ក្នុងឱកាសនៃការចូលរួមវេទិកាប៉េកាំងសៀនសាន លើកទី១១ នៅរដ្ឋធានីប៉េកាំងសាធារណរដ្ឋប្រជាមានិតចិន ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ នៅរសៀលថ្ងៃទី១៣ ខែកញ្ញា ឆ្នាំ២០២៤ បានជួបពិភាក្សាការងាទ្វេភាគីជាមួយ ឯកឧត្តម នាយឧត្តមសេនីយ៍ ចាន់សាម៉ន ចាន់យ៉ាឡាត ឧបនាយករដ្ឋមន្រ្តី រដ្ឋមន្រ្តីក្រសួងការពារប្រទេស នៃសាធារណរដ្ឋប្រជាធិបតេយ្យប្រជាមានិតឡាវ។
នាយឧត្តមសេនីយ៍ ចាន់សាម៉ន ចាន់យ៉ាឡាត បានសម្ដែងការស្វាគមន៍យ៉ាងកក់ក្តៅចំពោះ ឯកឧត្តម ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ និងបានថ្លែងអំណរគុណឯកឧត្តម ឧបនាយករដ្ឋមន្រ្តី និងគណៈប្រតិភូកម្ពុជា ដែលបានចំណាយពេលដ៏មមារញឹកជួបពិភាក្សាការងារ ដើម្បីពង្រឹងកិច្ចសហប្រតិបត្តិការយោធាកម្ពុជា-ឡាវ ដែលនេះឆ្លុះបញ្ចាំងអំពីការជឿទុកចិត្ត និងភាពស្អិតរមួតរវាងប្រទេសទាំងពីរ ដែលតែងតែរៀបចំឱ្យមានកិច្ចសន្ទនារវាងគ្នា នៅស្ទើរគ្រប់វេទិកា។ នាយឧត្តមសេនីយ៍ ចាន់សាម៉ន ចាន់យ៉ាឡាត ក៏បានជម្រាបជូនអំពីការត្រៀមចូលរួមក្នុងកិច្ចប្រជុំប្រចាំឆ្នាំថ្នាក់រដ្ឋមន្រ្តីការពារជាតិ និងការធ្វើលំហាត់ហ្វឹកហ្វឺនរួមគ្នា រវាងកងទ័ព កម្ពុជា-ឡាវ-វៀតណាម នៅប្រទេសកម្ពុជាក្នុងខែវិច្ឆិកា ឆ្នាំ២០២៤ ខាងមុខ។ ជាមួយគ្នានោះ ឯកឧត្តម រដ្ឋមន្រ្តីការពារជាតិឡាវ ក៏បានលើកឡើងនូវសំណូមពរសំខាន់ៗ ដើម្បីពង្រឹងកិច្ចសហប្រតិបត្តិការកងទ័ពទាំងពីរ កម្ពុជា-ឡាវ លើវិស័យមួយចំនួនមាន៖ ១)ការពង្រឹងការផ្លាស់ប្តូរមន្រ្តីយោធាជាន់ខ្ពស់, ២)ការបន្តពង្រឹងពង្រីកកម្មវិធីផ្លាស់ប្តូរនាយទាហាន និងការបណ្តុះបណ្តាលទាំងផ្នែកភាសាខ្មែរ និងភាសាឡាវ និង ៣)ការពង្រឹងទំនាក់ទំនង និងបង្កើនការផ្លាស់ប្តូរមន្រ្តីយោធាតាមអង្គភាពនៅតាមបណ្តោយព្រំដែន។
ជាការឆ្លើយតប ឯកឧត្តម ឧបនាយករដ្ឋមន្រ្តី បានឯកភាពចំពោះការលើកឡើងរបស់រដ្ឋមន្រ្តីការពារជាតិឡាវ និងបានរំលឹកថា៖ កិច្ចសហប្រតិបត្តិការរវាងកម្ពុជា និងឡាវ គឺមានរយៈពេលយូរអង្វែង ជាពិសេសនៅក្នុងវិស័យការពារជាតិ កងទ័ពនៃប្រទេសទាំងពីរ តែងមានកិច្ចសហប្រតិបត្តិការល្អជាមួយគ្នា។ ពាក់ព័ន្ធនឹងសំណូមពររបស់ភាគីឡាវ ឯកឧត្តម ឧបនាយករដ្ឋមន្រ្តី ព្រមព្រៀងឱ្យក្រសួងការពារជាតិនៃប្រទេសទាំងពីរ សិក្សាលើការបង្កើនការផ្លាស់ប្តូរទស្សនកិច្ចមន្រ្តីយោធាទៅវិញទៅមក ឱ្យបានកាន់តែច្រើន ក៏ដូចជាបង្កើនកម្រិតនិងចំនួនសិក្ខាកាមឱ្យបានច្រើនជាងមុន និងបង្កើនការផ្លាស់ប្តូរទំនាក់ទំនង រវាងអង្គភាពនៅតាមបណ្តាព្រំដែន ដើម្បីបង្កើនការកសាងទំនុកចិត្ត និងទំនាក់ទំនងឱ្យកាន់តែជិតស្និទ។ ឯកឧត្តម ឧបនាយករដ្ឋមន្រ្តី ក៏បានបង្ហាញអំពីការគាំទ្រ និងកោតសរសើរចំពោះសមភាគីឡាវ ក្នុងការដឹកនាំធ្វើជាម្ចាស់ផ្ទះកិច្ចប្រជុំរដ្ឋមន្រ្តីការពារជាតិអាស៊ាន និងកិច្ចប្រជុំរដ្ឋមន្រ្តីការពារជាតិអាស៊ាន-បូក នៅឆ្នាំ២០២៤។ ឯកឧត្តម បានបញ្ជាក់អំពីការចូលរួមក្នុងកិច្ចប្រជុំខាងលើនៅខែវិច្ឆិកា ឆ្នាំ២០២៤ ខាងមុខ ព្រមទាំងបានជូនពរក្រសួងការពារជាតិឡាវ ឱ្យទទួលបានជោគជ័យក្នុងការធ្វើជាប្រធានកិច្ចប្រជុំរដ្ឋមន្រ្តីការពារជាតិអាស៊ាន និងកិច្ចប្រជុំពាក់ព័ន្ធផងដែរ។ ជាចុងក្រោយ ភាគីទាំងពីរបានឯកភាពបន្តគាំទ្រគ្នាទៅវិញទៅមក និងពង្រឹងពង្រីកកិច្ចសហប្រតិបត្តិការ ទាំងក្នុងក្របខណ្ឌទ្វេភាគី ក្របខណ្ឌអាស៊ាន ក៏ដូចជាកិច្ចសហប្រតិបត្តិការត្រីភាគី កម្ពុជា-ឡាវ-វៀតណាម ដើម្បីផលប្រយោជន៍ជាតិ និង ប្រជាជន នៃប្រទេសទាំងពីរ ៕
