នាព្រឹកថ្ងៃទី១៥ ខែតុលា ឆ្នាំ២០២៤ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញជាអធិបតី ក្នុងឱកាសអបអរសាទរខួបអនុស្សាវរីយ៍៣០ឆ្នាំ ថ្ងៃបង្កើតកងពលតូចលេខ៧០ (១៥ តុលា ឆ្នាំ១៩៩៤-១៥ តុលា ឆ្នាំ២០២៤) នៅទីបញ្ជាការកងពលតូចលេខ៧០។
សូមរំឭកថា៖ ផ្តើមចេញពីវរសេនាធំលេខ៧០ ត្រូវបានកែសម្រួលមកជាកងពលតូចថ្មើរជើងលេខ៧០ តាមអនុក្រឹត្យចុះថ្ងៃទី១៥ ខែតុលា ឆ្នាំ១៩៩៤ របស់រាជរដ្ឋាភិបាល ស្ថិតក្រោមការដឹកនាំបញ្ជាផ្ទាល់របស់អគ្គសេនាធិការ នៃកងយោធពលខេមរភូមិន្ទ ការនោះគឺ នាយឧត្តមសេនីយ៍ ម៉ៅ សុផាន់ ជាមេបញ្ជាការកងពល រហូតដល់ឆ្នាំ២០២៣។ នៅថ្ងៃទី៦ ខែកញ្ញា ឆ្នាំ២០១៨ ដើម្បីអនុវត្តផែនការកែទម្រង់កងយោធពលខេមរភូមិន្ទ កងពលតូចថ្មើរជើងលេខ៧០ ត្រូវបានផ្ទេរក្របខ័ណ្ឌពីអគ្គបញ្ជាការដ្ឋាន មកជំនួសផ្ទាល់បញ្ជាការដ្ឋានកងទ័ពជើងគោក និងបានកែសម្រួលឈ្មោះពីកងពលតូចថ្មើរជើងលេខ៧០ មកជាកងពលតូចលេខ៧០ តាមប្រកាសចុះថ្ងៃទី២៣ ខែឧសភា ឆ្នាំ២០១៩ របស់ក្រសួងការពារជាតិ។ ចាប់ពីថ្ងៃបង្កើតរហូតមកទល់បច្ចុប្បន្នកងពលតូចលេខ៧០ បានប្រឹងប្រែងព្យាយាមជម្នះរាល់ឧបសគ្គក្នុងការបំពេញភារៈកិច្ច សម្រេចបានស្នាដៃជាច្រើនក្នុងការកសាង និងពង្រឹងអង្គភាពរបស់ខ្លួនឲ្យបានរៀបរយ និងរីកចម្រើនរឹងមាំជាលំដាប់ រួមចំណែកក្នុងកិច្ចការពារបូរណភាពទឹកដី ការពារសន្តិសុខសុវត្ថិភាពជូនសង្គមជាតិបានល្អប្រសើរ ដោយក្នុងនោះជាអាទិ៍ កងពលតូចលេខ៧០បានយកចិត្តទុកដាក់ក្នុងការបណ្ដុះបណ្ដាលធនធានមនុស្ស កសាងហេដ្ឋារចនាសម្ព័ន្ធ សិក្សាតាមប្រព័ន្ធបច្ចេកវិទ្យាទំនើប និងខិតខំពង្រឹងពង្រីកទំនាក់ទំនងកិច្ចសហប្រតិបត្តិការជាមួយបណ្ដាប្រទេសជាមិត្ត ព្រមទាំងបានកសាងទីលានហ្វឹកហ្វឺនកម្រិតថ្នាក់ជាតិ បានចូលរួមការពាររាជធានីភ្នំពេញឲ្យមានសុខសុវត្ថិភាព និងបំពេញភារៈកិច្ចជាច្រើនទៀតទទួលបានលទ្ធផលគួរជាទីមោទនៈ។ ទន្ទឹមនឹងនោះកងពលតូចលេខ៧០ បានសហការជាមួយបណ្តាស្ថាប័នពាក់ព័ន្ធការពារសន្តិសុខ សណ្ដាប់ធ្នាប់សាធារណៈ ការពារសន្តិសុខក្នុងពិធីបុណ្យជាតិ អន្តរជាតិនានា ការពារឥស្សរជនថ្នាក់ដឹកនាំកំពូលរបស់ជាតិ និងគណៈប្រតិភូជាន់ខ្ពស់ប្រទេសជាមិត្ត ដែលបានអញ្ជើញមកបំពេញទស្សនកិច្ចនៅកម្ពុជា។
សម្ដេចបវរធិបតីនាយករដ្ឋមន្ត្រី បានវាយតម្លៃខ្ពស់ចំពោះវឌ្ឍនភាព និងការរីកចម្រើនរបស់កងពលតូចលេខ៧០ និងកោតសរសើរចំពោះសមត្ថភាព ការអនុវត្តតួនាទីភារកិច្ចដោយសម្រេចបាននូវស្នាដៃ និងសមិទ្ធផលធំៗជាច្រើន ក្នុងរយៈពេល៣០ឆ្នាំកន្លងទៅ។ សម្ដេចបវរធិបតីថ្លែងដែរថា៖ ក្នុងរយៈពេល៤៥ឆ្នាំមកនេះ ប្រទេសកម្ពុជាបាននិងកំពុងបោះជំហានទៅមុខប្រកបដោយសាមគ្គីភាព វីរភាព ភាពប្រាកដប្រជា និងតាមទិសដៅត្រឹមត្រូវ នេះជាបំណងប្រាថ្នាដ៏ពិសិដ្ឋរបស់ប្រជាជនកម្ពុជាគ្រប់រូប ហើយថាសន្តិភាពនៅតែមានតម្លៃមិនអាចកាត់ថ្លៃបាន ដូច្នេះត្រូវរួមគ្នារក្សាឲ្យបាននូវសុខសន្តិភាព ទោះក្នុងតម្លៃណាក៏ដោយ កុំឲ្យបាត់បង់។ ក្នុងនេះដែរសម្ដេចបវរធិបតីបានថ្លែងអំណរគុណសមត្ថកិច្ចពាក់ព័ន្ធទាំងអស់ ដែលបានចូលរួមអនុវត្តច្បាប់ក្នុងការការពារជាតិមិនឲ្យបែកបាក់ ដើម្បីស្ថេរភាពជូនប្រជាពលរដ្ឋ ហើយសុំបន្តស្មារតីទទួលខុសត្រូវនេះ។ សម្ដេចបវរធិបតី បានថ្លែងជំរុញនិងលើកទឹកចិត្តថា៖ កងយោធពលខេមរភូមិន្ទនិយាយរួម និងកងពលតូចលេខ៧០និយាយដោយឡែក ត្រូវបន្តការងារអភិវឌ្ឍសមត្ថភាពកងទ័ពឲ្យបានជាប់ជាប្រចាំ និងសេវាថែទាំព្យាបាលសុខភាព ត្រៀមកម្លាំងស្មារតីដោះស្រាយគ្រប់សភាពការណ៍ ជាពិសេសគ្រោះមហន្តរាយធម្មជាតិ ដែលអាចកើតឡើងជាយថាហេតុ និងបង្កឲ្យខូចខាតទ្រព្យសម្បត្តិប្រយោជន៍ជាតិ និងប្រជាជន។
ពីវេទិកានេះដែរ សម្ដេចនាយករដ្ឋមន្ត្រីបានថ្លែងអំណរគុណ និងវាយតម្លៃខ្ពស់ចំពោះកងទ័ពកម្ពុជា ដែលបំពេញការងារនៅក្រៅប្រទេស ក្រោមឆត្រអង្គការសហប្រជាជាតិ ដែលចាប់ពីឆ្នាំ២០០៥មកដល់ពេលនេះ កម្ពុជាបានបញ្ជូនទ័ពមួកខៀវជិតមួយម៉ឺននាក់ទៅក្នុង១០ប្រទេស ក្នុងនេះសម្ដេចបវរធិបតីបញ្ជាក់ថា៖ សម្ដេចបានកែរសម្រួលប្រធានក្រុមការងារបញ្ជូនកងទ័ពទៅក្រៅប្រទេស ដោយប្ដូរពីរដ្ឋមន្ត្រីក្រសួងការបរទេស មកជារដ្ឋមន្ត្រីក្រសួងការពារជាតិវិញ ហើយសម្ដេចណែនាំ ឯកឧត្តម ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ទៀ សីហា តាមដានឲ្យជាប់ជានិច្ចអំពីស្ថានភាពកងទ័ពមួកខៀវកម្ពុជានៅក្រៅប្រទេស។ បន្ថែមលើនេះទៀតដោយសង្កេតឃើញថា ចំនួនកងទ័ពដែលចូលនិវត្តន៍ច្រើនជាងចំនួនអ្នកដែលត្រូវរើសបំពេញមកវិញនោះ សម្ដេចអធិបតីនាយករដ្ឋមន្ត្រីបានផ្តល់គោលដៅចំពោះយោធិនដែលដាក់ចូលនិវត្តន៍ សូមយកចិត្តទុកដាក់ទៅដល់នាយទាហាន នាយទាហានរង ពលទាហានប្រភេទពីរ ដែលបាត់បង់សមត្ថភាពការងារ ចំពោះយោធិនជំនាញចាំបាច់ដែលនៅមានសុខភាពល្អគឺរក្សាទុកសិន ព្រោះកំពុងខ្វះនាយទាហានជំនាញ ទ័ពជំនាញជាច្រើន ដើម្បីបន្សាំនឹងបណ្តុះបណ្តាលអ្នកបន្តវេនដូចជា រថក្រោះ កាំភ្លើងធំ វិស្វកម្ម និងច្រើនជំនាញទៀត ដោយឡែកយោធិនដែលដល់អាយុតែនៅក្មេង ស័ក្តិមិនទាន់ឡើង ក៏សូមផ្អាកការចូលនិវត្តន៍សិនដែរ ព្រោះមិនទាន់រើសថ្មី។ ក្នុងបញ្ហានេះសម្ដេចក៏បានណែនាំឲ្យពិនិត្យមើលលក្ខខណ្ឌនៃការចូលនិវត្តន៍របស់យោធិន អាចដំឡើងអាយុដែលត្រូវចូលនិវត្តន៍ ៕
