កាលពីររសៀលថ្ងៃទី២២ ខែកក្កដា ឆ្នាំ២០២៤ ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ អនុញ្ញាតឲ្យ ឯកឧត្តម ង្វៀន ហ៊ុយតាំង (Nguyen Huy Tang) ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋសង្គមនិយមវៀតណាម ប្រចាំព្រះរាជាណាចក្រកម្ពុជា ចូលជួបសម្តែងការគួរសម និងពិភាក្សាការងារ។ ក្នុងឱកាសនោះ នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ សំដែងអំណរគុណ ចំពោះឯកឧត្តម ង្វៀន ហ៊ុយតាំង ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋសង្គមនិយមវៀតណាម ប្រចាំព្រះរាជាណាចក្រកម្ពុជា ដែលបានជួយសម្របសម្រួលដល់ថ្នាក់កំពូលប្រទេសទាំងពីរ បានជួបប្រាស្រ័យទំនាក់ទំនងផ្លាស់ប្តូរមតិជាមួយគ្នាបានយ៉ាងជោគជ័យ និងការយកចិត្តទុកដាក់ចំពោះវិស័យការពារជាតិ ព្រមទាំងបានសហប្រតិបត្តិការនៅលើវិស័យផ្សេងៗដទៃទៀត។
ឯកឧត្តម ង្វៀន ហ៊ុយតាំង ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋសង្គមនិយមវៀតណាមប្រចាំព្រះរាជាណាចក្រកម្ពុជា បានសម្តែងនូវការរីករាយ និងវាយតម្លៃខ្ពស់ ចំពោះការរីកចម្រើន នៃទំនាក់ទំនងរវាងប្រទេសទាំងពីរតាំងពីពេលកន្លងមក ក្នុងនោះលើទំនាក់ទំនង និងកិច្ចសហប្រតិបត្តិការ រវាងក្រសួងការពារជាតិទាំងពីរ កម្ពុជា និងវៀតណាម គឺមានតួនាទីយ៉ាងសំខាន់ បក្សរដ្ឋ និងប្រជាជនចងចាំជានិច្ច ចំពោះការជួយឧបត្ថម្ភគាំទ្រពីថ្នាក់ដឹកនាំ និងប្រជាជនកម្ពុជា ចំពោះការតស៊ូដណ្ដើមឯករាជ្យជាតិ ឯកភាពទឹកដី ក៏ដូចជាការកសាង និងការពារមាតុភូមិវៀតណាមនាពេលបច្ចុប្បន្ននេះ។ ក្នុងឱកាសនោះដែរឯកឧត្តម ឯកអគ្គរដ្ឋទូតវៀតណាម ក៏បានលើកជាសំណើមួយចំនួនពាក់ព័ន្ធដល់កិច្ចសហប្រតិបត្តិការ រវាងក្រសួងការពារជាតិ នៃប្រទេសទាំងពីរ ហើយសង្ឃឹមថា ឯកឧត្តម ឧបនាយរដ្ឋមន្ត្រី រដ្ឋមន្ត្រីក្រសួងការពារជាតិ និងគាំទ្រ។ ក្នុងនោះទី១៖ បន្តអនុវត្តឲ្យកាន់តែល្អការផ្លាស់ប្តូរគណៈប្រតិភូថ្នាក់រដ្ឋមន្ត្រី និងគ្រប់ជាន់ថ្នាក់ នៃក្រសួងការពារជាតិនៃប្រទេសទាំងពីរ ផ្លាស់ប្តូរព័ត៌មានពីគ្នាទៅវិញទៅមក ចែករំលែកបទពិសោធ និងទស្សនៈពាក់ព័ន្ធកិច្ចការនានា។ ទី២៖ បន្តអនុវត្តឲ្យមានប្រសិទ្ធភាពនូវយន្តការសហប្រតិបត្តិការដែលមានស្រាប់ រវាងក្រសួងការពារជាតិទាំង២ ក្នុងនោះក៏ស្វែងរកសហប្រតិបត្តិការថ្មីសមស្រប និងមានប្រសិទ្ធភាពនាំមកនូវផលប្រយោជន៍សម្រាប់ទាំងសងខាង។ ទី៣៖ បន្តលើកកម្ពស់ប្រកបដោយគុណភាព និងប្រសិទ្ធភាពរួមមានការបន្តអនុវត្តឲ្យល្អ នៅលើពិធីសារសហប្រតិបត្តិការ៥ឆ្នាំ ហើយនិងផែនការរៀងរាល់ឆ្នាំរវាងក្រសួងការពារជាតិ ការចែករំលែកព័ត៌មានពាក់ព័ន្ធដល់ឧបាយកលរបស់កម្លាំងអមិត្ត ដែលចង់បំផ្លិចបំផ្លាញប្រទេសជាតិ និងទំនាក់ទំនងប្រទេសទាំង២ ហើយយើងនឹងបន្តសហការឲ្យបានល្អ មិនឱ្យកម្លាំងអមិត្តណាមួយប្រើដែនដីរបស់ម្ខាងមកប្រឆាំងនឹងម្ខាងទៀត។ ជាមួយគ្នានេះបន្តសហការជិតស្និទ្ធ បណ្ដាយោធភូមិភាគ និងផ្នែកកងទ័ពជំនាញប្រទេសទាំង២ ជាពិសេសនៅក្នុងការល្បាតរួម និងសង្គ្រោះពេលមាន ហានិភ័យនៅតាមបណ្ដោយព្រំដែន និងនៅលើផ្ទៃសមុទ្រ ព្រមទាំងការសហការបណ្ដុះបណ្ដាលនាយពលទាហាន នៃកងទ័ពយើងទាំងពីរ វៀតណាម និងកម្ពុជា ៕
