នៅទីស្តីការក្រសួងការពារជាតិ រសៀលថ្ងៃទី១៨ ខែតុលា ឆ្នាំ២០២៤ បន្ទាប់ពីបានអញ្ជើញដឹកនាំក្រុមនាំមុខក្រសួងការពារប្រទេសឡាវ និងវៀតណាម ចុះត្រួតពិនិត្យទីតាំងធ្វើលំហាត់ហ្វឹកហ្វឺនរួម រវាងកងទ័ពបីប្រទេសកម្ពុជា-ឡាវ-វៀតណាម នៅមជ្ឈមណ្ឌលហ្វឹកហ្វឺនកងអាវុធហត្ថភ្នំជុំសែនរីករាយ ក្នុងខេត្តកំពង់ឆ្នាំង និងនៅវិទ្យាល័យទេពប្រណម្យ ក្នុងទឹកដីខេត្តកណ្តាលរួចមក ឯកឧត្តម នាយឧត្តមសេនីយ៍ ឥត សារ៉ាត់ អនុប្រធានប្រចាំការ នៃគណៈកម្មការអន្តរក្រសួង បានដឹកនាំប្រជុំជាមួយគណៈប្រតិភូជាន់ខ្ពស់ និងក្រុមការងារជំនាញនាំមុខ នៃក្រសួងការពារប្រទេសឡាវ និងវៀតណាម ដើម្បីត្រៀមរៀបចំកិច្ចប្រជុំប្រចាំឆ្នាំថ្នាក់រដ្ឋមន្ត្រីការពារជាតិ និងធ្វើលំហាត់ហ្វឹកហ្វឺនរួម រវាងកងទ័ពបីប្រទេសកម្ពុជា-ឡាវ-វៀតណាម នៅក្នុងពាក់កណ្តាលខែវិច្ឆិកា ឆ្នាំ២០២៤ ខាងមុខ។
ក្នុងកិច្ចប្រជុំនាឱកាសនោះ គណៈប្រតិភូក្រសួងការពារជាតិឡាវ ដឹកនាំដោយ ឧត្តមសេនីយ៍ទោ ស៊ុមផន មីតាក់ផន អនុប្រធានអគ្គសេនាធិការកងទ័ពប្រជាជនឡាវ និងគណៈប្រតិភូក្រសួងការពារប្រទេសវៀតណាម ដឹកនាំដោយ ឧត្តមសេនីយ៍ទោ ង្វៀន ចុងប៊ីញ អនុប្រធានអគ្គសេនាធិការ នៃកងទ័ពប្រជាជនវៀតណាម។
នាយឧត្តមសេនីយ៍ ឥត សារ៉ាត់ បានថ្លែងថា៖ កិច្ចប្រជុំរដ្ឋមន្ត្រីការពារជាតិ និងការធ្វើលំហាត់រួមគ្នារវាងកងទ័ពទាំង៣ប្រទេស ធ្វើឡើង និងអនុវត្តតាមការសម្រេចរបស់ថ្នាក់ដឹកនាំប្រទេសទាំង៣ ក្នុងគោលបំណងពង្រឹងពង្រីកកិច្ចសហប្រតិបត្តិការ រវាងប្រទេសជិតខាងល្អ និងចេះជួយគ្នាទៅវិញទៅមក ស្របតាមការដឹកនាំរបស់ថ្នាក់ដឹកនាំក្រសួងការពារជាតិទាំង៣ និងក្នុងគោលបំណងពង្រឹងពង្រីកកិច្ចសហប្រតិបត្តិការកងទ័ពទាំង៣ កម្ពុជា-ឡាវ-វៀតណាម ឱ្យកាន់តែស៊ីជម្រៅថែមទៀត។ ដើម្បីរៀបចំកិច្ចប្រជុំរដ្ឋមន្ត្រីការពារជាតិ និងការធ្វើលំហាត់កងទ័ពទាំង៣ប្រទេសឲ្យសម្រេចជោគជ័យ ឯកឧត្តម ឥត សារ៉ាត់ ក៏បានជំរុញឲ្យមានការផ្សព្វផ្សាយ និងអប់រំកម្លាំងចូលរួមក្នុងកិច្ចប្រជុំ និងការធ្វើលំហាត់ឲ្យពង្រឹងពង្រីកការសាមគ្គីភាព មិត្តភាព ប្រទេសទាំង៣ កងទ័ពទាំង៣ ដែលជានិច្ចកាល បានសហការគ្នាជួយគ្នាទៅវិញទៅមកនៅគ្រប់កាលៈទេសៈ។ ធ្វើការផ្សព្វផ្សាយដល់មហាជន ប្រជាជនឲ្យឃើញពីតម្លៃនៃកិច្ចសហប្រតិបត្តិការគ្នារវាងកងទ័ពទាំង៣ ដែលការចូលរួមអបអរសាទរហើយគាំទ្រកិច្ចប្រជុំ និងការធ្វើលំហាត់កងទ័ពទាំង៣ប្រទេសនេះ ព្រមទាំងរួមគ្នាទប់ស្កាត់ការឃោសនាញុះញង់បំភាន់ដល់មហាជន ប្រជាជនឲ្យយល់ខុស ប្រាស់ចាកពីអ្វីដែលជាការពិត។
ឯកឧត្តមបញ្ជាក់ថា៖ ការធ្វើលំហាត់សមយុទ្ធរួមគ្នាកម្ពុជា-វៀតណាម-ឡាវ ដែលប្រទេសកម្ពុជាធ្វើជាម្ចាស់ផ្ទះនាឆ្នាំ២០២៤នេះ និងបានផ្តល់ឱកាសដល់កងទ័ពទាំង៣ប្រទេស នៅក្នុងការពង្រឹងទំនាក់ទំនងមិត្តភាព សាមគ្គីភាព ជាប្រពៃណី ក្នុងនាមជាអ្នកជិតខាងល្អ លើមូលដ្ឋានកិច្ចសហប្រតិបត្តិការ នៃដៃគូយុទ្ធសាស្ត្រគ្រប់ជ្រុងជ្រោយ។ តាមរយៈកិច្ចប្រជុំ ឯកឧត្តម ឥត សារ៉ាត់ ក៏បានសំណូមពរដល់កម្លាំងចូលរួមធ្វើលំហាត់ និងកីឡាយោធាកងទ័ពទាំង៣ប្រទេស ត្រូវយកចិត្តទុកដាក់អនុវត្តឲ្យទទួលបានជោគជ័យតាមផែនការ និងធានាសុវត្ថិភាពឲ្យបានល្អទាំងមនុស្ស និងគ្រឿងបំពាក់ ព្រមទាំងត្រូវសហការគ្នា ស្រឡាញ់គ្នាសាមគ្គីគ្នា និងត្រូវចេះជួយគ្នាទៅវិញទៅមក ៕
