិបូណ៌។ ឯ.ឧ ទៀ សីហា ក៏បានថ្លែងកោតសសើរ ចំពោះកងយោធពលខេមរភូមិន្ទ បានចូលរួមអនុវត្តភារកិច្ចអន្តរជាតិ លើវិស័យមនុស្សធម៌ និងការរក្សាសន្តិភាព ក្នុងក្របខ័ណ្ឌរបស់អង្គការសហប្រជាជាតិ ដែលជាមោទនភាព របស់កងយោធពលខេមរភូមិន្ទ ក៏ដូចជាប្រទេសជាតិ ធ្វើឱ្យកិត្យានុភាពជាតិកាន់តែល្បីរន្ទឺលើឆាកអន្តរជាតិ។
ឆ្លៀតក្នុងឱកាសនោះផងដែរ ឯ.ឧ ឧបនាយករដ្ឋមន្ត្រី ក៏បានជំរាបជូនអង្គពិធីនូវសភាពការណ៏ទូទៅមួយចំនួនជុំវិញពិភពលោក ក្នុងតំបន់ និងបានជះឥទ្ធិពលមកលើព្រះរាជាណាចក្រកម្ពុជា ក្នុងរយៈពេលប៉ុន្មានឆ្នាំចុងក្រោយនេះ ដែលកំពុងមានការវិវត្តន៏ប្រែប្រួលយ៉ាងឆាប់រហ័ស ប្រកបដោយភាពបត់បែន និងពោរពេញដោយភាពចំរូងចំរាស់ ស្មុគ្រស្មាញជាច្រើន ដែលពុំទាន់ដោះស្រាយបាន។ បណ្តាប្រទេសមហាអំណាចលើពិភពលោក និងមហាអំណាចតំបន់ បានផ្លាស់ប្តូរតុល្យភាព នៃឥទ្ធិពលលើគ្រប់វិស័យ ទាំងផ្នែកនយោបាយ សេដ្ឋកិច្ច យោធា និងការទូត។ ឥទ្ធិពលទាំងនេះក៏បានធ្វើឲ្យមានការប៉ះពាល់មកលើព្រះរាជាណាចក្រកម្ពុជា ពិសេសមនោគមន៏វិជ្ជាបែបថ្មី ដែលមានឧបាយកលប៉ុនប៉ងនាំមកនូវបដិវត្តន៏ពណ៌មកកម្ពុជា។ ចំពោះបញ្ហាព្រំដែនពួកប្រឆាំងបានបង្កការញុះញង់ឲ្យមានភាពតានតឹង ចលាចល នឹងដោយមួលបង្កាច់រាជរដ្ឋាភិបាល ក្នុងគំរោងការអភិវឌ្ឍ៣ប្រទេសកម្ពុជា-ឡាវ-វៀតណាម។ ឯ.ឧ នាយឧត្តមសេនីយ៏ ទៀ សីហា ក៏បានថ្លែងនូវដោយមោទនភាព ដែលកន្លងមកខ.ភ.មបានអនុវត្តម៉ឺងម៉ាត់ តាមគោលនយោបាយរបស់រាជរដ្ឋាភិបាល ដោយគោរពខ្ជាប់ខ្ជួននូវការពង្រឹងនីតិរដ្ឋ ក្នុងគោលដៅថែរក្សា សន្តិភាព ស្ថិរភាពសង្គម និងសណ្តាប់ធ្នាប់សាធារណៈរបស់សង្គមជាតិ។
ជាចុងក្រោយ ឯ.ឧ ក៏បានធ្វើការផ្តាំផ្ញើរ និងផ្ដល់អនុសាសន៏សំខាន់ៗមួយចំនួនដល់អង្គពិធី គឺត្រូវបន្តអនុវត្ត តាមកម្មវិធីនយោបាយ និងយុទ្ធសាស្រ្តបញ្ចកោណដំណាក់កាលទី៧ របស់រាជរដ្ឋាភិបាល ដែលមាន សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីជាប្រមុខ ពិសេសអនុវត្តឲ្យបានល្អតាមផែនការកំណែរទម្រង់៥ឆ្នាំ របស់ ខ.ភ.ម បន្តទៀត។ ត្រូវអនុវត្តលើការងារព្រំដែន ជាមួយប្រទេសជិតខាង ពង្រឹង និងពង្រីកទំនាក់ទំនងជាមួយបណ្តាប្រទេសជាមិត្ត, បន្តយកចិត្តទុកដាក់លើការងារហ្វឹកហ្វឺន លើកកំពស់សមត្ថភាពជំនាញវិជ្ជាជីវៈឲ្យកងទ័ព, ផ្សព្វផ្សាយ អប់រំ អំពីការអនុវត្តរបបគោលនយោបាយរបស់រាជរដ្ឋាភិបាលចំពោះកងទ័ព ដើម្បីធានានូវជំនឿជឿជាក់ ទឹកចិត្តស្នេហាជាតិ គោរពច្បាប់រដ្ឋ គោរពបទបញ្ជារបស់កងទ័ព រក្សាបានភាពថ្លៃថ្នូរ ស្អាតស្អំ មានឆន្ទៈស្នេហាជាតិមាតុភូមិ។ ត្រូវយកចិត្តទុកដាក់ពង្រឹងគ្រប់គ្រងកំលាំងទ័ព បន្តកសាងធនធានមនុស្ស ត្រូវបង្កើនការគ្រប់គ្រងថែរក្សាចិញ្ចឹមកងទ័ព កសាងអង្គភាពរឹងមាំ និងចូលរួមការងារគោលនយោបាយអតីតយុទ្ធជន បន្តយកចិត្តទុកដាក់ ពង្រឹក និងពង្រីកកិច្ចសហប្រតិបត្តិការនានា ជាលក្ខណៈអន្តរជាតិលើវិស័យកងទ័ព ជាពិសេសវិស័យបច្ចេកវិទ្យាពត៌មានវិទ្យា គោលដៅអភិវឌ្ឍន៏ និងទំនើបកម្មលើវិស័យការពារជាតិរបស់កម្ពុជា។ មេបញ្ជាការគ្រប់លំដាប់ថ្នាក់ ត្រូវមានការប្តេជ្ញាចិត្ត ប្រកបដោយឆន្ទៈមុះមុត ប្តូរផ្ដាច់ ប្រកបដោយមនសិការ ស្មារតីលះបង់ខ្ពស់បំផុត ក្នុងការអនុវត្តរាល់វិធានការ ពិសេសត្រូវប្រតិបត្តិខ្ជាប់ខ្ជួននូវការងារ (ឆ្លុះកញ្ចក់ ងូតទឹក ដុះក្អែល និងព្យាបាល) ៕
