នាយឧត្តមសេនីយ៍ យន្ត មីន រដ្ឋលេខាធិការក្រសួងការពារជាតិ និងលោកជំទាវ បានអញ្ជើញវិលត្រឡប់មកដល់មាតុប្រទេសវិញ ប្រកបដោយសុវត្ថិភាព នារាត្រីថ្ងៃសុក្រ ទី១៣ ខែកញ្ញា ឆ្នាំ២០២៤ បន្ទាប់ពីបានអញ្ជើញចូលរួមនៅក្នុងកិច្ចប្រជុំកំពូលលើកទី២៤ ស្ដីពីការទទួលខុសត្រូវផ្នែកបញ្ញាសប្បនិមិត្ត(AI) ក្នុងវិស័យយោធាឆ្នាំ២០២៤ និងកិច្ចសន្ទនាការពារជាតិសេអ៊ូល ឆ្នាំ២០២៤ នៅទីក្រុងសេអ៊ូល សាធារណរដ្ឋកូរ៉េ។ សូមរំឭកថា៖ នាយឧត្តមសេនីយ៍ យន្ត មីន រដ្ឋលេខាធិការក្រសួងការពារជាតិ បានអញ្ជើញទៅកាន់សាធារណរដ្ឋកូរ៉េ កាលពីថ្ងៃទី០៧ ដល់ថ្ងៃទី១៣ ខែកញ្ញា តបតាមការអញ្ជើញរបស់ក្រសួងការពារជាតិ នៃសាធារណរដ្ឋកូរ៉េ។
នៅក្នុងឱកាសនោះ នាយឧត្តមសេនីយ៍ យន្ត មីន រដ្ឋលេខាធិការក្រសួងការពារជាតិ អមដោយឧត្តមសេនីយ៍ត្រី ផន ឫទ្ធីសក្តិ នាយករង នាយកដ្ឋានបញ្ជូនសារ ក្រសួងការពារជាតិ ក៏បានចូលរួមថ្លែងសុន្ទរកថាជាគន្លឹះ ក្នុងកិច្ចប្រជុំកំពូលលើកទី២៤ ស្តីពីការទទួលខុសត្រូវផ្នែកបញ្ញាសប្បនិមិត្តអេអាយ(AI) ក្នុងវិស័យយោធាឆ្នាំ២០២៤ផងដែរ។ កិច្ចសន្ទនានេះ បានរៀបចំឡើងជាលក្ខណៈកិច្ចពិភាក្សា ដែលមានវាគ្មិនមកពីបណ្ដានាយទាហានជាន់ខ្ពស់ដោយផ្ដោតសំខាន់លើកិច្ចការសន្តិភាព និងសន្តិសុខសកល ក្រោមប្រធានបទ៣ធំៗរួមមាន៖ ១)ការរារាំងសង្គ្រាម និងរក្សាសណ្ដាប់ធ្នាប់អន្តរជាតិ ដោយផ្អែកលើច្បាប់, ២)សេរីភាព សន្តិភាព និងវិបុលភាពក្នុងតំបន់ឥណ្ឌូប៉ាស៊ីហ្វិច និង ៣)ការដោះស្រាយវិបត្តិសន្តិសុខជាច្រើននៅក្នុងពិភពលោក ៕
