ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានអនុញ្ញាតឲ្យលោកវរសេនីយ៍ឯក ម៉ូចាម៉ាត់ រីហ្សាល (MOCHAMAD RIZAL) អនុព័ន្ធយោធាឥណ្ឌូនេស៊ី(ចាស់) ប្រចាំព្រះរាជាណាចក្រកម្ពុជា ចូលជួបសម្តែងការគួរសម និងជម្រាបលា និងលោកវរសេនីយ៏ឯក អាហ្គុង ប៊ុឌី អាស្មារ៉ា (AGUNG BUDI ASMARA) អនុព័ន្ធយោធាឥណ្ឌូនេស៊ី(ថ្មី) ជួបសំដែងការគួរសម នាព្រឹកថ្ងៃទី០៥ ខែវិច្ឆិកា ឆ្នាំ២០២៤។
លោកវរសេនីយ៍ឯក MOCHAMAD RIZAL អនុព័ន្ធយោធាចាស់ បានបញ្ជាក់ថា៖ ក្នុងរយៈពេល៣ឆ្នាំកន្លងមកនេះ រូបលោកបានបំពេញបេសកកម្មការទូតយោធានៅកម្ពុជា ទទួលបាននូវភាពកក់ក្តៅ និងការគោរពស្រឡាញ់រាប់អាន ទាំងក្នុងកិច្ចសហប្រតិបត្តិការក្នុងជួរកងយោធពលខេមរភូមិន្ទ ក៏ដូចជាបងប្អូនប្រជាពលរដ្ឋកម្ពុជានៅទូទាំងប្រទេស។ លោកវរសេនីយ៍ឯក MOCHAMAD RIZAL បានបង្ហាញពីមោទនភាពចំពោះការបំពេញភារៈកិច្ចជោគជ័យជាច្រើននៅកម្ពុជា ជាពិសេសជាមួយអង្គភាពដៃគូ ដែលមានដូចជា បញ្ជាការដ្ឋានទ័ពពិសេសកងទ័ពជើងគោក អតីតកងពលតូចទ័ពពិសេសឆត្រយោងលេខ៩១១ និងបញ្ជាការដ្ឋានអង្គរក្ស។
ជាកិច្ចឆ្លើយតប នាយឧត្តមសេនីយ៍ ទៀ សីហា បានវាយតម្លៃខ្ពស់ ចំពោះចំណងការទូតរវាងប្រទេសទាំងពីរ កម្ពុជា-ឥណ្ឌូនេស៊ី ដែលក្នុងរយៈពេលជាង៦០ឆ្នាំមកនេះ មានទំនាក់ទំនងកិច្ចសហប្រតិបត្តិការល្អជាមួយគ្នា ទាំងផ្នែកប្រវត្តិសាស្ត្រ និងវប្បធម៌។ ឯកឧត្តម ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិបានបញ្ជាក់ថា៖ ឥណ្ឌូនេស៊ីគឺជាប្រទេសមួយ ដែលបានខិតខំស្វែងរកសន្តិភាពសម្រាប់ប្រទេស និងប្រជាជនកម្ពុជា ឈានដល់កិច្ចព្រមព្រៀងសន្តិភាពទីក្រុងប៉ារីស៍ និងបានបញ្ជូនកងទ័ពមួកខៀវ ក្នុងក្របខ័ណ្ឌអង្គការសហប្រជាជាតិ ដើម្បីរៀបចំដំណើរការបោះឆ្នោតនៅកម្ពុជា ទទួលបានជោគជ័យក្នុងឆ្នាំ១៩៩៣។ តាមរយៈនៃបេសកកម្មការទូតយោធា របស់លោកអនុព័ន្ធយោធាចាស់ ឯកឧត្ដមជឿជាក់ថា ទៅថ្ងៃអនាគតកងទ័ពប្រទេសទាំងពីរកម្ពុជា-ឥណ្ឌូនេស៊ី នៅតែបន្តកិច្ចសហប្រតិបត្តិការជាមួយគ្នា ដើម្បីឲ្យចំណងមិត្តភាព សាមគ្គីភាព កិច្ចសហប្រតិបត្តិការ រវាងរដ្ឋាភិបាលកងទ័ព និងប្រជាជនប្រទេសទាំងពីរ មានភាពល្អប្រសើរទ្វេឡើងថែមទៀត ៕
