កិច្ចប្រជុំគណៈកម្មាធិការព្រំដែនថ្នាក់ភូមិភាគ កម្ពុជា-ថ្មី រវាងយោធភូមិភាគទី៤(កម្ពុជា) និងយោធភូមិភាគទី២(ថៃ) លើកទី២៥ ប្រចាំឆ្នាំ២០២៤ បានប្រារព្ធឡើងលើទឹកដីប្រវត្តិសាស្ត្រ ខេត្តសៀមរាប នាថ្ងៃទី២០ ខែសីហា ឆ្នាំ២០២៤ នៅសណ្ឋាគារសេនជូរី ខេត្តសៀមរាប នៃព្រះរាជាណាចក្រកម្ពុជា ក្រោមការដឹកនាំដោយ ឧត្តមសេនីយ៍ឯក ពៅ ហេង មេបញ្ជាការរងកងទ័ពជើងគោក មេបញ្ជាការយោធភូមិភាគទី៤ គណ:កម្មាធិការព្រំដែន ភាគីកម្ពុជា និងគណ:កម្មាធិការព្រំដែនភាគីថៃ ដឹកនាំដោយ ឧត្តមសេនីយ៏ទោ អាឌុន ប៊ុនថាំចារើន មេបញ្ជាការយោធភូមិភាគទី២ នៃកងទ័ពភូមិន្ទថៃ។
មេបញ្ជាការយោធភូមិភាគទី៤ សហប្រធានភាគីកម្ពុជា ថ្លែងមតិស្វាគមន៍ និងសម្ដែងភាពរីករាយ ក្នុងឱកាសដែលភាគីខាងកម្ពុជា ធ្វើជាម្ចាស់ផ្ទះរៀបចំនូវកិច្ចប្រជុំជាមួយភាគីថៃនាពេលនេះ ព្រមទាំងបានលើកឡើងអំពីគោលបំណងនៃកិច្ចប្រជុំ ដើម្បីលើកស្ទួយ និងរិតចំណងទំនាក់ទំនងមិត្តភាពដ៏ល្អរវាង កម្ពុជា និងថៃ ឲ្យមានភាពរឹងមាំ ក្នុងគោលបំណងលើការពង្រឹងពង្រីកខាងផ្នែក សន្តិសុខ ស្ថិរភាព សុវត្ថិភាព និងការអភិវឌ្ឍជូនដល់ប្រជាជននៃប្រទេសទាំង២ ដែលរស់តាមបណ្ដោយខ្សែបន្ទាត់ព្រំដែន។
ក្នុងនោះផងដែរ មេបញ្ជាការភូមិភាគទី២ សហប្រធានខាងភាគីថៃ ក៏បានថ្លែងអំណរគុណយ៉ាងកក់ក្តៅ ចំពោះការធ្វើបដិសណ្ឋារកិច្ចរបស់ភាគីកម្ពុជា និងសម្ដែងនូវក្ដីសោមនស្សរីករាយ ក្នុងឱកាសដែលបានមកចូលរួមកិច្ចប្រជុំជាមួយភាគីកម្ពុជា ហើយក៏សូមអបអរសាទរ ចំពោះភាពជឿនលឿនលើកិច្ចសហប្រតិបត្តិការទាំងទ្វេភាគី ក្នុងការដោះស្រាយបញ្ហាការងារសន្តិសុខ នៅក្នុងតំបន់ព្រំដែន ដើម្បីលើកស្ទួយដល់ការធ្វើទំនាក់ទំនងល្អជាមួយគ្នា និងអបអរសាទរចំពោះកិច្ចសហប្រតិបត្តិការ ក្នុងការជួយគ្នាទៅវិញទៅមក។ ក្នុងនោះភាគីទាំងពីរ បានសន្យាបន្តជំរុញ និងគាំទ្រកិច្ចសហប្រតិបត្តិការទ្វេភាគី លើគ្រប់វិស័យឲ្យកាន់តែមានភាពល្អប្រសើរឡើង។
នាឱកាសនោះផងដែរ ភាគីទាំងសងខាង បានឯកភាពគ្នារៀបចំឲ្យមានកិច្ចប្រជុំគណៈកម្មាធិការព្រំដែនថ្នាក់យោធភូមិភាគ កម្ពុជា-ថៃ រវាងយោធភូមិភាគទី៤(កម្ពុជា) និងភូមិភាគទី២(ថៃ) លើកទី២៦ ប្រចាំឆ្នាំ២០២៥ នៅព្រះរាជាណាចក្រថៃ។ ភាគីទាំងពីរ ក៏បានឯកភាពចុះហត្ថលេខារួមគ្នា ទៅលើខ្លឹមសារនៃកំណត់ហេតុកិច្ចប្រជុំសហប្រតិបត្តិការ គណៈម្មាធិការព្រំដែនថ្នាក់យោធភូមិភាគ កម្ពុជា-ថៃ លើកទី២៥ រវាងយោធភូមិភាគទី៤(កម្ពុជា) និងយោធភូមិភាគទី២(ថៃ) ប្រចាំឆ្នាំ២០២៤ និងមានការប្រគល់ជូននូវវត្ថុអនុស្សាវរីយ៍ជូនគ្នាទៅវិញទៅមកផងដែរ ៕
