បន្ទាប់ពីបានសិក្សាអស់រយៈពេលចំនួន២ថ្ងៃរួចមក វគ្គបណ្ដុះបណ្ដាលស្ដីអំពីគោលគំនិតយេនឌ័រក្នុងកងយោធពលខេមរភូមិន្ទ ត្រូវបានរៀបចំពិធីបិទ នារសៀលថ្ងៃទី០៨ ខែសីហា ឆ្នាំ២០២៤ ក្រោមអធិបតីភាពលោកជំទាវ នាយឧត្តមសេនីយ៍ ដាំ ដារីនី រដ្ឋលេខាធិការ និងជាតំណាង នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងលោកជំទាវ គឹម ស៊ីផាត់ រដ្ឋលេខាធិការប្រចាំការក្រសួងកិច្ចការនារី ព្រមទាំង ឯកឧត្តម តំណាងកងឯកភាពនានា អគ្គនាយករង អគ្គនាយកដ្ឋាន និងនាយទាហានចំណុះក្រសួងការពារជាតិជាច្រើន។
លោកជំទាវ ឧត្តមសេនីយ៍ទោ មាស រាជ្ជនី អគ្គនាយករង អគ្គនាយកដ្ឋានយោធសេវា និងជាប្រធានក្រុមការងារយេនឌ័រ បានថ្លែងឲ្យដឹងថា៖ វគ្គបណ្តុះបណ្តាលបានប្រព្រឹត្តទៅក្នុងរយៈពេល២ថ្ងៃ ចាប់ពីថ្ងៃទី០៧ និងថ្ងៃទី០៨ ខែសីហា ឆ្នាំ២០២៤ ដែលមានវត្តមានសិក្ខាកាមមកពីតាមបណ្ដាអង្គភាពចំណុះក្រសួងការពារជាតិ ចំនួន១៨អង្គភាព ដែលមានយោធិន និងយោធិននារី ឋានន្តរស័ក្តិថ្នាក់ឧត្តមសេនីយ៍ទោបន្តបន្ទាប់រហូតដល់ថ្នាក់អនុសេនីយ៍ទោ សរុបចំនួន៥០រូប និងមានគ្រូឧទ្ទេស និងអ្នកសម្របសម្រួលមកពីក្រសួងកិច្ចការនារី ចំនួន៦រូប។ បន្ទាប់ពីបានបញ្ចប់វគ្គ សិក្ខាកាមទទួលបានការយល់ដឹងកាន់តែច្បាស់ លើការងារយេនឌ័រនេះ។
មានប្រសាសន៍នៅក្នុងឱកាសនោះ លោកជំទាវ ដាំ ដារីនី បានកោតសរសើរ និងវាយតម្លៃខ្ពស់ចំពោះការរៀបចំនូវវគ្គបណ្ដុះបណ្ដាល ស្ដីអំពីគោលគំនិតយេនឌ័រនេះឡើង ក្នុងគោលបំណងដើម្បីបង្កើនការយល់ដឹង និងអភិវឌ្ឍសមត្ថភាពដល់ថ្នាក់ដឹកនាំក្រុមការងារយេនឌ័រ និងយោធិននៃកងយោធពលខេមរភូមិន្ទ អំពីគោលគំនិតយេនឌ័រ វិធីសាស្ត្រ និងគន្លឹះសំខាន់ៗ ក្នុងការបញ្ជ្រាបយេនឌ័រ លើកកម្ពស់សមភាពយេនឌ័រ និងការបង្កើនភាពអង់អាចដល់ស្ត្រី ប្រសិទ្ធភាពដល់យោធិននារី នៃកងយោធពលខេមរភូមិន្ទ។ លោកជំទាវបានបន្ថែមទៀតថា៖ រាជរដ្ឋាភិបាលនីតិកាលទី៧ នៃរដ្ឋសភា ក្រោមការដឹកនាំរបស់ សម្ដេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានកំណត់ការលើកកម្ពស់សមភាពយេនឌ័រ និងការបង្កើនភាពអង់អាចរបស់ស្ត្រី និងក្មេងស្រីនៅគ្រប់វិស័យជាអាទិភាព ក្នុងរបៀបវារៈគោលនយោបាយតាមរយៈការពង្រឹងភាពជាពលរដ្ឋក្នុងសង្គម ដែលមានអារ្យធម៌ខ្ពស់ ប្រកបដោយសីលធម៌ សមធម៌ និងបរិយាប័ន្ន ដែលនៅក្នុងនោះស្ត្រីគឺជាស្នូល។ លោកជំទាវបានបន្ថែមទៀតថា៖ ក្រសួងការពារជាតិ ក្រោមការដឹកនាំរបស់ ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ជានិច្ចកាលតែងទទួលបានការយកចិត្តទុកដាក់ ក្នុងការលើកកម្ពស់សមភាពយេនឌ័រតាមរយៈការគាំទ្រដល់ការចូលរួមការអនុវត្តការងាររបស់យោធិននារី ក្នុងគ្រប់កិច្ចការ។ លោកជំទាវបានបន្តទៀតថា៖ ក្រសួងការពារជាតិ បានរៀបចំនូវផែនការយុទ្ធសាស្ត្របញ្ជ្រាបយេនឌ័រក្រសួងការពារជាតិដំណាក់កាលទី២ ឆ្នាំ២០២៤-២០២៨ បានបង្ហាញអំពីទស្សនវិស័យរយៈពេល៥ឆ្នាំខាងមុខ ដោយផ្ដោតសំខាន់ទៅលើការពង្រឹងសមត្ថភាព ចំណេះដឹងជំនាញ ការទទួលបាននូវតួនាទីភារកិច្ច និងរបៀបនៃការអនុវត្តការងារ ដើម្បីឲ្យយោធិននារីអាចចូលរួមបានដូចបុរស ក្នុងពេលបច្ចុប្បន្ននេះ ទាំងសមត្ថភាព និងការចូលរួមអនុវត្តការងាររបស់យោធិននារី គឺមានភាពល្អប្រសើរគួរឲ្យកត់សម្គាល់ ក្នុងនោះក៏មានយោធិននារី ដែលមានជំនាញបើកបររថក្រោះ ជំនាញកាំភ្លើងធំ ជំនាញការពារអាកាស ជំនាញសង្គ្រោះ ជំនាញនគរបាលយុត្តិធម៌ និងជំនាញផ្សេងៗជាច្រើនទៀត។ នៅក្នុងនោះការចូលរួមរបស់យោធិននារី ក្នុងកងកម្លាំងរក្សាសន្តិភាពបោសសម្អាតមីន និងកាកសំណល់សង្គ្រាមក្រោមឆត្រអង្គការសហប្រជាជាតិ គឺមានចំនួនកើនឡើង និងមានការវាយតម្លៃក្នុងលទ្ធផលល្អប្រសើរផងដែរ ៕
