នៅព្រឹកថ្ងៃទី១៨ ខែតុលា ឆ្នាំ២០២៤ នាយឧត្តមសេនីយ៍ ឥត សារ៉ាត់ អគ្គមេបញ្ជាការរង នាយសេនាធិការចំរុះនៃកងយោធពលខេមរភូមិន្ទ អនុប្រធានប្រចាំការ នៃគណៈកម្មការអន្តរក្រសួង ដឹកនាំក្រុមនាំមុខក្រសួងការពារប្រទេស ឡាវ និងវៀតណាម អមដំណើរដោយ ឯកឧត្តម ឧត្តមសេនីយ៍ទោ ស៊ុមផន មីតាក់ផន អនុប្រធានអគ្គសេនាធិការ កងទ័ពប្រជាជនឡាវ តំណាងភាគីកងទ័ពឡាវ, ឯកឧត្តម ឧត្តមសេនីយ៍ទោ ង្វៀន ចុងប៊ីញ អនុប្រធានអគ្គសេនាធិការ កងទ័ពប្រជាជនវៀតណាម តំណាងភាគីកងទ័ពប្រជាជនវៀតណាម ចុះត្រួតពិនិត្យទីតាំង ដើម្បីរៀបចំកិច្ចប្រជុំប្រចាំឆ្នាំ ថ្នាក់រដ្ឋមន្ត្រីការពារជាតិ និងធ្វើលំហាត់សមយុទ្ធរួម រវាងកងទ័ពបីប្រទេស កម្ពុជា-ឡាវ-វៀតណាម ឆ្នាំ២០២៤ ដែលភាគីកម្ពុជាធ្វើជាម្ចាស់ផ្ទះ នៅមជ្ឈមណ្ឌលហ្វឹកហ្វឺនកងរាជអាវុធហត្ថ ស្ថិតក្នុងភូមិសាស្ត្រភ្នំជុំសែនរីករាយ ស្រុកសាមគ្គីមានជ័យ ខេត្តកំពង់ឆ្នាំង។
សូមជម្រាបថា៖ នៅព្រឹកនេះ នាយឧត្តមសេនីយ៍ ឥត សារ៉ាត់ ដែលជាអនុប្រធានប្រចាំការ នៃគណៈកម្មការអន្តរក្រសួង ដឹកនាំក្រុមនាំមុខក្រសួងការពារប្រទេស ឡាវ និងវៀតណាម បានអញ្ជើញចុះត្រួតពិនិត្យទីតាំងដោយផ្ទាល់កន្លែងសម្រាប់ពិធីបើក-បិទ ការធ្វើលំហាត់ហ្វឹកហ្វឺនរួមរវាងកងទ័ពទាំងបីប្រទេស នៅក្នុងមជ្ឈមណ្ឌលហ្វឹកហ្វឺនកងរាជអាវុធហត្ថភ្នំជុំសែនរីករាយ ដែលនៅទីនោះ ក៏ពិនិត្យមើលផងដែរ ទីតាំងលំហាត់នៃសកម្មភាពសង្គ្រោះគ្រោះមហន្តរាយនៃការបាក់រលំអាគារ, ទីតាំងសម្រាប់សង្គ្រោះបន្ទាន់ផ្នែកសុខាភិបាល រួមនិងទីតាំងនៃការប្រកួតកីឡាយោធា ហើយក៏នឹងពិនិត្យមើលផងដែរ ទីតាំងសម្រាប់ពិធីជួបសំណេះសំណាលរបស់ថ្នាក់រដ្ឋមន្ត្រីទាំងបីប្រទេសជាមួយនឹងមហាជន លោកគ្រូ អ្នកគ្រូ សិក្សានុសិស្ស នៅក្នុងវិទ្យាល័យទេពប្រណម្យ ស្ថិតក្នុងភូមិកំពង់លួង ស្រុកពញាឮ ខេត្តកណ្ដាល ផងដែរ។ ដោយឡែក នៅមានទីតាំងមួយកន្លែងទៀត ស្ថិតក្នុងភូមិសាស្ត្ររាជធានីភ្នំពេញ គឺជាទីតាំងសម្រាប់ការប្រារព្ធពិធីបើក និងបិទកិច្ចប្រជុំថ្នាក់រដ្ឋមន្ត្រីការពារជាតិបីប្រទេស កម្ពុជា-ឡាវ-វៀតណាម។
ជាមួយគ្នានេះដែរ ក្នុងខណៈពេលចុះពិនិត្យមើលទីតាំងសម្រាប់ធ្វើលំហាត់ហ្វឹកហ្វឺនរួមគ្នា លើសកម្មភាព សង្គ្រោះគ្រោះមហន្តរាយ នៃការបាក់រលំអាគារ និងកន្លែងប្រារព្ធពិធីបើក និងបិទលំហាត់។ បរិវេណនៃការប្រកួតកីឡាយោធា ក្នុងមជ្ឈមណ្ឌលហ្វឹកហ្វឺនកងរាជអាវុធហត្ថភ្នំជុំសែនរីករាយ គណៈកម្មការអន្តរក្រសួង ដើម្បីរៀបចំកិច្ចប្រជុំប្រចាំឆ្នាំ ថ្នាក់រដ្ឋមន្ត្រីការពារជាតិ និងធ្វើលំហាត់សមយុទ្ធរួម រវាងកងទ័ពបីប្រទេសកម្ពុជា ឡាវ វៀតណាម បានឯកភាពគ្នា ថាអាចទទួលយកបាន និងសមស្របតាមស្ថានការណ៍ និងបរិយាកាសល្អប្រសើរ ហើយក៏ជាទីតាំងប្រវត្តិសាស្ត្ររបស់ប្រទេសកម្ពុជាផងដែរ។ ដោយឡែកទីតាំងសម្រាប់ថ្នាក់រដ្ឋមន្ត្រីការពារប្រទេសទាំងបី កម្ពុជា-ឡាវ-វៀតណាម ជួបសំណេះសំណាល និងធ្វើការងារមនុស្សធម៌ ជាមួយមហាជន ប្រជាជន លោកគ្រូ អ្នកគ្រូ សិក្សានុសិស្ស នៅទីតាំងក្នុងវិទ្យាល័យទេពប្រណម ក្នុងភូមិសាស្ត្រស្រុកពញាឮ ខេត្តកណ្ដាល គឺពិតជាទីតាំងមួយ ដ៏ល្អបំផុត ដែលអាចបញ្ជាក់អំពីប្រវត្តិសាស្ត្ររបស់ប្រទេសកម្ពុជាឲ្យដល់ប្រតិភូពីប្រទេស ឡាវ-វៀតណាម បានយល់បានដឹងអំពីកំណរកំណើតទឹកដី ដែលជាទីក្រុងដ៏ចំណាស់តាំងពីសម័យបុរាណរបស់កម្ពុជា ដែលអាចទាក់ទាញទាំងផ្នែកទេសចរណ៍បរទេស ឲ្យស្គាល់តំបន់នេះ កាន់តែច្បាស់ និងម្យ៉ាងក៍ដើម្បីផ្សារភ្ជាប់ពីការរឹតចំណងសាមគ្គីភាព មិត្តភាព កិច្ចសហប្រតិបត្តិការ រវាងរដ្ឋាភិបាល កងទ័ព និងប្រជាជនប្រទេសទាំងបីកម្ពុជា-ឡាវ-វៀតណាម ដែលមានទំនាក់ទំនងនិងគ្នាយ៉ាងស្អិតរមួត ជាបងប្អូន ប្រទេសភូមិផងរបងជាប់គ្នា ដែលតាំងពីយូរលង់ណាស់មកហើយ តែងតែបានផ្សារភ្ជាប់ និងចេះជួយគ្នាគ្រប់កាលៈទេសៈនៃការលំបាក រហូតប្រទេសជាតិមានឯករាជ្យ អធិបតេយ្យភាព ពិតប្រាកដ ក្រោមម្លប់នៃសន្តិភាព។
ឯកឧត្តម ឥត សារ៉ាត់ បានបញ្ជាក់ថា៖ ក្នុងលំហាត់សមយុទ្ធរួមគ្នានេះ គណៈកម្មការជំនាញបានរៀបចំកម្លាំងកងទ័ពទាំងបីប្រទេសចូលរួមសរុប ៦៨៧នាក់ ក្នុងនោះរួមមានកម្លាំងកងទ័ពកម្ពុជាចូលរួមក្នុងលំហាត់ ៥៦៣នាក់, កងទ័ពឡាវ ៦២នាក់ និងកងទ័ពប្រជាជនវៀតណាម ចូលរួមប្រមាណជា ៦២នាក់ផងដែរ។ នាយឧត្តមសេនីយ៍ ឥត សារ៉ាត់ ក៏បានបញ្ជាក់ដែរថា៖ ការធ្វើលំហាត់សមយុទ្ធរួមគ្នាកងទ័ពទាំងបីប្រទេស កម្ពុជា-វៀតណាម-ឡាវ នាលើកនេះ គឺបានធ្វើឡើងក្រោយមានជំនួបថ្នាក់រដ្ឋមន្ត្រីការពារជាតិប្រទេសទាំងបី នៅទីក្រុងហាណូយប្រទេសវៀតណាម និងការធ្វើលំហាត់រួមគ្នាលើកទីមួយ រវាងកងទ័ពទាំងបីប្រទេស នៅទីក្រុងរៀនច័ន្ទប្រទេសឡាវ។ ឯកឧត្តមបញ្ជាក់ថា៖ ការធ្វើលំហាត់ហ្វឹកហ្វឺនរួមគ្នាទាំងបីប្រទេសកម្ពុជា វៀតណាម និងឡាវ នាឆ្នាំនេះ ដែលកម្ពុជាធ្វើជាម្ចាស់ផ្ទះ ក៏នឹងមានការរៀបចំខ្លឹមសារសមយុទ្ធ ជាកម្លាំងទ័ពពិត ធ្វើការចល័តតាមទីតាំងដោយផ្សារភ្ជាប់ និងស្ថានភាពជាក់ស្ដែង ព្រមទាំងបានបែងចែកជាដំណាក់កាលនីមួយៗ ទៅតាមភាពជាក់ស្ដែង។ គណៈកម្មការអន្តរក្រសួង សង្ឃឹមយ៉ាងមុតមាំថា កិច្ចដំណើរការផ្លូវការនៅពេលខាងមុខ និងទទួលបានលទ្ធផលដ៏ល្អប្រសើរ និងជោគជ័យ ៕
