នៅព្រឹកថ្ងៃទី០១ ខែវិច្ឆិកា ឆ្នាំ២០២៤ លោកវរសេនីយ៍ឯក ចិន វ៉ាន់ទឹម ប្រធានការិយាល័យអនុព័ន្ធយោធាវៀតណាមប្រចាំកម្ពុជា បានដឹកនាំសហការីចូលជួបសំដែងការគួរសម និងជូនពរឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ក្នុងឱកាសខួបអនុស្សាវរីយ៍លើកទី៧១ ទិវាកំណើតកងយោធពលខេមរភូមិន្ទ ០៩ វិច្ឆិកា ឆ្នាំ១៩៥៣-០៩ វិច្ឆិកា ឆ្នាំ២០២៤ នៅទីស្តីការក្រសួងការពារជាតិ។
ក្នុងឱកាសនោះ លោកវរសេនីយ៍ឯក ចិន វ៉ាន់ទឹម ក្នុងនាមបក្សរដ្ឋាភិបាល និងកងទ័ពប្រជាជនវៀតណាម បានសម្ដែងអំណរសាទរខួបលើកទី៧១ ថ្ងៃកំណើតកងយោធពលខេមរភូមិន្ទ និងជូនពរឯកឧត្តម នាយឧត្តមសេនីយ៍ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ព្រមទាំងថ្នាក់ដឹកនាំនាយទាហាន នាយទាហានរង និងពលទាហានទាំងអស់ ទូទាំងកងយោធពលខេមរភូមិន្ទ សូមមានសុខភាពល្អបរិបូណ៍ និងទទួលជោគជ័យគ្រប់ភារកិច្ច ដែលថ្នាក់ដឹកនាំប្រគល់ជូន។ លោកវរសេនីយ៍ឯក ចិន វ៉ាន់ទឹម បានរំលេចពីព្រឹត្តិការណ៍សំខាន់ៗក្នុងឆ្នាំ២០២៣-២០២៤ ដែលប្រទេសទាំងពីរបានសហការគ្នាយ៉ាងល្អ ក្នុងនោះពិធីរំឭកខួបអនុស្សាវរីយ៍លើក ទី៤៥-៥៦ និង៥៧ ទិវា ចងចាំដំណើរឆ្ពោះទៅកាន់ការផ្ដួលរំលំរបបប្រល័យពូជសាសន៍ ប៉ុល ពត ដែលជាព្រឹត្តិការណ៍ប្រវត្តិសាស្ត្រឆ្លុះបញ្ចាំង ពី ការវិវត្តន៍របស់កម្ពុជា ក៏ដូចជាការវិវត្តន៍នៃទំនាក់ទំនងកម្ពុជា-វៀតណាម និងការធ្វើលំហាត់រួមគ្នាក្នុងកិច្ចការស្វែងរក និងជួយសង្គ្រោះមនុស្ស នៅទីក្រុងវៀងច័ន្ទ ប្រទេសឡាវ, ជំនួបប្រាស្រ័យទាក់ទងថ្នាក់រដ្ឋមន្ត្រីការពារជាតិប្រទេសទាំង៣ វៀតណាម-កម្ពុជា-ឡាវ នៅខេត្តកន្ទុំ និងនៅតំបន់ព្រំដែនត្រីកោណមរកត វៀតណាម-កម្ពុជា-ឡាវ កាលពីឆ្នាំ ២០២៣ ពិសេសនៅឆ្នាំនេះកម្ពុជា កំពុងគ្រោងរៀបចំនឹងធ្វើជាម្ចាស់ផ្ទះ កិច្ចប្រជុំថ្នាក់រដ្ឋមន្ត្រី៣ប្រទេស និងលំហាត់សមយុទ្ធរួមគ្នា កម្ពុជា-វៀតណាម-ឡាវ ឆ្នាំ២០២៤ លើប្រធានបទ សង្គ្រោះគ្រោះមហន្តរាយនៃការបាក់រលំអាគារ មានផ្នែកមនុស្សធម៌។
ជាកិច្ចឆ្លើយតប ឯកឧត្តម ទៀ សីហា បានថ្លែងអំណរគុណចំពោះការិយាល័យអនុព័ន្ធយោធាវៀតណាម ដែលបានដឹកនាំប្រតិភូមកជូនពរក្នុងឱកាសនេះ និងបានវាយតម្លៃខ្ពស់ ចំពោះទំនាក់ទំនងមិត្តភាព កិច្ចសហប្រតិបត្តិការ រវាងប្រទេសទាំងពីរ ដែលធ្លាប់ជួយគ្នាទៅវិញទៅមក ក្នុងនាមប្រទេសភូមិផងរបងជាមួយ ហើយជាមិត្តដ៏ល្អ ចេះជួយគ្នាគ្រប់កាលៈទេសៈ។ ឯកឧត្តម ឧបនាយករដ្ឋមន្ត្រី បានលើកឡើងពីការរីកចម្រើនរបស់ប្រទេសទាំងពីរលើគ្រប់វិស័យ ដែលកត្តានេះអាស្រ័យដោយប្រទេសនីមួយៗសុខសន្តិភាព មានស្ថិរភាពនយោបាយល្អ ហើយនៅតំបន់ព្រំដែនប្រទេសទាំងពីរមានទំនាក់ទំនង កិច្ចសហប្រតិបត្តិការជិតស្និទ្ធជាមួយគ្នា ៕
