ឯកឧត្តម នាយឧត្តមសេនីយ៍ ភួង ស៊ីផាន រដ្ឋលេខាធិការក្រសួងការពារជាតិ បានអនុញ្ញាតឱ្យគណៈប្រតិភូនាយទាហានជាន់ខ្ពស់ គ្រួសារសម្រាកបំប៉នសុខភាព ដឹកនាំដោយ លោកវរសេនីយ៍ឯក ឡេ សួនធីញ អតីតនាយរងសេនាធិការយោធភូមិភាគទី ៥ នៃកងទ័ពប្រជាជនវៀតណាម ចូលជួបសម្តែងការគួរសម ព្រឹកថ្ងៃទី១៨ ខែកញ្ញា ឆ្នាំ២០២៤ នៅទីស្ដីការក្រសួងការពារជាតិ។
ក្នុងជំនួបនោះ នាយឧត្តមសេនីយ៍ ភួង ស៊ីផាន បានស្វាគមន៍ និង បាននាំនូវការផ្តាំផ្ញើសួរសុខទុក្ខពីសំណាក់ សម្តេចតេជោ ហ៊ុន សែន ប្រធានព្រឹទ្ធសភាជាតិ និងជាប្រធានគណបក្សប្រជាជនកម្ពុជា និងការផ្ដាំសួរសុខទុក្ខ និងក្តីនឹករលឹកពីសំណាក់ សម្ដេចធិបតី ហ៊ុន ម៉ាណែត នាយករដ្ឋមន្ត្រី និងបណ្ដាំផ្ញើសាកសួរសុខទុក្ខពី ឯកឧត្តម ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងថ្នាក់ដឹកនាំក្រសួងការពារជាតិកម្ពុជា ជូនដល់ប្រតិភូ និងសមាជិកទាំងអស់ និងបានថ្លែងអំណរគុណចំពោះចំណងមិត្តភាព កិច្ច សហប្រតិបត្តិការ រវាងកម្ពុជា-វៀតណាម កាន់តែប្រសើរឡើងពីមួយថ្ងៃទៅមួយថ្ងៃ។ ក្នុងជំនួបនោះដែរ ភាគីទាំងពីរបានរំលឹកនូវអនុស្សាវរីយ៍ នៃការប្រកៀកស្មាគ្នាប្រយុទ្ធ ក្នុងការរំដោះប្រទេសជាតិចេញពីនឹមអាណានិគមនិយមបរទេស ពិសេសការប្រកៀកស្មាគ្នា វាយបណ្ដេញរបបកម្ពុជា ប្រជាធិបតេយ្យខ្មែរក្រហម ជួយរំដោះប្រជាជនកម្ពុជា ឲ្យរួចផុតពីរបបប្រល័យពូជសាសន៍ប៉ុលពតនាឆ្នាំ១៩៧៩។
ឯកឧត្តម ភួង ស៊ីផាន ក៏បានបញ្ជាក់ថា៖ «ប្រទេសកម្ពុជានាពេលនេះ ខុសពីពេលមុន ខណៈដែលសមមិត្ត បងៗ ជានាយទាហានជាន់ខ្ពស់ ឬក៏អតីតយុទ្ធជន បានមកជួយរំដោះកម្ពុជា ពីរបបប៉ុល ពត នាឆ្នាំ១៩៧៩។ បច្ចុប្បន្នកម្ពុជា ក្រោមការដឹកនាំដោយ សម្ដេចធិបតី ហ៊ុន ម៉ាណែត នាយករដ្ឋមន្ត្រីវ័យក្មេង បានដឹកនាំប្រទេសឲ្យមានការអភិវឌ្ឍន៍ និងមានភាពរីកចម្រើនលើគ្រប់វិស័យ ហើយការប្រែមុខម៉ាត់របស់កម្ពុជានាពេលនេះ ក៍មានការចូលរួមពីអតីតសមមិត្តបងៗ ដែលជាអតីតកម្មាភិបាល យុទ្ធជន ដែលបានបូជាសាច់ស្រស់ឈាមស្រស់ ពលីជីវិត ចូលរួមជួយរំដោះប្រទេសកម្ពុជាពីរបប ប៉ុល ពល កាលពីឆ្នាំ១៩៧៩ ផងដែរ។
មានមតិឆ្លើយតបវិញ លោកវរសេនីយ៍ឯក ឡេ សួនធីញ បានមានប្រសាសន៍ថា៖ ក្នុងដំណើរទស្សនកិច្ចនេះប្រតិភូរបស់លោក មានបំណងធ្វើទស្សនកិច្ចសិក្សាស្វែងយល់ ដើម្បីរំលឹកអនុស្សាវរីយ៍ចាស់ៗ នៅតំបន់មួយចំនួនក្នុងខេត្តពោធិសាត់, ខេត្តបាត់ដំបង, បន្ទាយមានជ័យ, និងក្រុងអង្គរ ខេត្តសៀមរាប។ ក្នុងនាមលោកតំណាងឲ្យ បក្សរដ្ឋាភិបាលកងទ័ព និងប្រជាជនវៀតណាម ពិសេសប្រតិភូនាយទាហានជាន់ខ្ពស់ អតីតនាយរងសេនាធិការយោធភូមិភាគទី ៥ កងទ័ពប្រជាជនវៀតណាម លោកវរសេនីយ៍ឯក ឡេ សួនធីញ សូមថ្លែងអំណរគុណដល់រាជរដ្ឋាភិបាល កងទ័ព និងប្រជាជនកម្ពុជា ដែលបានទទួលស្វាគមន៍ប្រកបដោយភាពកក់ក្តៅស្និទ្ធស្នាល ក្នុងអំឡុងពេលដែលគណៈប្រតិភូ មកបំពេញទស្សនកិច្ចបំប៉នសុខភាពនៅកម្ពុជានាលើកនេះ។ ក្នុងនាមតំណាងឲ្យបក្ស រដ្ឋាភិបាល កងទ័ព និងប្រជាជនវៀតណាម ពិសេសប្រតិភូគ្រួសារនាយទាហានជាន់ខ្ពស់យោធភូមិភាគទី ៥ កងទ័ពប្រជាជនវៀតណាម លោកសូមសន្យា និងបន្តថែរក្សាចំណងសាមគ្គីភាព មិត្តភាព វៀតណាម-កម្ពុជា ឲ្យនៅតែស្ថិតស្ថេរអមតៈ ជាបងប្អូនតែមួយ ដែលមិនមានអ្នកណា មកបំបែកបំបាក់បានឡើយ។ ៕
