នារសៀល ថ្ងៃទី០៨ ខែសីហា ឆ្នាំ២០២៤ ឯកឧត្តម នាយឧត្ដមសេនីយ៍ យន្ត មីន រដ្ឋលេខាធិការក្រសួងការពារជាតិបានអនុញ្ញាតឱ្យលោក ពូល ឌៀន (Paul Dean) ឧបការីរង ទទួលបន្ទុកគ្រប់គ្រង ទប់ស្កាត់ និងរក្សាស្ថិរភាពសព្វាវុធ ក្រសួងការបរទេស សហរដ្ឋអាមេរិក ចូលជួបសម្តែងការគួរសម និងពិភាក្សាការងារ ក្នុងឱកាសដែលរូបលោកដឹកនាំក្រុមការងារមកបំពេញបេសកកម្មនៅកម្ពុជា។
នៅក្នុងឱកាសនោះ នាយឧត្តមសេនីយ៍ យន្ត មីន ក្នុងនាម ឯកឧត្តម ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានលើកឡើងពីទំនាក់ទំនង និងកិច្ចសហប្រតិបត្តិការរវាងកម្ពុជា-សហរដ្ឋអាមេរិក ដែលមានទំនាក់ទំនងការទូតជាមួយគ្នារយៈពេលជាង៧០ឆ្នាំមកហើយ ដែលទំនាក់ទំនងនេះ នៅតែបន្តកិច្ចសហប្រតិបត្តិការដ៏ល្អជាមួយគ្នា បើទោះជានៅមានបញ្ហាប្រឈមខ្លះៗនាពេលកន្លងមកក៏ដោយ។ ឯកឧត្តម បានថ្លៃងអំណរគុណដល់សហរដ្ឋអាមេរិក ដែលបានចូលរួមដល់ដំណើរការបង្រួបបង្រួមជាតិ និងការស្វែងរកសន្តិភាពនៅកម្ពុជា នាដើមទស្សវតរ៍ទី៩០ ក្នុងក្របខណ្ឌអង្គការសហប្រជាជាតិ និងការអភិវឌ្ឍកម្ពុជាឡើងវិញ ទាំងវិស័យកសិកម្ម អប់រំ សុខាភិបាល ការដោះមីន ក៏ដូចជាការជួយឧបត្ថម្ភលើការងារមនុស្សធម៌ផ្សេងៗទៀត។
ក្នុងនាមថ្នាក់ដឹកនាំក្រសួងការពារជាតិ ឯកឧត្តម យន្ត មីន បានវាយតម្លៃខ្ពស់ ចំពោះការចូលរួមចំណែករបស់រដ្ឋាភិបាល កងទ័ព និងប្រជាជនសហរដ្ឋអាមេរិក ក្នុងការពង្រឹង និងពង្រីកទំនាក់ទំនងកិច្ចសហប្រតិបត្តិការនៅជាមួយនឹងរាជរដ្ឋាភិបាល កងទ័ព និងប្រជាជនប្រទេសកម្ពុជា។ ឯកឧត្តម ក៏សូមអរគុណដល់ដំណើរទស្សនកិច្ចរបស់ឯកឧត្តម ឡយ អូស្ទីន រដ្ឋមន្ត្រីក្រសួងការពារជាតិ សហរដ្ឋអាមេរិក នៅកម្ពុជា កាលពីពេលថ្មីៗកន្លងមកនេះ ដើម្បីលើកកម្ពស់ទំនាក់ទំនង និងកិច្ចសហប្រតិបត្តិការល្អ រវាងកម្ពុជា និងសហរដ្ឋអាមេរិក ព្រមទាំងបានថ្លែងអំណរគុណដល់សហរដ្ឋអាមេរិក ដែលបានជួយបណ្ដុះបណ្ដាលធនធានមនុស្សនូវវគ្គខ្លីៗ ដល់កងយោធពលខេមរភូមិន្ទ នាពេលកន្លងមក ដោយឯកឧត្តមចាត់ទុក ការជួយបណ្ដុះបណ្ដាលធនធានមនុស្ស របស់សហរដ្ឋអាមេរិកនេះ គឺបានបង្ហាញពីទំនាក់ទំនងល្អ រវាងប្រទេសទាំងពីរ។ ពាក់ព័ន្ធអំពីបញ្ហា អេ អាយ (AI) នៃការហាមឃាត់ការប្រើប្រាស់ការផលិតអាវុធគីមី អាវុធជីវសាស្រ្ត អាវុធនុយក្លេអ៊ែរ និងវិទ្យុសកម្ម ឯកឧត្តម យន្ត មីន បញ្ជាក់ថា៖ ជារួមពាក់ព័ន្ធនឹងបញ្ហាអាវុធគីមីនេះ កម្ពុជាយោងតាមច្បាប់រដ្ឋធម្មនុញ្ញរបស់ប្រទេសខ្លួនឆ្នាំ១៩៩៣ មាត្រាទី៥៤ បានហាមឃាត់ដាច់ខាតការស្រាវជ្រាវ ការប្រើប្រាស់ ការទុកដាក់ ការចែកចាយ ការផលិត ការសាកល្បង អ្វីៗទាំងអស់ គឺត្រូវបានកំណត់ហាមដាច់ខាតមិនឱ្យមាន នឹងនាំចូលមាននៅកម្ពុជាឡើយ។ កម្ពុជា ឯកភាពចំពោះការសម្រេចរបស់សហគមន៍អន្តរជាតិ ក្នុងការលុបបំបាត់ការប្រើប្រាស់អាវុធគីមី ជីវសាស្ត្រ នុយក្លេអ៊ែរ និងវិទ្យុសកម្ម ដែលអាវុធទាំងនេះនឹងនាំមកនូវមហន្តរាយដល់សន្តិសុខតំបន់ និងពិភពលោកទាំងមូល។
ជាកិច្ចឆ្លើយតប លោក ពូល ឌៀន បានថ្លែងអំណរគុណចំពោះកិច្ចខិតខំរបស់កងទ័ពកម្ពុជា ក្នុងការធ្វើឲ្យប្រសើរឡើងនូវទំនាក់ទំនង រវាងកងទ័ពនៃប្រទេសទាំងពីរ ជាពិសេសទំនាក់ទំនងរវាងប្រជាជន និងប្រជាជន។ លោក ពូល ឌៀន លើកឡើងពីដំណើរទស្សនកិច្ចនាពេលកន្លងមករបស់រដ្ឋមន្ត្រីការពារជាតិអាមេរិកនៅកម្ពុជា ថាជាទស្សនកិច្ចដ៏ល្អមួយក្នុងគោលបំណងពង្រឹងនិងពង្រីកទំនាក់ទំនង និងកិច្ចសហប្រតិបត្តិការជាមួយកម្ពុជា ហើយលោក ពូ ឌៀន ក៏សូមអរគុណដល់ថ្នាក់ដឹកនាំនៃកងយោធពលខេមរភូមិន្ទ ដែលបានសហការធ្វើឲ្យដំណើរទស្សនកិច្ចនេះទទួលបានជោគជ័យ ៕
