នាយឧត្តមសេនីយ៍ ឥត សារ៉ាត់ អគ្គមេបញ្ជាការរង នាយសេនាធិការចំរុះនៃកងយោធពលខេមរភូមិន្ទ និងជាអនុប្រធានប្រចាំការគណៈកម្មការអន្តរក្រសួង ដើម្បីរៀបចំកិច្ចប្រជុំប្រចាំឆ្នាំថ្នាក់រដ្ឋមន្ត្រីការពារជាតិ និងធ្វើលំហាត់សមយុទ្ធរួម រវាងកងទ័ពបីប្រទេស កម្ពុជា ឡាវ វៀតណាម នៅព្រះរាជាណាចក្រកម្ពុជា អមដំណើរដោយមន្ត្រីយោធាជាន់ខ្ពស់ក្នុងក្រសួងការពារជាតិ អគ្គបញ្ជាការ នៃកងយោធពលខេមរភូមិន្ទជាច្រើនរូប កាលពីព្រឹកថ្ងៃទី២៣ ខែកញ្ញា ឆ្នាំ២០២៤ បានចុះពិនិត្យទីតាំងចំនួនបី ស្ថិតក្នុងភូមិសាស្ត្ររាជធានីភ្នំពេញ ខេត្តកណ្ដាល និងខេត្តកំពង់ឆ្នាំង ដើម្បីរៀបចំពិធីជំនួបសន្ទនាថ្នាក់រដ្ឋមន្ត្រីការពារជាតិប្រទេសទាំងបី កម្ពុជា-ឡាវ-វៀតណាម, ទីតាំងធ្វើលំហាត់ហ្វឹកហ្វឺនរួម ផ្នែកសង្គ្រោះគ្រោះមហន្តរាយ នៃការបាក់រលំអាគារ-សុខាភិបាល-និងកីឡាយោធាស្ថិតក្នុងភូមិសាស្ត្រស្រុកសាមគ្គីមានជ័យខេត្តកំពង់ឆ្នាំង ក្នុងមជ្ឈមណ្ឌលហ្វឹកហ្វឺនកងរាជអាវុធហត្ថ ភ្នំជុំសែនរីករាយ, ទីតាំងនៃវិទ្យាល័យទេពប្រណម ឋិតក្នុងភូមិសាស្ត្រស្រុកពញាឮ ខេត្តកណ្ដាល។
សូមបញ្ជាក់ថា៖ លំហាត់ហ្វឹកហ្វឺនសមយុទ្ធរួមគ្នាកងទ័ពទាំងបីប្រទេសកម្ពុជា-វៀតណាម-ឡាវ សម្រាប់ឆ្នាំ ២០២៤ ដែលកម្ពុជាធ្វើជាម្ចាស់ផ្ទះក្នុងឆ្នាំនេះ បានជ្រើសរើសយកទីតាំងចំនួនបី ក្នុងភូមិសាស្ត្រមជ្ឈមណ្ឌលហ្វឹកហ្វឺនកងរាជវុធហត្ថ ក្នុងភូមិសាស្ត្រភ្នំជុំសែនរីករាយ សម្រាប់ធ្វើជាទីតាំងពិធីបើកធ្វើលំហាត់ និងបិទលំហាត់ ដែលនៅទីនោះរួមមាន ការរៀបចំលំហាត់ប្រតិបត្តិការសង្គ្រោះគ្រោះមហន្តរាយបាក់រលំអាគារ ប្រតិបត្តិការសុខាភិបាល និងការប្រកួតកីឡាប្រដាប់អាវុធ ជាលក្ខណៈមិត្តភាពកងទ័ពប្រទេសទាំងបី។ ដោយឡែកទីតាំងក្នុងវិទ្យាល័យទេពប្រណម ក្នុងភូមិសាស្ត្រស្រុកពញាឮ ខេត្តកណ្ដាល ជាទីតាំងមួយសម្រាប់ រដ្ឋមន្ត្រីការពារជាតិប្រទេសទាំងបី ប្រារព្ធពិធីជួបសំណេះសំណាលជាមួយប្រជាពលរដ្ឋ លោកគ្រូអ្នកគ្រូសិស្សានុសិស្ស នៅទីនោះ ដើម្បីផ្សារភ្ជាប់ពីការរឹតចំណងសាមគ្គីភាព មិត្តភាព កិច្ចសហប្រតិបត្តិការ រវាងរដ្ឋាភិបាល កងទ័ព និងប្រជាជនប្រទេសទាំងបី កម្ពុជា-ឡាវ-វៀតណាម ដែលមានទំនាក់ទំនងនិងគ្នាយ៉ាងស្អិតរមួតជាបងប្អូន ប្រទេសភូមិផងរបងជាប់គ្នា ដែលតាំងពីយូរលង់ណាស់មកហើយ តែងតែបានផ្សារភ្ជាប់ និងចេះជួយគ្នាគ្រប់កាលៈទេសៈ រហូតប្រទេសជាតិនីមួយៗ មានឯករាជ្យ អធិបតេយ្យភាព ពិតប្រាកដក្រោមម្លប់នៃសន្តិភាព។ ទន្ទឹមនឹងនេះដែរ គណៈកម្មការអន្តរក្រសួង ក៏បានរៀបចំទីតាំងមួយទៀតស្ថិតនៅក្នុងសណ្ឋាគារ ហ្គាឌែន ស៊ីធី (Garden City) សម្រាប់កិច្ចប្រជុំថ្នាក់រដ្ឋមន្ត្រីការពារជាតិប្រទេសទាំងបីផងដែរ។
ឧត្តមសេនីយ៍ទោ ប៉ែន សុក្រឹតវិទ្យា នាយកទីចាត់ការហ្វឹកហ្វឺន អគ្គបញ្ជាការ និងជាប្រធានក្រុមការងារដឹកនាំធ្វើលំហាត់ភាគីកម្ពុជា បានរាយការណ៍ថា ការធ្វើលំហាត់ហ្វឹកហ្វឺនសមយុទ្ធរួមគ្នា រវាងកងទ័ព៣ប្រទេស កម្ពុជា ឡាវ វៀតណាម ដែលកម្ពុជាធ្វើជាម្ចាស់ផ្ទះនាឆ្នាំនេះ មានរយៈពេល១៥ថ្ងៃ ដែលនឹងប្រព្រឹត្តទៅនៅក្នុងខែវិច្ឆិកា ឆ្នាំ២០២៤ ខាងមុខនេះ។ ការធ្វើលំហាត់ហ្វឹកហ្វឺនរួមគ្នាកម្ពុជា-ឡាវ-វៀតណាម នេះ នឹងបានផ្តល់ឱកាសដល់កងទ័ពប្រទេសទាំងបី ក្នុងការពង្រឹងទំនាក់ទំនងមិត្តភាព សាមគ្គីភាពជាប្រពៃណី ក្នុងនាមជាអ្នកជិតខាងល្អ។ ម្យ៉ាងវិញទៀត ការធ្វើលំហាត់នេះ ក៏ដើម្បីចែករំលែកចំណេះដឹង ចំណេះធ្វើ ការផ្លាស់ប្ដូរបទពិសោធន៍ពីគ្នាទៅវិញទៅមក ក៏ដូចជាបន្តកិច្ចសហប្រតិបត្តិការ រវាងរដ្ឋាភិបាល ក្រសួងការពារជាតិប្រទេសទាំងបី ដោយឈរលើស្មារតីគោរព ឯករាជ្យ អធិបតេយ្យ បូរណភាពទឹកដី តាមគោលការណ៍ស្មើភាព រក្សាផលប្រយោជន៍គ្នាទៅវិញទៅមក។ ឧត្តមសេនីយ៍ទោ ប៉ែន សុក្រឹតវិទ្យា បញ្ជាក់ថា នេះជាលើកទី២ហើយរបស់គណៈកម្មការដឹកនាំលំហាត់រួមគ្នា សម្រាប់កងទ័ពទាំងបីប្រទេស ដែលបានធ្វើលំហាត់ហ្វឹកហ្វឺនរួមគ្នា “លើសកម្មភាពនៃប្រតិបត្តិការសង្គ្រោះគ្រោះមហន្តរាយ ការបាក់រលំអាគារ ការងារសុខាភិបាល និងការលេងកីឡាយោធា ជាលក្ខណៈមិត្តភាព” ដែលលើកទីមួយបានប្រព្រឹត្តទៅ នៅទីក្រុងវៀងច័ន្ទ សាធារណរដ្ឋប្រជាធិបតេយ្យប្រជាមានិតឡាវ ដែលប្រទេសឡាវធ្វើជាម្ចាស់ផ្ទះ។
ក្នុងដំណើរចុះពិនិត្យទីតាំងធ្វើលំហាត់ហ្វឹកហ្វឺននាពេលនោះ នាយឧត្តមសេនីយ៍ ឥត សារ៉ាត បានរំលឹកដល់គណៈជំនាញគ្រប់ជំនាញ រួមសហការគ្នាអោយបានល្អ ក្នុងនោះត្រូវសហការជាមួយអាជ្ញាធរដែនដី ស្រុកខេត្ត ដែលមានការពាក់ព័ន្ធ និងត្រូវបង្កើនស្មារតីទទួលខុសត្រូវគ្រប់គ្រងសហការគ្នាឲ្យបានល្អ ក្នុងការរៀបចំទាំងទីតាំងហ្វឹកហាត់ ដើម្បីជំរុញឲ្យការធ្វើលំហាត់សមយុទ្ធរួមគ្នាកងទ័ពទាំងបីប្រទេសនេះ បានប្រព្រឹត្តទៅប្រកបដោយភាពរលូន និងជោគជ័យ។ ឯកឧត្តមបញ្ជាក់ថា ប្រសិនបើយើងរៀបចំលំហាត់នេះបានល្អ ក៏ជាមុខមាត់របស់រាជរដ្ឋាភិបាល កងទ័ព និងប្រជាជនរបស់យើងផងដែរ។ ហើយក៏ជាការទាក់ទាញលំហូរទេសចរណ៍ជាតិ អន្តរជាតិ ឱ្យមកកាន់ប្រទេសកម្ពុជាយើងកាន់តែច្រើនថែមទៀត ៕
