ព្រឹកថ្ងៃទី២៦ ខែតុលា ឆ្នាំ២០២៤ សម្ដេចមហាមន្ត្រី គុយ សុផល ឧបនាយករដ្ឋមន្ត្រី រដ្ឋមន្ត្រីក្រសួងព្រះបរមរាជវាំង និងនាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ អមដោយមន្ត្រីយោធាជាន់ខ្ពស់ ក្នុងក្រសួងការពារជាតិ អគ្គមេបញ្ជាការ និងមន្ត្រីជំនាញ នៃអនុគណៈកម្មការរៀបចំពិធីបុណ្យជាច្រើនរូប បានអញ្ជើញចុះពិនិត្យមើលផែនឈររបស់កងកម្លាំងប្រដាប់អាវុធ មហាជន-ប្រជាជន ធ្វើការសាកល្បងថ្វាយព្រះពរព្រះករុណាព្រះមហាក្សត្រ នៃព្រះរាជាណាចក្រកម្ពុជា សម្រាប់ព្រះរាជពិធីបុណ្យខួបលើកទី២០ នៃការគ្រងព្រះបរមរាជសម្បត្តិរបស់ ព្រះករុណាព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា នៅមុខព្រះបរមរាជវាំង រាជធានីភ្នំពេញ។ សម្រាប់ព្រះរាជពិធីបុណ្យខួបលើកទី២០ នាឆ្នាំ២០២២៤នេះ បានគ្រោងរៀបចំធ្វើពិធីបុណ្យដ៏ធំមួយ ដែលមានរយៈពេល៣ថ្ងៃ ចាប់ពីថ្ងៃទី២៨ ដល់ថ្ងៃទី៣០ ខែតុលា ឆ្នាំ២០២៤ខាងមុខនេះ នៅក្នុងព្រះបរមរាជវាំង និងនៅមុខព្រះបរមរាជវាំង រាជធានីភ្នំពេញ ដើម្បីថ្វាយព្រះពរព្រះករុណាជាអង្គម្ចាស់នៃយើង។
នៅមុខព្រះបរមរាជវាំង អនុគណៈកម្មការរៀបចំកម្លាំង និងបាញ់កាំជ្រួច នៃគណៈកម្មការរៀបចំពិធីបុណ្យជាតិ និងអន្តរជាតិ បានរៀបចំផែនឈរជាផែនៗ មានប្រវែងប្រមាណជា៥៤ផែន ដែលមានផែនឈរកងកិត្តិយសត្រែទ័ព ផែនឈរកងទ័ពទាំងបីប្រភេទ ផែនកងកម្លាំងនគរបាលជាតិ ផែនមន្ត្រីរាជការ និងផែនឈរតំណាងឲ្យមហាជន-ប្រជាជន និងរដ្ឋអំណាច ចូលរួមក្នុងព្រះរាជពិធីថ្វាយព្រះពរ និងប្រារព្ធអង្គមិទ្ទិញប្រមាណជាជាង៥០០០នាក់។
គួររំឭកអំពីជីវប្រវត្តិខ្លះៗ របស់ព្រះករុណាព្រះមហាក្សត្រ នៃព្រះរាជាណាចក្រកម្ពុជាដែរថា៖ ព្រះករុណាជាអង្គម្ចាស់ ព្រះករុណាព្រះបាទសម្ដេចព្រះបរមនាថ នរោត្តម សីហមុនី ទ្រង់ប្រសូតនៅថ្ងៃទី១៤ ខែឧសភា ឆ្នាំ១៩៥៣ ជាព្រះរាជបុត្រ នៃព្រះករុណាព្រះបាទសម្ដេច ព្រះនរោត្តម សីហនុ ព្រះបរមរតនកោដ្ឋ និងសម្ដេចព្រះមហាក្សត្រ នរោត្តម មុនីនាថសីហនុ ព្រះវររាជមាតាជាតិខ្មែរ ព្រះអង្គត្រូវបានក្រុមប្រឹក្សារាជសម្បត្តិជ្រើសតាំងជាព្រះមហាក្សត្រ នៃព្រះរាជាណាចក្រកម្ពុជា បន្តពីព្រះបិតា ដែលព្រះអង្គបានដាក់រាជ្យកាលពីថ្ងៃទី៧ ខែតុលា ឆ្នាំ២០០៤។ នៅថ្ងៃទី១៤ ខែតុលា ឆ្នាំ២០០៤ ព្រះអង្គត្រូវបានជ្រើសរើសដោយសមាជិកទាំង៩រូប នៃក្រុមប្រឹក្សារាជសម្បត្តិ ដើម្បីគ្រងរាជ្យបន្តពីព្រះបិតារបស់ព្រះអង្គ។ ព្រះករុណាសម្តេចព្រះបរមនាថ នរោត្តម សីហមុនី ទ្រង់ឡើងគ្រងរាជសម្បត្តិនៅថ្ងៃសុក្រ ទី២៩ ខែតុលា ឆ្នាំ២០០៤ ដែលគិតមកដល់បច្ចុប្បន្ននេះមានរយៈពេល២០ឆ្នាំហើយ។
ក្នុងឱកាសចុះពិនិត្យសកម្មភាពហាត់សម សម្តេចមហាមន្ត្រី និងឯកឧត្តម រដ្ឋមន្ត្រីក្រសួងការពារជាតិ បានធ្វើការណែនាំដល់ឯកឧត្តម អស់លោកប្រធានស្ថាប័ន និងមេបញ្ជាការកងឯកភាព ដែលមានភារៈកិច្ចចូលរួមដឹកនាំក្នុងផែនឈរ ថ្វាយព្រះពរ ព្រះរាជពិធីបុណ្យខួបលើកទី២០ នៃការគ្រងព្រះបរមរាជសម្បត្តិ ត្រូវយកចិត្តទុកដាក់បន្ថែមទៀត លើការងារគ្រប់គ្រងកម្លាំងឲ្យបានល្អ ប្រកបដោយវិន័យសេចក្ដីថ្លៃថ្នូរ ក្នុងនាមជាជនជាតិខ្មែរ ទាំងផែនឈរកងកម្លាំងប្រដាប់អាវុធគ្រប់ប្រភេទ និងផែនឈរថ្នាក់ដឹកនាំមហាជន-ប្រជាជន ពិសេសត្រូវយកចិត្តទុកដាក់ហ្វឹកហាត់អប់រំដល់កងកម្លាំងរបស់ខ្លួន ឲ្យយល់ពីអត្ថន័យខ្លឹមសារ នៃពិធីដើម្បីឲ្យការប្រារព្ធពិធីប្រព្រឹត្តទៅទទួលបានជោគជ័យ ៕
