ស្ថានីយ៍ស្តុកប្រេងឥន្ធនៈ ត្រៀមបម្រុងសម្រាប់ផ្គត់ផ្គង់បម្រើឲ្យសកម្មភាពកងយោធពលខេមរភូមិន្ទ នៅទិសយុទ្ធភូមិភាគទី៤ មួយកន្លែង អំណោយរបស់ អគ្គនាយកដ្ឋានភស្តុភា ហិរញ្ញវត្ថុ ក្រសួងការពារជាតិ ផ្តល់ជូនយោធភូមិភាគទី៤ ត្រូវបានសម្ពោធដាក់ឱ្យប្រើប្រាស់ជាផ្លូវការ នឹងធ្វើពិធីប្រគល់ ទទួល ដល់សមីអង្គភាពហើយនាព្រឹកថ្ងៃទី០៦ ខែកញ្ញា ឆ្នាំ២០២៤ នៅទីបញ្ជាការយោធភូមិភាគទី ៤ ស្ថិតក្នុងភូមិសាស្ត្រស្រុកបាគង ខេត្តសៀមរាប។ ពិធីសម្ពោធនេះបានប្រព្រឹត្តទៅស្ថិតក្រោមអធិបតីភាព ឯកឧត្តម ឧត្តមសេនីយ៍ឯក ម៉ឹង ពន្លក អគ្គនាយក អគ្គនាយកដ្ឋានភស្តុភារ ហិរញ្ញវត្ថុ ក្រសួងការពារជាតិ ព្រមទាំងមានការចូលរួមពីសំណាក់ នាយទាហានជាន់ខ្ពស់ជំនាញរបស់ភស្តុកភារ ហិរញ្ញវត្ថុ របស់ក្រសួងការពារជាតិ និងយុទ្ធភូមិភាគ ៤ ចូលរួមជាច្រើនរូប។
ក្នុងមតិស្វាគមន៍ ដែលអានដោយ ឧត្តមសេនីយ៍ទោ សុក រីនណា មេបញ្ជាការរង នាយសេនាធិការយោធភូមិភាគទី៤ និងរបាយការណ៍សាងសង់របស់ ឧត្តមសេនីយ៍ទោ នួន សុខូ នាយក នាយកដ្ឋានប្រេងឥន្ធនៈ ក្រសួងការពារជាតិ បានគូសបញ្ជាក់ថា៖ ស្ថានីយ៍ស្តុកប្រេងត្រៀម ដែលត្រូវធ្វើពិធីសម្ពោធដាក់ឲ្យប្រើប្រាស់ជាផ្លូវការ និងធ្វើពិធីប្រគល់ទទួលជូនដល់ទីបញ្ជាការយោធភូមិភាគទី ៤ នាពេលនេះ បានចាប់ផ្ដើមសាងសង់ដោយ អគ្គនាយកដ្ឋានភស្តុភារ ហិរញ្ញវត្ថុ តាមរយៈនាយកដ្ឋានប្រេងឥន្ធនៈ មានទំហំ 108ម៉ែត្រការ៉េ (មានទទឹង 8.4m និងបណ្តោយ 12.88m) បំពាក់ស៊ីទែនចំនួន ២គ្រឿង អាចស្តុកទុកប្រេងឥន្ធនៈបានចំនួន ១ ម៉ឺន ៥ ០០០ លីត្រ។ ស្ថានីយនេះចាប់ផ្ដើមសាងសង់ពីថ្ងៃទី២១ ខែកុម្ភៈ រហូតដល់ថ្ងៃទី២៣ ខែមិថុនា ឆ្នាំ២០២៤ មានរយៈពេល ១២៣ថ្ងៃ ដោយសាងសង់ស្របទៅតាមបទដ្ឋានស្តង់ដាបច្ចេកទេស រួមទាំងការតភ្ជាប់បណ្តាញអគ្គីសនីចូល និងប្រព័ន្ធអគ្គីសនី ប្រើផ្នែកខាងក្នុង ដោយបានបំពាក់សម្ភារៈការពារ និងពន្លត់អគ្គីភ័យ(ម្សៅភ្ជួរ បំពង់ពន្លត់)ជាដើម ដើម្បីបញ្ជៀសពីហានិភ័យណាមួយដែលកើតមានឡើងដោយយថាហេតុ។
ថ្លែងក្នុងពិធីនោះ ឧត្តមសេនីយ៍ឯក ម៉ឹង ពន្លក អគ្គនាយក អគ្គនាយកដ្ឋានភស្តុភា ហិរញ្ញវត្ថុ ក្រសួងការពារជាតិ បានកោតសរសើរ និងវាយតម្លៃខ្ពស់ចំពោះកិច្ចសហការល្អ រវាងថ្នាក់ដឹកនាំ នាយកដ្ឋានប្រេងឥន្ធនៈ និងសហការី ជាមួយថ្នាក់ដឹកនាំគ្រប់លំដាប់ថ្នាក់ របស់បញ្ជាការដ្ឋានយោធភូមិភាគទី៤ ដោយបានយកចិត្តទុកដាក់ខ្ពស់ សម្រេចបាននូវបទបញ្ជាថ្នាក់ដឹកនាំ ក្នុងការងារកសាងស្ថានីយ៍ស្តុកប្រេងឥន្ធនៈត្រៀមនេះឡើង។ ឯកឧត្តម ម៉ឹង ពន្លក បានលើកឡើងថា៖ អគ្គនាយកដ្ឋានភស្តុភារ ហិរញ្ញវត្ថុ ក្រសួងការពារជាតិ ក្រោមការដឹកនាំ និងបញ្ជាផ្ទាល់ពី ឯកឧត្តម នាយឧត្តមសេនីយ៍ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានយកចិត្តទុកដាក់បំពេញការងារតាមតួនាទីយ៉ាងសកម្ម ដើម្បីបម្រើគាំទ្រ ដោះស្រាយ ផ្គត់ផ្គង់ និងធានាជីវភាពជូន ទូទាំងកងយោធពលខេមរភូមិន្ទ។ ក្នុងនោះភារកិច្ចទទួលខុសត្រូវលើការធានាប្រេងឥន្ធនៈជូនកងយោធពលខេមរភូមិន្ទទាំងមូល មិនមែនជាការងារសាមញ្ញពេកនោះទេ ក្នុងនាមជាសេនាធិការឱ្យ ក្រសួងការពារជាតិ គ្រប់គ្រង និងទទួលខុសត្រូវទាំងស្រុង លើជំនាញប្រេងឥន្ធនៈគ្រប់ប្រភេទ សម្រាប់ប្រើប្រាស់ទូទាំងកងយោធពលខេមរភូមិន្ទ កសាងផែនការសេចក្តីត្រូវការប្រេងឥន្ធនៈ ផ្គត់ផ្គង់ បែងចែកដល់បណ្តាប្រភេទទ័ព និងសម្របសម្រួលដោះស្រាយកិច្ចការធានាប្រេងឥន្ធនៈឱ្យបានសមស្របទៅតាមការវិវត្ត នៃសភាពការណ៍ និងសំណូមពរភារកិច្ចរបស់កងយោធពលខេមរភូមិន្ទ។
ឯកឧត្តម ឧត្តមសេនីយ៍ឯក ម៉ឹង ពន្លក ក៏បានបញ្ជាក់ អំពីហេតុផលដែលនាំឱ្យមានការសាងសង់ ស្ថានីយ៍ស្តុកប្រេងនេះផងដែរថា៖ នៅក្នុងឱកាស សន្និបាតបូកសរុបលទ្ធផលការងារឆ្នាំ២០២៣ និងទិសដៅឆ្នាំ២០២៤ របស់ អគ្គបញ្ជាការ កាលពីថ្ងៃទី២៥-ទី២៦ ខែមករា ឆ្នាំ២០២៤ កន្លងមក នាយឧត្តមសេនីយ៍ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ដោយមានសំណូមពរជាច្រើនពីគ្រប់អង្គភាពពាក់ព័ន្ធ ដែលក្នុងនោះមានសំណូមពរ របស់បណ្តាអង្គភាព អំពីសេចក្តីត្រូវការទីតាំងស្តុកប្រេងឥន្ធនៈ សម្រាប់ត្រៀមតាមបណ្តាអង្គភាពមួយចំនួន ដែលមានភារកិច្ចចាំបាច់នោះ អគ្គនាយកដ្ឋានក៏បានបញ្ជាឱ្យ នាយកដ្ឋានប្រេងឥន្ធនៈ ដឹកនាំក្រុមការងារចុះពិនិត្យ និងសិក្សាដល់ទីតាំងភ្លាមៗ ដើម្បីសិក្សាទីតាំង និងវាយតំលៃក្នុងការងារសាងសង់ និងរិះរកគ្រប់មធ្យោបាយ ដោយការសន្សំសំចៃ ច្នៃប្រឌិត ធ្វើយ៉ាងណាដើម្បីអាចមានលទ្ធភាព ក្នុងការសាងសង់ស្ថានីយ៍ ស្តុកប្រេងឥន្ធនៈ នេះឡើងជាបន្ទាន់ ក្នុងការធានាដល់ការងាររបស់កងទ័ពឱ្យបានទាន់ពេលវេលា។ ឯកឧត្តម ម៉ឹង ពន្លក បានលើកឡើងពីរចក្ខុវិស័យលើការងារធានាភស្តុភារ ហិរញ្ញវត្ថុនិយាយជារួម និងនិយាយដោយទ្បែកជំនាញប្រេងឥន្ធនៈ គឺជាចក្ខុវិស័យក្នុងការជំរុញឲ្យគ្រប់បណ្តាអង្គភាព ដែលមានរថយន្ត យន្តយុទ្ធ រថក្រោះ រថពាសដែក ត្រូវតែមានស្ថានីយ៍ស្តុកប្រេងនៅក្នុងអង្គភាព ប៉ុន្តែដោយលទ្ធភាពថវិកាជាតិមានកម្រិតផងនោះ យើងមិនបានដាក់ចូលគ្រោងក្នុងកញ្ចប់ថវិកាប្រចាំឆ្នាំនោះទេ។ ឯកឧត្តម ម៉ឹង ពន្លក បានរំលឹកដល់មេបញ្ជាការ ពិសេសជំនាញដែលត្រូវទទួលខុសត្រូវលើការប្រើប្រាស់ប្រេងឥន្ធនៈ និងការថែទាំស្ថានីយ៍ស្តុកប្រេងត្រៀម ឱ្យមានការប្រើប្រាស់ប្រេងឥន្ធនៈ (ប្រេងត្រៀម)ឱ្យបានត្រឹមត្រូវ សម្រាប់ត្រៀមធានាដល់ការចល័ត មធ្យោបាយគ្រឿងចក្រធុនធ្ងន់ ធុនស្រាល របស់អង្គភាព ដើម្បីអនុវត្តបទបញ្ជាតាមសំណូមពរ និងការងារចាំបាច់បន្ទាន់ៗ របស់កងយោធពលខេមរភូមិន្ទ។ ជាមួយគ្នានេះដែរ ក៏ត្រូវម្ចាស់ការលើការគ្រប់គ្រង ថែរក្សាទាំងគុណភាព និងបរិមាណឱ្យបានត្រឹមត្រូវ តាមលក្ខណៈស្តង់ដា ដើម្បីធានាក្នុងការអនុវត្តការងារសម្រេចបានតាមបទបញ្ជា។ ស្ថានីយ៍ស្តុកប្រេងឥន្ធនៈនេះ យើងអាចប្រើប្រាស់តាមសេចក្តីត្រូវការជាប្រចាំ ហើយយើងនឹងដាក់បំពេញវិញតាមរយៈគោលរបបប្រេងប្រើប្រាស់ប្រចាំខែរបស់អង្គភាព ដែលទទួលតាមរយៈនាយកដ្ឋានប្រេង។
ឯកឧត្តម ម៉ឹង ពន្លក ក៏បានជំរុញឲ្យជំនាញគ្រប់គ្រងការងារថែទាំស្ថានីយ៍ស្តុកប្រេងត្រៀម ត្រូវម្ចាស់ការគ្រប់គ្រងថែរក្សាគ្រឿងបំពាក់ សម្ភារៈផ្សេងៗ សិក្សាស្វែងយល់ និងចេះប្រើប្រាស់ឧបករណ៍បំពាក់ទាំងទ្បាយ ដែលមាននៅក្នុងស្ថានីយ៍ស្តុកប្រេងត្រៀមនេះ។ ទន្ទឹមនិងនេះដែរក៏ត្រូវត្រួតពិនិត្យជាប្រចាំនូវរាល់ឧបករណ៍សម្ភារៈបំពាក់ដើម្បីធានាបាននូវប្រសិទ្ធភាពការងារធានាប្រេងឥន្ធនៈបានទាន់ពេលវេលា និងត្រៀមជាប្រចាំ នូវឧបករណ៍ សម្ភារៈពន្លត់អគ្គីភ័យ ដើម្បីធានាថាពួកវាអាចប្រើប្រាស់បាន។ រៀបចំក្រុមប្រចាំការ ដើម្បីធានាបានសន្តិសុខ និងសុខសុវត្ថិភាព ហើយត្រូវមានទំនាក់ទំនងជាមួយសមត្ថកិច្ចពាក់ព័ន្ធ នឹងការបង្ការពន្លត់អគ្គីភ័យ និងសង្គ្រោះរបស់ខេត្ត ដែលមានលេខ (078 773 774 ជាក្រុមការងារព័ត៌មាន និងប្រតិកម្មរហ័ស)។ ត្រូវត្រួតពិនិត្យ ស៊ីទែនប្រេងឥន្ធនៈ ដើម្បីជៀសវាង មានករណីលេចធ្លាយ ប្រេងជាយថាហេតុ, រក្សាអនាម័យ និងបរិស្ថានជុំវិញឱ្យបានល្អជាប្រចាំ។ ឯកឧត្តម ឧត្តមសេនីយ៍ឯក ម៉ឹង ពន្លក ក៏បានកាត់ខ្សែបូរណ៍សម្ពោធដាក់ឲ្យប្រើប្រាស់ជាផ្លូវការនៅស្ថានីយប្រេងឥន្ធនៈត្រៀម នៅទីបញ្ជាការយោធភូមិភាគទី ៤ ព្រមទាំងបានចុះពិនិត្យមើលផ្ទះបាយរបស់យោធភូមិភាគ, ឃ្លាំងផ្គត់ផ្គង់ភស្តុភារ, នឹងបានអញ្ជើញចុះសាកសួរសុខទុក្ខក្រុមគ្រូពេទ្យ និងយុទ្ធជំងឺដែលកំពុងសម្រាកព្យាបាលនៅក្នុងមន្ទីរពេទ្យយុទ្ធភូមិភាគទី ៤ ហើយបានផ្ដល់នូវអំណោយ របស់អគ្គនាយកដ្ឋាន ភស្តុភារ ហិរញ្ញវត្ថុ ក្រសួងការពារជាតិ ក្រុមគ្រប់គ្រងស្ថានីយ៍ប្រេងឥន្ធនៈមាន៖ ត្រីខ ចំនួន ២០០គីឡូក្រាម ស្មើនឹង ១០កេស, អង្ករ ចំនួន២តោន, ថវិកាចំនួន ៥ លានរៀល, ម៉ូតូស៊ីទែនដឹកប្រេងឥន្ធនៈ ០១ គ្រឿង, ឧបត្ថម្ភដល់ក្រុមកងកិត្តិយសថវិកា ៥៦ម៉ឺនរៀល, ជូនដល់មន្ទីរពេទ្យយោធភូមិភាគទី៤ ថវិកា ១លានរៀល និងជូនអ្នកជំងឺសម្រាកព្យាបាលនៅមន្ទីរពេទ្យយោធភូមិភាគទី៤ ក្នុងម្នាក់ៗថវិកា ៥ម៉ឺនរៀល ផងដែរ ៕
