រសៀលថ្ងៃទី២១ ខែតុលា ឆ្នាំ២០២៤ ឯកឧត្តម ឧត្តមសេនីយ៍ឯក រ៉ាត់ ដារ៉ារ័ត្ន រដ្ឋលេខាធិការក្រសួងការពារជាតិ តំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានអនុញ្ញាតឲ្យ លោកឧត្តមសេនីយ៍ទោ NOEL D BELERAN នាយសេនាធិការរង ផ្នែកអប់រំ ហ្វឹកហ្វឺន និងយុទ្ធសាស្ត្រ J8 នៃកងទ័ពហ្វីលីពីន ចូលជួបសម្តែងការគួរសម នៅទីស្ដីការក្រសួងការពារជាតិ។
នៅក្នុងជំនួបនោះ តាងនាមក្រសួងការពារជាតិ ឯកឧត្តម ឧត្តមសេនីយ៍ឯក រ៉ាត់ ដារ៉ារ័ត្ន បានវាយតម្លៃខ្ពស់ចំពោះកិច្ចសហប្រតិបត្តិការដ៏ល្អ និងបន្តពង្រឹងពង្រីកកិច្ចសហប្រតិបត្តិការយោធា រវាងកងយោធពលខេមរភូមិន្ទ ជាមួយនឹងកងទ័ពហ្វីលីពីន។ ក្នុងជំនួបនោះផងដែរ ក៏បានពិភាក្សាលើខ្លឹមសារមួយចំនួនដូចខាងក្រោម៖ ភាគីហ្វីលីពីនបានលើកឡើងថា កន្លងមកនេះក្រសួងការពារជាតិទាំង២ បានផ្លាស់ប្តូរទស្សនកិច្ចទៅវិញទៅមក ព្រមទាំងបានបញ្ជូនប្រតិភូចូលរួមព្រឹត្តិការណ៍នានា មាននៅព្រះរាជាណាចក្រកម្ពុជា និងនៅប្រទេសហ្វីលីពីន។ ជាក់ស្ដែងនៅពេលកម្ពុជាធ្វើជាប្រធានអាស៊ាន ក្រសួងការពារជាតិហ្វីលីពីន ក៏បានអញ្ជើញមកចូលរួមនៅក្នុងកិច្ចប្រជុំ ADMM។ នាពេលថ្មីៗនេះ នាយសេនាធិការកងទ័ពហ្វីលីពីន ក៏បានអញ្ជើញមកទស្សនកិច្ចផ្លូវការនៅកម្ពុជា ហើយការតាំងពិព័រណ៍កងទ័ពហ្វីលីពីនកន្លងមកថ្មីៗនេះ ក្រសួងការពារជាតិកម្ពុជា ក៏បានបញ្ជូនប្រតិភូបណ្ដាប្រភេទទ័ពចូលរួមផងដែរ។ នៅខែវិច្ឆិកា ឆ្នាំ២០២៤ខាងមុខនេះ ហ្វីលីពីននឹងធ្វើជាម្ចាស់ផ្ទះការបាញ់កាំភ្លើងអាស៊ាន កម្ពុជាគ្រោងនឹងបញ្ជូនកងទ័ពជើងគោកទៅចូលរួមផងដែរ។ ភាគីហ្វីលីពីនក៏បានស្នើសុំភាគីកម្ពុជាពង្រីកបន្ថែមទៅលើផ្នែកអប់រំហ្វឹកហ្វឺន និងបណ្តុះបណ្តាល ជាពិសេសវគ្គបញ្ជាការសេនាធិការ ដែលភាគីហ្វីលីពីននឹងជួយគាំទ្រដល់កិច្ចការនេះ។
ជាការឆ្លើយតប ឯកឧត្តម ឧត្តមសេនីយ៍ឯក រ៉ាត់ ដារ៉ារ័ត្ន បានថ្លែងអំណរគុណ លោកឧត្តមសេនីយ៍ទោ NOEL D BELERAN នាយសេនាធិការរង ផ្នែកអប់រំហ្វឹកហ្វឺន និងយុទ្ធសាស្ត្រ J8 នៃកងទ័ពហ្វីលីពីន និងគណៈប្រតិភូដែលបានមកទស្សនកិច្ចនៅកម្ពុជា បានសម្តែងការគួរសមចំពោះថ្នាក់ដឹកនាំក្រសួងការពារជាតិនាពេលនេះ និងបានលើកឡើងនូវការរីកចម្រើន នៃទំនាក់ទំនងនៃប្រទេសទាំងពីរ ព្រមទាំងបានលើកឡើងអំពីគោលបំណងខាងលើ ហើយចំពោះការស្នើសុំឲ្យមានការពង្រីកបន្ថែមលើផ្នែកអប់រំហ្វឹកហ្វឺន និងបណ្តុះបណ្តាលរវាងកងទ័ពនៃប្រទេសទាំងពីរ គឺពិតជាមានសារៈសំខាន់ណាស់ ដើម្បីពង្រឹងនូវកិច្ចសហប្រតិបត្តិការយោធាដល់ប្រទេសទាំងពីរ ហើយកងយោធពលខេមរភូមិន្ទ និងពិនិត្យលើលក្ខណៈសម្បត្តិរបស់បេក្ខភាពទៅចូលរួមវគ្គសិក្សានីមួយៗ ដែលភាគីហ្វីលីពីនបានផ្តល់ឲ្យភាគីកម្ពុជា ៕
