ដើមី្បធានាបានសន្តិសុខ សុវត្ថិភាព តាមផ្លូវអាកាស ក្នុងតំបន់អាស៊ាន ដោយប្រទេសកម្ពុជា បានធ្វើជាម្ចាស់ផ្ទះ នៅក្នុងការរៀបចំកិច្ចប្រជុំសន្នីសីទ របស់មេបញ្ជាការកងទ័ពអាកាសអាស៊ានលើកទី២១ ត្រូវបានបើកដំណើរការជាផ្លូវការ លើទឹកដីប្រវត្តិសាស្ត្រខេត្តសៀមរាប នៅសាលសន្និសីទសុខាសៀមរាប នាព្រឹកថ្ងៃទី១៦ ខែកញ្ញា ឆ្នាំ២០២៤ ក្រោមអធិបតីភាព ឯកឧត្តម នាយឧត្តមសេនីយ៍ សឹង សំណាង អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងទ័ពអាកាស ក្នុងកិច្ចដឹកនាំប្រជុំ ដោយមានវត្តមាន ឯកឧត្តម អស់លោក លោកស្រី ជាមេបញ្ជាការកងទ័ពជើងអាកាស នៃសមាជិកអាស៊ាន រួមទាំងក្រុមការងារលេខាធិការដ្ឋានអាស៊ានផងដែរ។
សន្និសីទនេះធ្វើឡើងក្នុងគោលបំណងពង្រឹងចំណងសាមគ្គីភាព បង្កើនកិច្ចសហប្រតិបត្តិការសន្តិសុខផ្លូវអាកាសអាស៊ាន ចែករំលែក និងផ្តល់ព័ត៌មានដល់គ្នាទៅវិញទៅមក សំដៅពង្រឹងទំនាក់ទំនង សាមគ្គីភាព រួមគ្នាទប់ស្កាត់បទល្មើសរត់ពន្ធគ្រឿងញៀនតាមផ្លូវអាកាស ការជួញដូរមនុស្ស និងអំពើភេរវកម្ម តាមផ្លូវអាកាស។ លើសពីនេះសន្និសីទក៏បានលើកយកនូវយុទ្ធសាស្ត្រគន្លឺះល្អៗ ដើម្បីសម្របសម្រួលការហោះហើរទៅបណ្តាប្រទេសក្នុងតំបន់អាស៊ាន ជួបគ្រោះមហន្តរាយផ្សេងៗ ហើយស្នើសុំឱ្យមានការជួយសង្គ្រោះ ទ័ពអាកាសនៃប្រទេសអាស៊ាន និងជួយអន្តរាគមន៍សង្គ្រោះ និងដឹកជញ្ជូនជំនួយមនុស្សធម៌ តបតាមភាពចាំបាច់ និងទាន់ពេលវេលា។ អង្គសន្និសីទ ក៏ពិភាក្សាផ្តោតលើការអប់រំ និងបណ្តុះបណ្ដាលធនធានមនុស្ស សម្រាប់យុវជនបន្តវេននៃទ័ពអាកាស ធ្វើការផ្លាស់ប្តូរទស្សនកិច្ចទៅកាន់ប្រទេសក្នុងតំបន់ ដើម្បីសិក្សាដកស្រង់បទពិសោធន៍ទៅវិញទៅមក ចាប់ពីយុវជនបន្តវេនរហូតដល់ថ្នាក់ដឹកនាំនៃទ័ពអាកាស។
ក្នុងកិច្ចធ្វើសន្និសីទជាមួយ ឧត្តមសេនីយ៍ឯក គង់ មុនី មេបញ្ជាការរង និងជានាយសេនាធិការកងទ័ពអាកាស បានគូសបញ្ជាក់អំពីលទ្ធផលនៃកិច្ចប្រជុំសន្នីសីទអាស៊ានលើកទី២១ របស់មេបញ្ចាការកងទ័ពអាកាសអាស៊ាន ដោយបានគូសបញ្ជាក់ថា៖ នៅជារៀងរាល់ឆ្នាំ ប្រទេសសមាជិកអាស៊ាន បានធ្វើការប្តូរវេន ហើយក្នុងឆ្នាំ២០២៤នេះ ត្រូវបានកម្ពុជាយើងធ្វើជាម្ចាស់ផ្ទះ ក្នុងការរៀបចំកិច្ចប្រជុំសន្នីសីទកងទ័ពអាកាសអាស៊ាន លើកទី២១នេះ ហើយក៏ជាលើកទី២ផងដែរ របស់កងទ័ពអាកាសកម្ពុជា។ ឯកឧត្តម ក៏បានបញ្ជាក់ថា៖ សន្និសីទនេះមានសារៈសំខាន់ណាស់សម្រាប់ទ័ពអាកាសនៃប្រទេសតំបន់អាស៊ាន ព្រោះថាតាមរយៈសន្និសីទនេះ កងទ័ពអាកាសនឹងបន្តកិច្ចសហប្រតិបត្តិការ ចែករំលែកព័ត៌មាន រវាងគ្នានិងគ្នាអំពីសាមគ្គីភាពការសហការស្អិតរមួត ដើម្បីរក្សាបាននូវផ្ទៃមេឃប្រកបដោយស្ថិរភាព និងសន្តិភាព ក្នុងតំបន់អាស៊ានទាំងមូល ទោះជាក្នុងបរិបទបច្ចុប្បន្នមានការវិវត្ត និងភាពខុសប្លែកតាមតំបន់មួយចំនួនរបស់ពិភពលោកក្តី តែអាស៊ាននៅតែជាតំបន់ស្ថិតក្នុងស្ថិរភាព និងរួមសហការគ្នាល្អជានិច្ច។
ក្នុងកិច្ចប្រជុំនោះដែរ ក៏មានការចែករំលែកនូវបទពិសោធន៍ពីគ្នាទៅវិញទៅមក ក្នុងការសាមគ្គីភាព កិច្ចសហការល្អ និងស្អិតរមួត និងបានយូអង្វែង រវាងសមាជិកអាស៊ានទាំងអស់។ ឯកឧត្តម ក៏បានគូសបញ្ជាក់ផងដែរថា៖ នៅក្នុងកិច្ចប្រជុំសន្និសីទលើកទី២០ ត្រូវបានធ្វើនៅប្រទេសមីយ៉ាន់ម៉ា ហើយចំពោះការប្រមូលមតិមេបញ្ជាការកងទ័ពអាកាសអាស៊ានទាំងអស់ មិនបានពេញលេញនោះឡើយ ដោយអវត្តមានមេបញ្ជាការកងទ័ពអាកាស នៃប្រទេសមួយចំនួន នៃតំបន់ដែលបានអាក់ខានមិនបានចូលរួម។ និយាយដោយឡែក នៅប្រទេសកម្ពុជាកិច្ចប្រជុំសន្និសីទទទួលបានលទ្ធផលមួយរយភាគរយ ដែលមានប្រទេសសមាជិកអាស៊ានទាំងអស់ បានអញ្ជើញចូលរួមមតិយោបល់ និងបានធ្វើការឯកភាពគ្នាទៅលើប្រធានបទ ដែលកម្ពុជាយើងបានលើកឡើង និងបានជំរុញឱ្យខ្លឹមសារនៃប្រធានបទនេះ យកទៅអនុវត្តប្រកបដោយជោគជ័យទៀតផង ៕
