បន្ទាប់ពីបានដំណើរការអស់រយៈពេល៣ថ្ងៃរួចមក សិក្ខាសាលាស្ដីអំពីការលើកកម្ពស់ការយល់ដឹង និងកសាងការគាំទ្រសន្ធិសញ្ញាពាណិជ្ជកម្មអាវុធ នាព្រឹកថ្ងៃទី១៩ ខែកញ្ញា ឆ្នាំ២០២៤ នៅសណ្ឋាគារ Hyatt Regency ភ្នំពេញ ក្រោមអធិបតីភាព នាយឧត្តមសេនីយ៍ ចាយ សាំងយុន រដ្ឋលេខាធិការប្រចាំការក្រសួងការពារជាតិ។ សិក្ខាសាលានេះមានរយៈពេល៣ថ្ងៃ ពីថ្ងៃទី១៧ ដល់ថ្ងៃទី១៩ ខែកញ្ញា ឆ្នាំ២០២៤ រៀបចំដោយក្រសួងការពារជាតិ រួមសហការជាមួយនឹងអង្គការអេធីធី(ATT)។
នាយឧត្តមសេនីយ៍ ចាយ សាំងយុន រដ្ឋលេខាធិការប្រចាំការក្រសួងការពារជាតិ បានថ្លែងនូវការកោតសរសើរ និងវាយតម្លៃខ្ពស់ ចំពោះលទ្ធផលនៃអង្គសិក្ខាសាលា ដែលបានប្រព្រឹត្តទៅដោយរលូន និងប្រកបដោយផ្លែផ្កា បានបង្ហាញអំពីការខិតខំប្រឹងប្រែងយកចិត្តទុកដាក់ របស់អគ្គនាយកដ្ឋានសម្ភារៈបច្ចេកទេស ក្រសួងការពារជាតិ ដែលបានរួមសហការជាដៃគូដ៏សំខាន់ៗអន្តរជាតិ ដែលបានរៀបចំនូវអង្គសិក្ខាសាលានេះឡើង។ លិទ្ធផលសម្រេចបានទាំងនេះបានបង្ហាញអំពីការខិតខំរបស់យើង ដើម្បីរៀបចំនូវផែនការគ្រប់គ្រងអាវុធទៅមុខកាន់តែមានប្រសិទ្ធភាព។
ឯកឧត្ដម ចាយ សាំងយុន បានមានប្រសាសន៍ថា៖ តាមរយៈការចែករំលែកនូវបទពិសោធពីគ្នាទៅវិញទៅមក គឺធាតុចូលដ៏សំខាន់សម្រាប់ឯកឧត្តម លោកជំទាវ អស់លោក លោកស្រី ដែលមានការពាក់ព័ន្ធ ទទួលយល់ដឹងបានកាន់តែស៊ីជម្រៅគ្រប់ជ្រុងជ្រោយថែមទៀត នូវខ្លឹមសារ និងបទប្បញ្ញត្តិ នៃអនុសញ្ញាពាណិជ្ជកម្មអាវុធ ហើយបានចាត់ទុកថាអង្គសិក្ខាសាលានេះ មានសារៈសំខាន់សម្រាប់អនុវត្តសន្ធិសញ្ញាពាណិជ្ជកម្មអាវុធនាពេលខាងមុខនេះ។ នាយឧត្តមសេនីយ៍ ចាយ សាំងយុន បានលើកឡើងថា៖ សន្ធិសញ្ញាពាណិជ្ជកម្មអាវុធបានបង្កើតឡើង ដើម្បីពង្រឹងស្តង់ដារអន្តរជាតិទូទៅឲ្យបានខ្ពស់បំផុត សម្រាប់ការគ្រប់គ្រងនិងកែលម្អការធ្វើពាណិជ្ជកម្មអន្តរជាតិលើអាវុធសាមញ្ញ ទប់ស្កាត់ការជួញដូរលើអាវុធខុសច្បាប់ និងទប់ស្កាត់ការបង្វែរអាវុធនានា ក្នុងបំណងរួមចំណែកដល់សន្តិភាព សន្តិសុខ និងស្ថិរភាពនៅក្នុងតំបន់ និងអន្តរជាតិ សំដៅការកាត់បន្ថយការឈឺចាប់របស់មនុស្ស ដូច្នេះការលើកកម្ពស់កិច្ចសហប្រតិបត្តិការតម្លាភាព និងសកម្មភាពប្រកបដោយទំនួលខុសត្រូវរបស់រដ្ឋភាគី ក្នុងពាណិជ្ជកម្មអន្តរជាតិលើអាវុធសាមញ្ញ រួមចំណែកដ៏សំខាន់ក្នុងការពង្រឹងសន្តិភាព សន្តិសុខ និងអភិវឌ្ឍប្រកបដោយស្ថិរភាព និងវិបុលភាពជាសកល ៕
