ព្រឹកថ្ងៃទី០២ ខែកញ្ញា ឆ្នាំ២០២៤ នៅទីស្ដីការក្រសួងការពារជាតិ បានបើកកិច្ចប្រជុំបូកសរុបការងារខែសីហា និងលើកទិសដៅសម្រាប់អនុវត្តបន្តខែកញ្ញា ឆ្នាំ២០២៤ ស្ថិតក្រោមអធិបតីភាព ឯកឧត្តម នាយឧត្តមសេនីយ៍ ចាយ សាំងយុន រដ្ឋលេខាធិការប្រចាំការក្រសួងការពារជាតិ។
ក្នុងរបាយការណ៍បូកសរុបការងារ ដែលលើកឡើងពីព្រឹត្តិការណ៍សំខាន់ដែលបានកើតមានឡើងនៅក្នុងព្រះរាជាណាចក្រកម្ពុជា និងបានបង្ហាញពីសភាពការណ៍វិវឌ្ឍន៍រីកចម្រើនថ្មីៗក្នុងខែកញ្ញាកន្លងមក ដែលកងយោធពលខេមរភូមិន្ទបានចូលរួមបំពេញភារៈកិច្ចសហការការពារជាមួយស្ថាប័ននានា ទទួលបានលទ្ធផលដ៏ល្អប្រសើរ។ ក្នុងរបាយការណ៍ប្រចាំខែ ក៏បានលើកឡើងពីលទ្ធផលការងារ នៃកិច្ចការពារសន្តិសុខ ស្ថិរភាព សណ្ដាប់ធ្នាប់សាធារណៈ ដែលកងយោធពលខេមរភូមិន្ទ ក៏ដូចជាកងរាជអាវុធហត្ថខិតខំពុះពារសម្រេចបាននៅក្នុងរយៈពេលមួយខែកន្លងទៅ ក្រោមកិច្ចសហការជាមួយកម្លាំងមានសមត្ថកិច្ច និងអាជ្ញាធរមូលដ្ឋាន ក្នុងភារកិច្ចការពារជាតិ ការពារប្រជាជន។ នៅក្នុងខែសីហានេះ កងយោធពលខេមរភូមិន្ទបានពង្រឹងកិច្ចការការពារជាតិ លើគ្រប់វិស័យនៅតាមតំបន់ព្រំដែនគោក ដែនសមុទ្រ ធ្វើល្បាតជាប្រចាំក្នុងភូមិសាស្ត្រទទួលខុសត្រូវរៀងៗខ្លួន ដើម្បីតាមដានត្រួតពិនិត្យគ្រប់គ្រងសភាពការណ៍ នឹងចូលរួមទប់ស្កាត់បទល្មើសគ្រប់ប្រភេទនៅតាមព្រំដែន និងសកម្មភាពឆ្លងដែនខុសច្បាប់ទៅវិញទៅមកប្រទេសជិតខាង។ កងយោធពលខេមរភូមិន្ទបានធ្វើម្ចាស់ការ និងសហការជាមួយអាជ្ញាធរមានសមត្ថកិច្ចគ្រប់ជាន់ថ្នាក់ ចូលរួមយ៉ាងសកម្មការពារសន្តិសុខសណ្ដាប់ធ្នាប់សាធារណៈ ធ្វើការបង្ការទប់ស្កាត់ និងបង្ក្រាបសកម្មភាពបទល្មើសគ្រប់ប្រភេទ ភាពអនាធិបតេយ្យផ្សេងៗ និងសហការចូលរួមការពារសន្តិសុខសុវត្ថិភាពជូនប្រមុខរាជរដ្ឋាភិបាល ថ្នាក់ដឹកនាំគណៈប្រតិភូជាតិ អន្តរជាតិ និងការអនុវត្តច្បាប់ចរាចរណ៍ផ្លូវគោក ព្រមទាំងគោរពអនុវត្តបទបញ្ជាអនុសាសន៍របស់ប្រមុខរាជរដ្ឋាភិបាល ក្នុងការបង្ក្រាបសកម្មភាពបំផ្លិចបំផ្លាញធនធានធម្មជាតិ។ បណ្ដាស្ថាប័នអង្គភាពទូទាំងកងយោធពលខេមរភូមិន្ទ បានយកចិត្តទុកដាក់រៀបចំផែនការសកម្មភាពការងាររបស់ខ្លួន និងបានបន្តអនុវត្តការងារហ្វឹកហ្វឺន ការងារអប់រំចិត្តសាស្ត្រនយោបាយ និងការងារសតិអារម្មណ៍កងទ័ព ការងារកសាងបែបបទយោធិនចូលនិវត្តន៍ និងប្រភេទពីរ ការងារកសាងច្បាប់ និងលិខិតបទដ្ឋានផ្សេងៗ ការងារធានាភ័ស្តុភារ-ហិរញ្ញវត្ថុ ការងារធានាគ្រឿងបំពាក់សម្ភារៈបច្ចេកទេស កែច្នៃជួសជុលថែទាំលើកកម្ពស់សុវត្ថិភាព គុណភាពគ្រឿងបំពាក់ ការងារសុខាភិបាល បានលើកកម្ពស់សុខុមាលភាពជូនកងទ័ព និងប្រជាពលរដ្ឋ ដែលមានមូលដ្ឋាននៅជិតកន្លែងបោះទ័ព។ បានគ្រប់គ្រង និងធានាដល់ការប្រើប្រាស់បណ្ដាញទំនាក់ទំនងបញ្ជូនសារ ការងារកសាងបណ្ដាញផ្លូវគមនាគមន៍ ស្ពាន លូ និងសំណង់ផ្សេងៗក្នុងកងទ័ព បានគ្រប់គ្រងអចលនទ្រព្យរបស់កងយោធពលខេមរភូមិន្ទ ធ្វើការងារល្អលើទំនាក់ទំនងកិច្ចសហប្រតិបត្តិការយោធាជាមួយបណ្ដាប្រទេសក្នុងតំបន់ និងលើសកលលោក។ ការងារកសាង និងដំណើរការវិមានឈ្នះឈ្នះ និងតំបន់ប្រវត្តិសាស្ត្រយោធា បន្តការបំពេញបេសកកម្មរក្សាសន្តិភាពក្រោមឆត្រអង្គការសហប្រជាជាតិ ព្រមទាំងការងារមួយចំនួនទៀត ដោយសម្រេចបាននូវលទ្ធផលគួរជាទីមោទន។
ក្នុងកិច្ចប្រជុំ នាយឧត្តមសេនីយ៍ ចាយ សាំងយុន រដ្ឋលេខាធិការប្រចាំការក្រសួងការពារជាតិ បានស្នើដល់ឯកឧត្តម អស់លោក ដែលបានចូលរួមក្នុងកិច្ចប្រជុំនេះ ផ្តល់ជាមតិយោបល់ ក្នុងការកែតម្រូវនូវពង្រាងរបាយការណ៍បូកសរុបការងារខែសីហានេះ ឲ្យបានផុសផុលដើម្បីដាក់ចេញនូវទិសដៅសម្រាប់អនុវត្តបន្ត ខែកញ្ញា ឆ្នាំ២០២៤នេះ ឲ្យដំណើរការទៅប្រកបដោយលទ្ធផលកាន់តែប្រសើរឡើង ៕
