នាយឧត្តមសេនីយ៍ យន្ត មីន បានថ្លែងថា៖ កិច្ចសហប្រតិបត្តិការយោធាកម្ពុជា-អូស្ត្រាលី បន្តរក្សាចំណងមិត្តភាពដ៏ល្អ និងពង្រីកពីមួយឆ្នាំទៅមួយឆ្នាំ ហើយនឹងឈានដល់កិច្ចសហប្រតិបត្តិការដៃគូរយុទ្ធសាស្ត្រគ្រប់ជ្រុងជ្រោយនៅពេលអនាគត។ នាយឧត្តមសេនីយ៍ យន្ត មីន រដ្ឋលេខាធិការក្រសួងការពារជាតិ បានថ្លែងដូចនេះនៅក្នុងពិធីជប់លៀងលើនាវាកងទ័ពជើងទឹកអូស្ត្រាលី មានឈ្មោះថា HMAS Perth ដែលបានចូលចតនៅកំពង់ផែ ខេត្តព្រះសីហនុ នាថ្ងៃទី០២ ខែកញ្ញា ឆ្នាំ២០២៤។
ក្នុងនាម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ, នាយឧត្តមសេនីយ៍ យន្ត មីន បានសម្តែងអំណរគុណយ៉ាងជ្រាលជ្រៅចំពោះរដ្ឋាភិបាល កងទ័ព និងប្រជាជនអូស្ត្រាលី ដែលតែងតែឧបត្ថម្ភគាំទ្រដល់ព្រះរាជាណាចក្រកម្ពុជា ក៏ដូចជាក្រសួងការពារជាតិ ក្នុងស្មារតីមិត្តភាព និងកិច្ចសហប្រតិបត្តិការល្អ និងជាមិត្តដ៏ល្អ ក្នុងទំនាក់ទំនងមិត្តភាពដ៏ល្អប្រសើរ និងពង្រឹងកិច្ចទំនាក់ទំនងដ៏ស៊ីជម្រៅកាន់តែរឹងមាំលើគ្រប់វិស័យ ជាពិសេសវិស័យការពារជាតិ រវាងប្រទេសទាំងពីរ។ ជារួមកិច្ចសហប្រតិបត្តិការយោធាកម្ពុជា-អូស្ត្រាលី បន្តរក្សាចំណងមិត្តភាពល្អ និងពង្រីកពីមួយឆ្នាំទៅមួយឆ្នាំ និងវាយតម្លៃខ្ពស់សម្រាប់ក្រុមការងារសេហប្រតិបត្តិការកម្ពុជា-អូស្ត្រាលី នៃប្រទេសទាំងពីរ ដែលបានដើរតួយ៉ាងសំខាន់ ក្នុងការធ្វើផែនការកិច្ចសហប្រតិបត្តិការយោធាទ្វេភាគីជារៀងរាល់ឆ្នាំ។ នៅឆ្នាំនេះកម្ពុជាបានធ្វើជាម្ចាស់ផ្ទះរៀបចំកិច្ចប្រជុំប្រចាំឆ្នាំចំនួន២ ដែលទើបតែបញ្ចប់នៅពេលថ្មីៗនេះគឺ ទី១-ក្រុមការងារសហប្រតិបត្តិការកម្ពុជា-អូស្ត្រាលី លើកទី១៤ (DCWG-14) និងទី២ កិច្ចសន្ទនាគោលនយោបាយ យុទ្ធសាស្ត្រកម្ពុជា-អូស្ត្រាលីលើកទី៩ (SPD-9) ដែលទទួលបានលទ្ធផលខ្ពស់ សម្រាប់ផែនការកិច្ចសហប្រតិបត្តិការឆ្នាំបន្តបន្ទាប់ទៀត។ លើសពីនេះអូស្ត្រាលីបានជួយឧបត្ថម្ភដល់ការចងក្រងសៀវភៅ ស ការពារជាតិ និងបន្តជួយសម្រាប់ការធ្វើបច្ចុប្បន្នភាពយុទ្ធសាស្ត្រការពារជាតិឆ្នាំ២០២៤ ព្រមទាំងការងារសន្តិសុខលម្អសមុទ្របន្ថែមទៀត។ កិច្ចការទាំងអស់នេះ សបញ្ជាក់ឱ្យឃើញថាអូស្ត្រាលី គឺដៃគូកិច្ចសហប្រតិបត្តិការដ៏មានសក្តានុពលរបស់ក្រសួងការពារជាតិកម្ពុជា។
នាយឧត្តមសេនីយ៍ យន្ត មីន បានធ្វើការកត់សំគាល់ អំពីសារៈសំខាន់ នៃដំណើទស្សនៈកិច្ចរបស់ សម្តេចធិបតី ហ៊ុន ម៉ាណែត នៅប្រទេសអូស្ត្រាលីក្នុងឱកាសដែលសម្តេចធិបតី អញ្ជើញចូលរួមកិច្ចប្រជុំកំពូលពិសេសអាស៊ាន-អូស្ត្រាលី ក្នុងខែមីនា ឆ្នាំ២០២៤ ក្នុងនោះសម្តេច ក៏បានជួបទ្វេភាគី និងនាយករដ្ឋមន្ត្រីអូស្ត្រាលី ដែលនឹងជំរុញកិច្ចសហប្រតិបត្តិការប្រទេសទាំងពីរ ឱ្យឈានដល់ដៃគូរយុទ្ធសាស្ត្រគ្រប់ជ្រុងជ្រោយ នៅពេលអនាគត។ បន្ថែមពីនេះ ក្នុងនាមក្រសួងការពារជាតិ នាយឧត្តមសេនីយ៍ យន្ត មីន ក៏ដូចជាប្រជាជនកម្ពុជាទាំងមូល បានវាយតម្លៃខ្ពស់ ចំពោះការចូលរួមចំណែករបស់អូស្ត្រាលីដល់ដំណើរការសន្តិភាពនៅកម្ពុជា និងគាំទ្រដល់ការស្តារ និងអភិវឌ្ឍន៍កម្ពុជាលើវិស័យជាច្រើន ដូចជា កសិកម្ម អប់រំ និងសកម្មភាពដោះមីនជាដើម។
សូមបញ្ជាក់ថា៖ នាវាកងទ័ពជើងទឹកអូស្ត្រាលី គឺជាប្រភេទនាវាចម្បាំង មានឈ្មោះ HMAS Perth ដឹកនាំដោយវរនាវីទោ Ben Dalton មេបញ្ជាការនាវាកងទ័ពជើងទឹក អូស្រ្តាលី បានចូលចតនៅកំពង់ផែស្វយ័តក្រុងព្រះសីហនុ មានរយៈពេល៣ថ្ងៃ គិតចាប់ពីថ្ងៃទី០២ ដល់ថ្ងៃទី០៤ ខែកញ្ញា ឆ្នាំ២០២៤ ដើម្បីពង្រឹងកិច្ចសហប្រតិបត្តិការល្អ បង្កើនទំនាក់ទំនង និងរឹតចំណងមិត្តភាព សាមគ្គីភាពឱ្យកាន់តែល្អទ្វេឡើងថែមទៀត រវាងប្រទេទាំងពីរ(កម្ពុជា-អូស្ត្រាលី) ៕
