កងពលតូចលេខ៧០ នៅថ្ងៃស្អែក នឹងប្រារព្ធខួបអនុស្សាវរីយ៍លើកទី៣០ បង្កើតកងពលតូចលេខ៧០ ថ្ងៃទី១៥ ខែតុលា ឆ្នាំ១៩៩៤ ដល់ថ្ងៃទី១៥ ខែតុលា ឆ្នាំ២០២៤។ កាលពីថ្ងៃទី១៣ ខែតុលា ឆ្នាំ២០២៤កន្លងទៅនេះ ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានអញ្ជើញចុះពិនិត្យការសាកល្បង នៃក្បួនព្យុហយាត្រាកងពលតូចលេខ៧០ ក្នុងឱកាសអបអរសាទរខួបអនុស្សាវរីយ៍លើកទី៣០ បង្កើតកងពលតូចលេខ៧០ ដោយមានប្រភពផ្ដើមចេញពីវរសេនាតូចលេខ៧១ មកទល់ពេលនេះ កងពលតូចលេខ៧០មានការវិវឌ្ឍឈានឡើងជាលំដាប់ ដោយកងពលបានការលំបាក តូចធំជាច្រើនរាប់មិនអស់ ក្នុងការបំពេញភារៈកិច្ចរបស់ខ្លួន ស្ដែងឡើងនូវការធ្វើពលិកម្មដ៏ធំធេងមិនខ្លាចនឿយហត់ របស់នាយទាហាន នាយទាហានរង និងពលទាហានគ្រប់រូប ក្នុងដំណាក់កាលនីមួយៗ ដើម្បីសម្រេចបាននូវបុព្វហេតុដ៏ពិសិដ្ឋ គឺការពារជាតិមាតុភូមិ និងប្រជាពលរដ្ឋជាទីស្នេហា។ ប្រពៃណីដ៏ល្អផូរផង់របស់កងពលតូច៧០ ដែលទទួលបានរហូតមកដល់ពេលនេះ គឺបានឆ្លងកាត់បទពិសោធន៍ និងស្នាដៃសម្រេចបានគឺ វរសេនាធំលេខ៧០ ត្រូវបានកែសម្រួលជាកងពលតូចថ្មើរជើងលេខ៧០ ស្ថិតក្រោមបញ្ជាផ្ទាល់របស់អគ្គសេនាធិការ តាមអនុក្រឹត្យលេខ៥១ ចុះថ្ងៃទី១៥ ខែតុលា ឆ្នាំ១៩៩៤ របស់រាជរដ្ឋាភិបាលកម្ពុជា។ កងពលតូចថ្មើរជើងលេខ៧០ ត្រូវបានផ្ទេរក្របខ័ណ្ឌពីអគ្គបញ្ជាការដ្ឋាន មកក្រោមចំណុះផ្ទាល់បញ្ជាការដ្ឋានកងទ័ពជើងគោក តាមប្រកាសលេខ២៥៤ ចុះថ្ងៃទី៧ ខែកញ្ញា ឆ្នាំ២០១៨ របស់ក្រសួងការពារជាតិ តាមផែនការកំណែទម្រង់កងយោធពលខេមរភូមិន្ទ ហើយបានកែសម្រួលឈ្មោះពីកងពលតូចថ្មើរជើងលេខ៧០ កងពលតូចលេខ៧០ តាមប្រកាសលេខ៥៤២ ចុះថ្ងៃទី២៣ ខែឧសភា ឆ្នាំ២០១៩ របស់ក្រសួងការពារជាតិ។
ឆ្លងកាត់សកម្មភាពបំពេញភារកិច្ចអស់រយៈពេល៣០ឆ្នាំកន្លងមក នាយទាហាន នាយទាហានរង និងពលទាហាន កងពលតូចលេខ៧០ ក្រោមការដឹកនាំបញ្ជារបស់ឯកឧត្តម នាយឧត្តមសេនីយ៍ ម៉ៅ សុផាន់ អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក និងជាអតីតមេបញ្ជាការកងពលតូចលេខ៧០ និងការដឹកនាំបន្តដោយឯកឧត្តម ឧត្តមសេនីយ៍ឯក ហែម ថា មេបញ្ជាការកងពលតូចលេខ៧០ នាពេលបច្ចុប្បន្ន ព្រមទាំងមេបញ្ជាការរងគ្រប់ជាន់ថ្នាក់ បានខិតខំប្រឹងប្រែងបំពេញភារកិច្ចស្នូល ប្រកបដោយប្រសិទ្ធភាពតាមបទបញ្ជារបស់រាជរដ្ឋាភិបាល ក្រសួងការពារជាតិ អគ្គបញ្ជាការ និងបញ្ជាការដ្ឋានកងទ័ពជើងគោកប្រគល់ជូន និងបានពង្រឹងភាពម្ចាស់ការ ក្នុងស្មារតីស្នេហាជាតិ មានឆន្ទៈមោះមុត ក្នុងកិច្ចការពារធិបតេយ្យ បូរណភាពទឹកដី ថែរក្សាសុខសន្តិភាព ស្ថិរភាពនយោបាយ ជូនជាតិមាតុភូមិ និងប្រជាជន កសាងអង្គភាពរបស់ខ្លួនរឹងមាំលើគ្រប់វិស័យ។ ក្នុងបេសកកម្មបម្រើប្រទេសជាតិ និងប្រជាជន មេបញ្ជាការកងពលតូច តែងតែប្រកាសយ៉ាងដាច់ណាត់ថា ប្ដេជ្ញាវាយកម្ទេចរាល់ការឃុបឃិត ប៉ុនប៉ងបំផ្លាញសន្តិភាព ឧបាយកល បង្កើតឲ្យមានបដិវត្តន៍ពណ៌លើទឹកដីកម្ពុជា និងប្រឆាំងដាច់ខាតចំពោះការជ្រៀតពីមជ្ឈដ្ឋានខាងក្រៅ។ នាយទាហាន នាយទាហានរង និងពលទាហាន កងពលតូចលេខ៧០ មានចិត្តស្មោះត្រង់ដាច់ខាតចំពោះជាតិ សាសនា ព្រះមហាក្សត្រ និងប្ដេជ្ញាការពាររដ្ឋធម្មនុញ្ញ ការពារព្រះមហាក្សត្រ ការពាររាជរដ្ឋាភិបាលស្របច្បាប់ ការពារសុខសន្តិភាព អធិបតេយ្យភាព បូរណភាពទឹកដី ឲ្យបានស្ថិតស្ថេររឹងមាំជាអមតៈ។
ក្នុងរយៈពេល៣០ឆ្នាំកន្លងមកនេះ កងពលតូចលេខ៧០ សម្រេចបាននូវសមិទ្ធផលធំៗជាច្រើន លើការកសាងអង្គភាពជំរំជម្រកស្នាក់នៅរបស់កងទ័ព អគារមន្ទីរពេទ្យ ឃ្លាំងដាក់សម្ភារៈ គ្រឿងដាក់រថយន្ត រថពាសដែក រោងដាក់រថយន្ត រថពាសដែក រថក្រោះ អគារផ្ទះបាយ ផ្លូវចាក់បេតុង និងផ្លូវក្រាលកៅស៊ូខ្វាត់ខ្វែង សំណង់អគារ និងទីលានហ្វឹកហ្វឺនបាញ់គ្រាប់ពិតសម្រាប់ធ្វើសមយុទ្ធ ដែលមានមូលដ្ឋាននៅភ្នំធំម្រះព្រៅ ក្នុងខេត្តកំពង់ស្ពឺ និងសាលាហ្វឹកហ្វឺនតេជោសែនជុំគិរី ស្ថិតនៅស្រុកជុំគិរី ខេត្តកំពត។ ក្រោមការយកចិត្តទុកដាក់ និងជួយឧបត្ថម្ភពី សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងការជួយឧបត្ថម្ភពី សម្តេចមហាបវរអធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ព្រមទាំងការជួយឧបត្ថម្ភពីសប្បុរសជន និងប្រទេសជាមិត្ត ក្នុងរយៈពេល៣០ឆ្នាំកន្លងមកនេះ កងពលបានពង្រីកការកសាងទាំងនៅក្នុងទីបញ្ជាការកងពល មានទីតាំងនៅចោមចៅ រាជធានីភ្នំពេញ និងនៅតាមបណ្ដាវរសេនាតូចរបស់កងពល ដែលបោះទីតាំងនៅតាមបណ្ដាខេត្តនានា។ ទន្ទឹមនឹងនេះ ជាមួយនេះដោយមានការជួយជ្រោមជ្រែងបន្ថែមនូវការគាំទ្រពីបណ្ដាប្រទេសជាមិត្ត ធ្វើឲ្យកងពលតូចលេខ៧០ ក្លាយជាកងទ័ពជំនាញមួយរបស់កងយោធពលខេមរភូមិន្ទ ដែលត្រូវបានលើកកម្ពស់សមត្ថភាពជាប្រចាំ ហើយមានសមត្ថភាពឯកទេសជំនាញច្រើន ដែលអាចនឹងបំពេញកិច្ចការពារបូរណភាពទឹកដីបានយ៉ាងពេញលេញ មានកិច្ចសហប្រតិបត្តិការជាតិ អន្តរជាតិ ដែលសម្រេចបាននូវសមិទ្ធផលយ៉ាងច្រើនគួរឲ្យកត់សម្គាល់ ៕
