ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ នៅព្រឹកថ្ងៃទី០៨ ខែសីហា ឆ្នាំ២០២៤ បានអនុញ្ញាតឱ្យ លោកវរសេនីយ៍ឯក ប៊ែរណាដ ង៉ យូ (Bernard Ng Yu) អនុព័ន្ធយោធាសិង្ហបុរីចប់អាណត្តិ និងលោកវរសេនីយ៍ឯក ឡូវ តិចឡុង (Low Teck Loong) អនុព័ន្ធយោធាសិង្ហបុរីតែងតាំងថ្មីប្រចាំនៅកម្ពុជា ដែលមាននិវេសនដ្ឋាននៅទីក្រុងហាណូយ ប្រទេសវៀតណាម ចូលជួបសម្តែងការគួរសម ជម្រាបលា និងបង្ហាញមុខ ក្នុងឱកាសដែលរូបលោកត្រូវបានបញ្ចប់អាណត្តិការទូតយោធានៅកម្ពុជា នឹងតែងតាំងអនុព័ន្ធថ្មី នៅទីស្ដីការក្រសួងការពារជាតិ។
ក្នុងជំនួបនោះ ឯកឧត្តម នាយឧត្តមសេនីយ៍ ទៀ សីហា បានបញ្ជាក់ជូនអំពីសភាពការណ៍មួយចំនួននៅកម្ពុជា ជាពិសេស សុខសន្តិភាពពេញលេញ ដែលកម្ពុជាមានក្នុងរយៈពេល២៦ឆ្នាំ ព្រមទាំងជោគជ័យ នៃប្រតិបត្តិការណ៍ធំៗ ដែលសម្រេចបាន រួមមាន៖ ការគ្រប់គ្រងជំងឺកូវីដ-១៩ ការធ្វើជាប្រធានកិច្ចប្រជុំកំពូលអាស៊ានលើកទី៤០-៤១ ការប្រកួតកីឡាស៊ីហ្គេម-ប៉ារ៉ាហ្គេម ការបោះឆ្នោតជាតិ និងការរៀបចំរាជរដ្ឋាភិបាលអាណត្តិថ្មី។ ឯកឧត្តម បានរំលេចអំពីទំនាក់ទំនងដ៏យូរអង្វែង រវាងសិង្ហបុរី-កម្ពុជា និងបានចូលរួមអបអរសាទរខួបលើកទី៥៦ ថ្ងៃបុណ្យឯករាជ្យរបស់សិង្ហបុរី និងអបអរសាទរខួបលើកទី៥៦ឆ្នាំ នៃទំនាក់ទំនងការទូតកម្ពុជា-សិង្ហបុរី ដែលប្រទេសទាំងពីរបានភ្ជាប់ទំនាក់ទំនងជាមួយគ្នានៅថ្ងៃទី១៥ ខែកញ្ញា ឆ្នាំ១៩៦៥។ ឯកឧត្តម ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិបន្តថា៖ កន្លងមកក៏ដូចជាបច្ចុប្បន្ន កម្ពុជា និងសិង្ហបុរី មានទំនាក់ទំនងមិត្តភាពល្អជាមួយគ្នា ហើយថ្មីៗនេះ តាមរយៈនៃដំណើរទស្សនកិច្ចរបស់ សម្ដេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា នៅសិង្ហបុរី បានពង្រឹងជាច្រើនលើវិស័យដូចជា សន្តិសុខ នយោបាយ វប្បធម៌សង្គម និងទេសចរណ៍ជាដើម។ ដោយឡែកលើវិស័យយោធា កម្ពុជានិងសិង្ហបុរីក៏មានទំនាក់ទំនង កិច្ចសហប្រតិបត្តិការល្អផងដែរ តាមរយៈការជួយបណ្ដុះបណ្ដាលធនធានមនុស្សដល់កងយោធពលខេមរភូមិន្ទ ទាំងផ្នែកជំនាញកងទ័ពជើងទឹក ភាសាអង់គ្លេស និងវគ្គបញ្ជាការសេនាធិការ។ ឯកឧត្តម ទៀ សីហា បានសម្ដែងការជឿជាក់ថា៖ ទៅថ្ងៃខាងមុខកងទ័ពប្រទេសទាំងពីរ នឹងបន្តពង្រឹងកិច្ចសហប្រតិបត្តិការឲ្យល្អថែមទៀត សំខាន់ការផ្លាស់ប្ដូរគ្រប់កម្រិត ការបណ្តុះបណ្តាលធនធានមនុស្ស ការផ្លាស់ប្ដូរពត៌មានឧក្រិដ្ឋកម្មឆ្លងដែន ការជួញដូរមនុស្ស ជួញដូរអាវុធ ជួញដូរគ្រឿងញៀន និងការធ្វើលំហាត់សង្គ្រោះគ្រោះអន្តរាយ និងមនុស្សធម៌។
ជាកិច្ចឆ្លើយតប លោកវរសេនីយ៍ឯក ប៊ែរណាដ ង៉ យូ (Bernard Ng Yu) បានថ្លែងអំណរគុណចំពោះការលើកឡើងរបស់ ឯកឧត្តម ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិកម្ពុជា អំពីព្រឹត្តិការណ៍នានានៅក្នុងប្រទេសកម្ពុជា ពិសេសជោគជ័យនៃកិច្ចប្រជុំកំពូលអាស៊ាន ដែលកម្ពុជាធ្វើជាម្ចាស់ផ្ទះ បន្ទាប់ពីបើកប្រទេសឡើងវិញ និងការប្រឈមជំងឺកូវីដ-១៩។ លោកវរសេនីយ៍ឯក ប៊ែរណាដ ង៉ យូ (Bernard Ng Yu) ក៏បានអរគុណ និងគាំទ្រចំពោះការលើកឡើងរបស់ឯកឧត្តម ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិកម្ពុជា អំពីការបន្តទំនាក់ទំនង រវាងកងទ័ពប្រទេសទាំងពីរនាថ្ងៃអនាគត ហើយលោកសន្យាថា នឹងខិតខំកសាងកិច្ចសហប្រតិបត្តិការ រវាងកងទ័ពប្រទេសទាំងពីរឱ្យកាន់តែល្អថែមទៀត ៕
