នៅរសៀលថ្ងៃទី២២ ខែកក្កដា ឆ្នាំ២០២៤ ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានអនុញ្ញាតឲ្យ ឯកឧត្តម Anatoly BOROVIK ឯកអគ្គរដ្ឋទូតវិសាមញ្ញ និងពេញសមត្ថភាពសហព័ន្ធរុស្ស៊ី ប្រចាំព្រះរាជាណាចក្រកម្ពុជា ចូលជួបសម្តែងការគួរសមនៅទីស្តីការក្រសួងការពារជាតិ។
ឯកឧត្ដម នាយឧត្ដមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានសម្តែងការស្វាគមន៍ ចំពោះវត្តមាន ឯកឧត្តម Anatoly BOROVIK ឯកអគ្គរដ្ឋទូតវិសាមញ្ញ និងពេញសមត្ថភាពសហព័ន្ធរុស្ស៊ីប្រចាំព្រះរាជាណាចក្រកម្ពុជា ក្នុងការពង្រឹងទំនាក់ទំនងចំណងមិត្តភាព និងសាមគ្គីភាព នៃប្រទេសទាំងពីរ កម្ពុជា និងរុស្ស៊ី ពិសេសនៅលើវិស័យការពារជាតិ នៃប្រទេសទាំងពីរ កាន់តែជិតស្និទ្ធនឹងគ្នា។ ឯកឧត្តម ទៀ សីហា ក៏បានបញ្ជាក់ថា៖ ឆ្នាំនេះគឺជាឆ្នាំមួយ ដែលសហព័ន្ធរុស្ស៊ីបានជួយឧបត្ថម្ភគាំទ្រដល់កម្ពុជា ក្នុងការរក្សាសន្តិភាពនៅកម្ពុជា ក្នុងនោះក៏បានថ្លែងអំណរគុណផងដែរ ចំពោះសហព័ន្ធរុស្ស៊ី ក្នុងការបន្តជួយឧបត្ថម្ភដល់កម្ពុជាជាបន្តទៅទៀតនេះ។
ក្នុងឱកាសនោះ ឯកឧត្តម Anatoly BOROVIK ឯកអគ្គរដ្ឋទូតវិសាមញ្ញ និងពេញសមត្ថភាពសហព័ន្ធរុស្ស៊ីប្រចាំព្រះរាជាណាចក្រកម្ពុជា បានសម្តែងនូវការសោកស្ដាយ និងក្ដីសង្ឃឹមការរកឃើញចំពោះការបាត់បង់ការទាក់ទងនៃឧទ្ធម្ភាគចក្រកងទ័ពជើងអាកាស នៃកងយោធពលខេមរភូមិន្ទ នៃតំបន់ជួរភ្នំក្រវាញ កំពុងហ្វឹកហាត់នៅថ្ងៃ ១២ ខែកក្កដា ឆ្នាំ២០២៤កន្លងទៅនេះ។ ជាមួយគ្នានេះ ឯកឧត្តម បានជម្រាបជូនផងដែរ អំពីដំណើរទស្សនកិច្ចនៅលទ្ធផលជាផ្លែផ្កាមួយចំនួន របស់គណៈប្រតិភូនៃកងយោធពលខេមរភូមិន្ទ ចំនួន៣ក្រុម ដែលបានអញ្ជើញទៅកាន់សហព័ន្ធរុស្ស៊ី ក្នុងនោះមានប្រតិភូនាយកដ្ឋាននីតិកម្ម គឺសម្រាប់វិជ្ជាដឹកនាំដោយ ឧត្តមសេនីយ៍ឯក ម៉មសុផាត ឣប្រតិភូទ័ពជើងទឹកដឹកនាំដោយ ឧត្តមនាវីឯក ស្រ៊ុន សារឿន និងប្រតិភូកងទ័ពជើងគោកដឹកនាំដោយ នាយឧត្តមសេនីយ៍ ម៉ៅ សុផាន់។
ឯកឧត្តម ឯកអគ្គរដ្ឋទូតវិសាមញ្ញ និងពេញសមត្ថភាពសហព័ន្ធរុស្ស៊ី ប្រចាំព្រះរាជាណាចក្រកម្ពុជា បានបញ្ជាក់ថា៖ ភាគីរុស្ស៊ីបានត្រៀមខ្លួន និងបំណងប្រាថ្នារបស់ខ្លួន ក្នុងការជួយដល់កម្ពុជា ក្នុងការបង្កើតសាលារថក្រោះនៅព្រះរាជាណាចក្រកម្ពុជា តាមសំណើរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី ដែលបានលើកឡើងនៅក្នុងឆ្នាំ២០២១ ព្រមទាំងការជួយបណ្ដុះបណ្ដាលគ្រូយោធាចារ្យជំនាញរថក្រោះ ២៦នាក់ នៃការផ្តល់ឧបករណ៍សម្ភារៈសម្រាប់ជួសជុលផងដែរ។ ឯកឧត្តម ឯកអគ្គរដ្ឋទូតសហព័ន្ធរុស្ស៊ី បានលើកឡើងថា៖ នៅឆ្នាំនេះយើងនឹងរំពឹងថា យើងចរចាជាលើកដំបូង រវាងមេបញ្ជាការ បញ្ជាការដ្ឋានកងទ័ពជើងគោករុស្ស៊ី និងកម្ពុជា នៅចុងឆ្នាំនេះ និងដើមឆ្នាំក្រោយ ក្នុងកិច្ចសហប្រតិបត្តិការស្របតាមខ្លឹមសារ នៃអនុស្សរណៈរបស់ក្រសួងការពារជាតិ ដែលមានរួចមកហើយ ក្នុងនោះឯកឧត្តម ឯកអគ្គរដ្ឋទូតសហព័ន្ធរុស្ស៊ី ក៏បានលើកឡើងឲ្យភាគីកម្ពុជាពិនិត្យមើល និងពិចារណាផងដែរ អំពីលទ្ធភាពក្នុងការធ្វើកិច្ចសហប្រតិបត្តិការនៅលើផ្នែកសន្តិសុខ និងជីវសាស្ត្រជាមួយនឹងរុស្ស៊ី ដែលរង្ស៊ីចាត់ទុកជាបញ្ហាសំខាន់នៅពេលបច្ចុប្បន្ននេះ ៕
