កាលពីរសៀលថ្ងៃទី២៦ ខែកញ្ញា ឆ្នាំ២០២៤ នៅទីស្ដីការក្រសួងការពារជាតិ បានប្រជុំត្រួតពិនិត្យវឌ្ឍនភាពការងារ របស់គណៈកម្មការអន្តរក្រសួង ដើម្បីរៀបចំកិច្ចប្រជុំប្រចាំឆ្នាំ ថ្នាក់រដ្ឋមន្ត្រីការពារជាតិ និងធ្វើលំហាត់សមយុទ្ធរួម រវាងកងទ័ពបីប្រទេសកម្ពុជា-ឡាវ-វៀតណាម នៅព្រះរាជាណាចក្រកម្ពុជា ក្រោមអធិបតីភាព ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មការអន្តរក្រសួង។
នៅក្នុងឱកាសនោះ ឯកឧត្តម ឧត្តមសេនីយ៍ឯក ខៀវ ឆេន រដ្ឋលេខាធិការក្រសួងការពារជាតិ សមាជិកគណៈកម្មការអន្តរក្រសួង និងជាប្រធានលេខាធិការដ្ឋាន បានអានសេចក្ដីសម្រេចរបស់រាជរដ្ឋាភិបាលស្ដីពី ការបង្កើតគណៈកម្មការអន្តរក្រសួង ដើម្បីរៀបចំកិច្ចប្រជុំប្រចាំឆ្នាំ ថ្នាក់រដ្ឋមន្ត្រីការពារជាតិ និងធ្វើលំហាត់សមយុទ្ធរួម រវាងកងទ័ពបីប្រទេសកម្ពុជា-ឡាវ-វៀតណាម នៅព្រះរាជាណាចក្រកម្ពុជា ដែលនៅក្នុងសេចក្ដីសម្រេចរបស់រាជរដ្ឋាភិបាល បានប្រកាសតែងតាំង នាយឧត្តមសេនីយ៍ ទៀ សីហា ឧបកនាយករដ្ឋមន្ត្រី រដ្ឋមន្ត្រីក្រសួងការពារជាតិ ជាប្រធានគណៈកម្មការអន្តរក្រសួង និងអនុប្រធានចំនួន៧រូប ព្រមទាំងសមាជិកគណៈកម្មការអន្តរក្រសួងចំនួន៣០រូប។
បន្ទាប់មក ឯកឧត្តម នាយឧត្តមសេនីយ៍ ឥត សារ៉ាត់ អគ្គមេបញ្ជាការរង នាយសេនាធិការចម្រុះនៃកងយោធពលខេមរភូមិន្ទ និងជាអនុប្រធានប្រចាំការគណៈកម្មការអន្តរក្រសួង បានរាយការណ៍ក្នុងកិច្ចប្រជុំ នៅរបាយការណ៍សេចក្ដីសង្ខេបស្ដីពី សកម្មភាពការងារ និងទិសដៅអនុវត្តបន្តរបស់លេខាធិការដ្ឋាន និងអនុគណៈកម្មការជំនាញពាក់ព័ន្ធ នៃគណៈកម្មការអន្តរក្រសួង ដែលបានអនុវត្តភារកិច្ចរបស់ខ្លួន ក្នុងពេលកន្លងមកដូចជា៖ ការងារពិធីការ, ការងាររៀបចំផែនការធ្វើលំហាត់សមយុទ្ធ, ការងាររៀបចំខ្លឹមសារកម្មវិធីកីឡា សិល្បៈ ការផ្សព្វផ្សាយព័ត៌មាន, ការងារធានា, ការងារការពារសន្តិសុខ និងការចុះទៅពិនិត្យទីតាំងសម្រាប់ធ្វើលំហាត់សមយុទ្ធ។ ក្នុងឱកាសនោះដែរ កិច្ចប្រជុំក៏បានធ្វើការពិភាក្សា នៅបានឆ្លងឡូហ្គោកិច្ចប្រជុំប្រចាំឆ្នាំ ថ្នាក់រដ្ឋមន្ត្រីការពារជាតិ និងធ្វើលំហាត់សមយុទ្ធរួម រវាងកងទ័ពបីប្រទេសកម្ពុជា-ឡាវ-វៀតណាម នៅព្រះរាជាណាចក្រកម្ពុជាផងដែរ។
មានមតិបូកសរុបកិច្ចប្រជុំ ឯកឧត្តម នាយឧត្តមសេនីយ៍ ទៀ សីហា ឧបកនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មការអន្តរក្រសួង បានកោតសរសើរ និងវាយតម្លៃខ្ពស់ ចំពោះអនុគណៈកម្មការជំនាញពាក់ព័ន្ធ នៃគណៈកម្មការអន្តរក្រសួង ដែលបានខិតខំបំពេញការងារក្នុងពេលកន្លងមក។ ឯកឧត្តម នាយឧត្តមសេនីយ៍ ទៀ សីហា បានជំរុញឲ្យអនុគណៈជំនាញទាំងអស់ បន្តការសហការគ្នាជាមួយស្ថាប័នដែលមានការពាក់ព័ន្ធ ដើម្បីធ្វើជាធាតុចូល ក្នុងការរៀបចំកិច្ចប្រជុំប្រចាំឆ្នាំ ថ្នាក់រដ្ឋមន្ត្រីការពារជាតិ និងធ្វើលំហាត់សមយុទ្ធរួម រវាងកងទ័ពបីប្រទេសកម្ពុជា-ឡាវ-វៀតណាម នៅព្រះរាជាណាចក្រកម្ពុជា ឲ្យបានសម្រេចជោគជ័យ ៕
