នាយកដ្ឋានបញ្ជូនសារ ក្រសួងការពារជាតិ បានប្រារព្ធពិធីបិទវគ្គបណ្ដុះបណ្ដាល ថ្នាក់មេបញ្ជាការកងអនុសេនាតូចបញ្ជូនសារ ជំនាន់ទី៥ និងបើកវគ្គបណ្ដុះបណ្ដាលបច្ចេកវិទ្យាគរុកោសល្យគ្រូបង្គោល និងវគ្គបំប៉នការយល់ដឹងអំពីសន្តិសុខបច្ចេកវិទ្យា ឆ្នាំ២០២៤-២០២៥ ក្រោមអធិបតីភាព នាយឧត្តមសេនីយ៍ យន្ត មីន រដ្ឋលេខាធិការក្រសួងការពារជាតិ កាលពីព្រឹកថ្ងៃទី០៩ ខែសីហា ឆ្នាំ២០២៤ នៅមជ្ឈមណ្ឌលហ្វឹកហ្វឺន និងជួសជុលបញ្ជូនសារ ខេត្តកំពង់ស្ពឺ។
យោងតាមរបាយការណ៍របស់ ឧត្ដមសេនីយ៍ទោ បេង សុត្ថារិទ្ធ នាយកមជ្ឈមណ្ឌលហ្វឹកហ្វឺន និងជួសជុលបញ្ជូនសារ បានឲ្យដឹងថា៖ ដើម្បីឆ្លើយតបទៅនឹងសេចក្ដីត្រូវការចាំបាច់របស់កងយោធពលខេមរភូមិន្ទ ពិសេសទៅលើផ្នែកបញ្ជូនសារ មជ្ឈមណ្ឌលបានដំណើរការបើកវគ្គជាបន្តបន្ទាប់ បានជាច្រើនវគ្គ និងបានបញ្ជូនកម្មសិក្សាការី ដែលបានបញ្ចប់ការសិក្សាទៅតាមបណ្តាកងឯកភាពនានា ក្នុងនោះបានបណ្តុះបណ្តាលមធ្យមបច្ចេកទេសវិទ្យុទាក់ទងបាន១វគ្គ មានសិក្ខាកាម១៧នាក់, បណ្ដុះបណ្ដាលជំនាញទូរលេខ បាន២វគ្គ មានសិក្ខាកាម៨៣នាក់, បំប៉នជំនាញបញ្ជូនសារបានចំនួន១៣វគ្គ មានសិក្ខាកាម៨៦៤នាក់, បំប៉នជំនាញអ៊ីនធឺណេត អ៊ីនត្រាណេត បានចំនួន៩វគ្គ មានសិក្ខាកាម២៨២នាក់, បំប៉នថ្នាក់នាយការិយាល័យ នាយឯកទេសបញ្ជូនសារចំនួន២វគ្គ មានសិក្ខាកាម៧៦នាក់, បណ្តុះបណ្តាលភាសារុស្ស៊ីចំនួន១វគ្គ មានសិក្ខាកាម៧២នាក់, បណ្តុះបណ្តាលថ្នាក់មេបញ្ជាការកងអនុសេនាតូចបញ្ជូនសារចំនួន៨វគ្គ មានសិក្ខាកាម២១៨នាក់, បំប៉នគ្រូបង្គោលថ្នាក់ជំនាញបញ្ជូនសារ និងថ្នាក់ជំនាញបច្ចេកវិទ្យាព័ត៌មានចំនួន១វគ្គ មានសិក្ខាកាម៥៨នាក់, បណ្តុះបណ្តាលជំនាន់ជំនាន់ទី៥ ដែលបានបិទបញ្ចប់នៅក្នុងថ្ងៃនេះ មានសិក្ខាកាមចំនួន៧៥នាក់ សរុបទាំងអស់១,៧៤៥នាក់។ ដោយឡែកវគ្គបណ្ដុះបណ្ដាលថ្នាក់មេបញ្ជាការកងអនុសេនាតូចបញ្ជូនសារ ជំនាន់ទី៥ ដែលបានដំណើរការបើកវគ្គកាលពីថ្ងៃទី១៧ ខែវិច្ឆិកា ឆ្នាំ២០២៣ ដល់ថ្ងៃទី០៩ ខែសីហា ឆ្នាំ២០២៤ ជាលទ្ធផលបញ្ចប់វគ្គ មាននិទ្ទេសល្អណាស់ ចំនួន២៥នាក់ ល្អ៤០នាក់ ល្អបង្គួរ០៨នាក់ មធ្យម០១នាក់ និងខ្សោយចំនួន០១នាក់។
ឯកឧត្តម យន្ត មីន បានមានប្រសាសន៍នៅក្នុងឱកាសនោះថា៖ រាជរដ្ឋាភិបាលនីតិកាលទី៧ នៃរដ្ឋសភាបានកំណត់ស្នូលនៃយុទ្ធសាស្ត្របញ្ចកោណ គឺការធ្វើទំនើបកម្មស្ថាប័នរដ្ឋ ឲ្យក្លាយទៅជារដ្ឋបាលសារធារណៈទំនើប ប្រកបដោយសមត្ថភាពខ្ពស់ ខ្លាំង វៃឆ្លាត ស្អាតស្អំ និងបានដាក់ចេញនូវវិធានការគន្លឹះ ក្នុងការកែទម្រង់ផ្ដោតសំខាន់ទៅលើការពង្រឹងនូវសមត្ថភាព និងសមតិកម្មស្ថាប័ន ដើម្បីលើកកម្ពស់គុណភាពការងារប្រកបដោយវិន័យ សីលធម៌ វិជ្ជាជីវៈ ប្រសិទ្ធភាព និងស័ក្តិសិទ្ធិភាព។ សម្រាប់ឆ្នាំ២០២៤នេះ សភាពការណ៍ពិភពលោក កំពុងតែបន្តវិវត្តប្រែប្រួលស្មុគស្មាញ ប្រឈមនឹងបញ្ហាវិបត្តិជាច្រើន ដែលមានលក្ខណៈជាសកល និងបានជះឥទ្ធិពលប៉ះពាល់ដល់វិស័យសន្តិសុខ នយោបាយការទូត សេដ្ឋកិច្ច វប្បធម៌ មនុស្សធម៌ និងសុខភាពសាធារណៈ ដែលនៅក្នុងនោះព្រះរាជាណាចក្រកម្ពុជាក៏ទទួលរងផលប៉ះពាល់ជាសកលនេះផងដែរ។ មួយវិញទៀត ការរីកចម្រើនបច្ចេកវិទ្យាថ្មី យ៉ាងឆាប់រហ័ស ដែលនាំឲ្យកើតមានឡើងនៅយុគ្គសម័យឌីជីថល បច្ចេកវិទ្យានិម្មិតអេអាយ(AI) កំពុងជះឥទ្ធិពលឲ្យមានការផ្លាស់ប្តូរយ៉ាងខ្លាំង ក្នុងការបំពេញការងារ និងតម្រូវការជំនាញគ្រប់ប្រភេទ។ ជាមួយគ្នានេះ ឯកឧត្តម យន្ត មីន ក៏បានលើកទឹកចិត្ត និងជំរុញឲ្យនាយកដ្ឋានបញ្ជូនសារ ត្រូវបន្តខិតខំសហការជាមួយនឹងសាលាបណ្ឌិត្យសភាបច្ចេកវិទ្យាឌីជីថលកម្ពុជា វិទ្យាស្ថានបច្ចេកវិទ្យាកម្ពុជា សាលាតិចណូ សាកលវិទ្យាល័យការពារជាតិ រួមជាមួយនឹងដៃគូកិច្ចសហប្រតិបត្តិការជាតិ និងអន្តរជាតិ ទាំងក្នុងនិងក្រៅប្រទេស ដើម្បីរួមចំណែកបង្កើនសមត្ថភាព វិស័យការពារជាតិ លើការងារបញ្ជូនសារ និងព័ត៌មានវិទ្យា ឲ្យមានការរីកចម្រើនថែមទៀត។ ទន្ទឹមនឹងនេះសម្រាប់កម្មសិក្សាការី ដែលបានបញ្ចប់វគ្គសិក្សានាពេលនេះ ត្រូវខិតខំជំរុញឲ្យប្រឡងចូលសិក្សានូវវគ្គផ្សេងៗទៀត នៅសាលាបណ្ឌិត្យសភាបច្ចេកវិទ្យាឌីជីថលកម្ពុជា ជាមួយនឹងកម្មវិធីសិក្សារបស់មជ្ឈមណ្ឌលហ្វឹកហ្វឺន និងជួសជុលបញ្ជូនសារឲ្យកាន់តែមានគុណភាព ប្រសិទ្ធភាព និងស័ក្តិសិទ្ធិភាព ៕
