ឯកឧត្តម ឧត្តមសេនីយ៍ឯក លី កុសល រដ្ឋលេខាធិការ ក្រសួងការពារជាតិ បានថ្លែងថា៖ “គ្រូពេទ្យពូកែ អ្នកជម្ងឺឆាប់ជា”។ ឯកឧត្តម លី កុសល បានថ្លែងដូច្នេះក្នុងពិធីចុះសួរសុខទុក្ខ និងចែកអំណោយដល់យោធិនរបួស ជំងឺ នៅមន្ទីរពេទ្យព្រះកេតុមាលា ក្នុងឱកាសបុណ្យភ្ជុំបិណ្ឌប្រពៃណីជាតិខ្មែរ នាព្រឹកថ្ងៃទី២៥ ខែកញ្ញា ឆ្នាំ២០២៤។ ឯកឧត្តម បន្តថា៖ ជាទូទៅអ្នកជម្ងឺ តែងតែស្វែងរកគ្រូពេទ្យដែលពូកែព្យាបាល ធ្វើឲ្យជម្ងឺរបស់គាត់ឆាប់ជាសះស្បើយ ឆាប់បានវិលត្រឡប់ទៅលំនៅដ្ឋានរបស់ពួកគាត់វិញ។ ដូចនេះគាត់មិនត្រឹមតែខិតខំរកប្រាក់មកចំណាយលើសេវាព្យាបាលដោយចិត្តរីករាយប៉ុណ្ណោះទេ ថែមទាំងថ្លែងអំណរគុណដោយក្តីស្រលាញ់ និងជួយផ្សព្វផ្សាយដល់មហាជន ឬក្រុមគ្រួសារគាត់បានដឹងពីសមត្ថភាពគ្រូពេទ្យល្អទៀតផង។ ក្នុងនាមក្រសួងការពារជាតិ, ឯកឧត្តម លី កុសល បានពាំនាំនូវប្រសាសន៍ផ្តាំផ្ញើសួរសុខទុក្ខពី ឯកឧត្តម នាយឧត្តមសេនីយ៍ ឧបនាយករដ្ឋមន្ត្រី និងពរជ័យ ជូនចំពោះបងប្អូនយុទ្ធជម្ងឺ លោកវេជ្ជបណ្ឌិត លោកគ្រូ អ្នកគ្រូពេទ្យ ព្រមទាំងថ្នាក់ដឹកនាំ និងយោធិនទាំងអស់ក្នុងមន្ទីរពេទ្យ សូមមានសុខភាពល្អ និងទទួលបានជ័យជម្នះគ្រប់ភារកិច្ច។
ឯកឧត្តម បានគូសបញ្ជាក់ថា៖ កងទ័ពគឺជាកម្លាំងស្នួលចាំបាច់បំផុត ក្នុងខឿនការពារប្រទេសជាតិ មាតុភូមិ និងបូរណភាពទឹកដី មិនអាចខ្វះបាន។ កន្លងមកប្រទេសកម្ពុជាយើងបានធ្លាក់ក្នុងភ្លើងសង្គ្រាមដ៏រ៉ាំរ៉ៃ ចាប់តាំងពីទសវត្សរ៍ទី៦០ រហូតដល់ទសវត្សរ៍ទី៧០ ស្ថិតក្នុងរបប លន់ នល់ មិនយូរប៉ុន្មានក្នុងឆ្នាំ១៩៧៥ ដល់ឆ្នាំ១៩៧៩ របបប្រល័យពូជសាសន៍ ប៉ុល ពត ក៏ចូលមកដល់ធ្វើអោយកម្ពុជាត្រូវបែកបាក់ខ្ទេចខ្ទី ទាំងរចនាសម្ព័ន្ធចាត់តាំង ទាំងជីវិតរស់នៅរបស់ប្រជាជនស្លូតត្រង់ ត្រូវបានសម្លាប់ចោលរាប់លាននាក់ដោយឥតធម៌មេត្តា។ ក្រោយថ្ងៃ៧ មករា ឆ្នាំ១៩៧៩ ទឹកដីកម្ពុជាមួយភាគធំត្រូវបានរំដោះក៏ពិតមែន ប៉ុន្តែសង្គ្រាមផ្ទៃក្នុងនៅតែបន្តជាមួយភាគីខ្មែរក្រហម រហូតដល់ឆ្នាំ១៩៩៨ ទើបយើងទទួលបានសន្តិភាពទាំងស្រុង។ សន្តិភាពដែលទទួលបានមកនេះ គឺកើតចេញពីកម្លាំងមហាសាមគ្គីភាព ការបង្រួបបង្រួមជាតិតែមួយ ក្រោមគោលនយោបាយឈ្នះឈ្នះ របស់អគ្គមគ្គុទ្ទេសដ៏ឆ្នើមបំផុតនៃយើងគឺ សម្តេចតេជោ ហ៊ុន សែន រួមជាមួយ និងប្រតិបត្តិករនយោបាយឈ្នះឈ្នះ ដែលនាំមកនូវសន្តិភាព និងការឯកភាពជាតិពេញលេញ ព្រមទាំងមានការចូលរួមពីបងប្អូនយុទ្ធមិត្តទាំងអស់ បានបូជាទាំងកម្លាំងកាយចិត្ត សាច់ស្រស់ឈាមស្រស់ ដើម្បីបុព្វហេតុការពារជាតិ មាតុភូមិដ៏បវររុងរឿងរបស់យើងទាំងអស់គ្នា។ កិច្ចការពារថែរក្សាសន្តិភាព និងការអភិវឌ្ឍន៍កំពុងដំណើរការណ៍យ៉ាងសកម្មឆ្ពោះទៅមុខដោយរលូន ក្រោមការដឹកនាំប្រកបដោយថាមពល និងភាពវៃឆ្លាតរបស់ សម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។
យោងតាមរបាយការណ៍របស់ ឧត្តមសេនីយ៍ឯក លី សុវណ្ណ នាយកមន្ទីរពេទ្យព្រះកេតុមាលា បានបង្ហាញឲ្យឃើញថា៖ ទាំងថ្នាក់ដឹកនាំ ក៏ដូចជាបុគ្គលិកមន្ទីរពេទ្យ បានយកអស់ស្មារតីទទួលខុសត្រូវរបស់ខ្លួន ខិតខំបំពេញភារកិច្ចប្រកបដោយភាពទន់ភ្លន់ និងមានជំនាញវិជ្ជាជីវៈខ្ពស់ ក្នុងការពិនិត្យព្យាបាល និងថែទាំអ្នកជម្ងឺ។ មិនតែប៉ុណ្ណោះបានបន្តធ្វើការកសាងហេដ្ឋារចនាសម្ព័ន្ធ សំណង់ អាគារ ថ្មីមួយចំនួនថែមទៀត ដើម្បីឆ្លើយតបទៅនឹងសេចក្តីត្រូវការចាំបាច់ នៃបរិមាណអ្នកជម្ងឺ ដែលចេះតែកើនឡើងជាបន្តបន្ទាប់។ ទន្ទឹមនឹងនេះក្រសួងការពារជាតិ ក៏បានបំពាក់សម្ភារៈបរិក្ខារពេទ្យទំនើបៗបន្ថែមមួយចំនួន ដែលជាជំនួយរបស់ប្រទេសជាមិត្តផង និងទិញបំពាក់ដោយផ្ទាល់ផង ដើម្បីបង្កើននិងពង្រឹងកម្រិតសមត្ថភាពបច្ចេកទេសព្យាបាលជម្ងឺ ឲ្យកាន់តែមានប្រសិទ្ធភាពខ្ពស់។
ក្នុងខណៈនោះ ឯកឧត្តម លី កុសល បានផ្តាំផ្ញើដល់លោកគ្រូ អ្នកគ្រូពេទ្យ ក៏ដូចជាថ្នាក់ដឹកនាំ និងបុគ្គលិកបម្រើការទាំងអស់ ក្នុងមន្ទីរពេទ្យព្រះកេតុមាលា ត្រូវខិតខំគោរពរក្សាឲ្យបានល្អនូវក្រមសីលធម៌ វិជ្ជាជីវៈ របស់ខ្លួនក្នុងនាមជាគ្រូពេទ្យ។ ត្រូវមានអាកប្បកិរិយា អត្តចរិក កាយវិការទន់ភ្លន់ សំដីសុភាពរាបសា សីលធម៌ល្អ ក្នុងការទំនាក់ទំនងផ្ទាល់ជាមួយអ្នកជម្ងឺ ក៏ដូចជាមហាជន ប្រជាជនផងដែរ។ ជាមួយគ្នានេះ ឯកឧត្តម លី កុសល បានពាំនាំមកនូវអំណោយរបស់ ឯកឧត្តម ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ មានថវិកា៣លានរៀល ជូនមន្ទីរពេទ្យព្រះកេតុមាលា និងអំណោយជូនយោធិនជម្ងឺចំនួន ៣០៧នាក់ ដែលក្នុងម្នាក់ៗទទួលបានមាន មី ត្រីខ ស្ករស ទឹកដោះគោ និងថវិកា៣ម៉ឺនរៀលផងដែរ ៕
