ឯកឧត្ដម នាយឧត្ដមសេនីយ៍ ឃឹម ប៊ុនសុង រដ្ឋលេខាធិការក្រសួងការពារជាតិ កាលពីព្រឹកថ្ងៃទី២៦ ខែកញ្ញា ឆ្នាំ២០២៤ បានដឹកនាំប្រតិភូអញ្ជើញចុះសាកសួរសុខទុក្ខបងប្អូននាយទាហាន នាយទាហានរង និងពលទាហាន នៅក្នុងឱកាសដែលប្រជាពលរដ្ឋខ្មែរកាន់សាសនាព្រះពុទ្ធ ប្រារព្ធធ្វើបុណ្យភ្ជុំបិណ្ឌ ប្រពៃណីខ្មែរនៅមជ្ឈមណ្ឌលអភិវឌ្ឍន៍យោធិនពិការ សម្តេចតេជោហ៊ុនសែនគូលែន៣១៧ ខេត្តសៀមរាប ចំនួន២៩៣គ្រួសារ។
បន្ទាប់ពីកិច្ចស្វាគមន៍របស់ ឯកឧត្តម ឧត្តមសេនីយ៍ឯក ពៅ ស៊ា នាយកមជ្ឈមណ្ឌលអភិវឌ្ឍន៍យោធិនពិការ សម្ដេចតេជោហ៊ុនសែនគូលែន៣១៧សៀមរាបរួចមក ក្នុងនាមឯកឧត្តម ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ឯកឧត្ដម ឃឹម ប៊ុនសុង បាននាំនូវការផ្ដាំផ្ញើសាកសួរសុខទុក្ខ ពីសំណាក់ប្រមុខថ្នាក់ដឹកនាំ ដែលជានិច្ចកាលតែងតែគិតគូរពីសុខទុក្ខ និងជីវភាពរស់នៅរបស់យោធិន នាយទាហាន នាយទាហានរង និងពលទាហាន នៃកងយោធពលខេមរភូមិន្ទ ជាពិសេសក្នុងមជ្ឈមណ្ឌលអភិវឌ្ឍន៍យោធិនពិការ សម្តេចតេជោហ៊ុនសែនគូលែន៣១៧ ខេត្តសៀមរាបទាំងអស់ នៅក្នុងរដូវបុណ្យទានប្រពៃណីជាតិ ក៏ដូចជាពិធីបុណ្យជាតិ រាជរដ្ឋាភិបាលកម្ពុជា ក៏ដូចជាគណៈប្រតិភូក្រសួងការពារជាតិ និងអាជ្ញាធរគ្រប់លំដាប់ថ្នាក់ តែងតែចុះមកសួរសុខទុក្ខដល់បងប្អូនយោធិនពិការ បាត់បង់សុពលភាពការងារ និងយោធិននិវត្ត នៅតាមមជ្ឈមណ្ឌលអភិវឌ្ឍន៍យោធិនពិការ ក៏ដូចនៅតាមបណ្ដាកងពល និងអង្គភាពផងដែរ។ ឯកឧត្ដម បានថ្លែងអំណរគុណចំពោះយោធិន គ្រួសារយោធិនពិការ ដែលបានលះបង់ប្តី និងសមាជិកគ្រួសារ ក្នុងបុព្វហេតុការពារជាតិមាតុភូមិ, ថ្នាក់ដឹកនាំគ្រប់ជាន់ថ្នាក់តែងតែដឹងគុណជានិច្ច ចំពោះវីរៈភាពដ៏អង់អាចក្លាហានរបស់យោធិនពិការ ដែលបានលះបង់សាច់ឈាម ដើម្បីបុព្វហេតុជាតិ និងមាតុភូមិដោយគុណបំណាច់ទាំងនេះ សម្ដេចតេជោ និង សម្តេចកិត្តិព្រឹទ្ធបណ្ឌិត ផ្តល់នូវអ្វីៗទាំងអស់គ្រប់បែបយ៉ាង ដើម្បីលើកស្ទួយជីវភាពរស់នៅរបស់យោធិនពិការ ព្រមទាំងក្រុមគ្រួសាររបស់យោធិនពិការ កាន់តែប្រសើរពីមួយថ្ងៃទៅមួយថ្ងៃ។ ឯកឧត្តម ក៏បានធ្វើការផ្ដាំផ្ញើដល់យោធិនពិការទាំងអស់ ត្រូវខិតខំថែរក្សាសុខភាព និងសំខាន់ចូលរួមក្នុងការបង្ការទប់ស្កាត់ជំងឺផ្សេងៗ។
នៅក្នុងឱកាសនោះ ឯកឧត្ដម ឃឹម ប៊ុនសុង បាននាំយកអំណោយ និងថវិការបស់ ឯកឧត្តម ទៀ សីហា ចែកជូនដល់យោធិនពិការ និងគ្រួសារចំនួន២៦៦គ្រួសារ, គ្រូបង្រៀនចំនួន២៥គ្រួសារ, ពេទ្យឆ្មបចំនួន២គ្រួសារ, សរុបចំនួន២៩៣គ្រួសារ ដោយក្នុងមួយគ្រួសារទទួលបានឃាត១កញ្ចប់ មានមី ត្រីខ ស្ករស ទឹកដោះគោ និងថវិកា៣ម៉ឺនរៀល និងបានប្រគល់ថវិកាជួនដល់មជ្ឈមណ្ឌលអភិវឌ្ឍន៍យោធិនពិការ៣១៧គូលេន សៀមរាប ចំនួន៣លានរៀលផងដែរ ៕
