នៅក្នុងដំណើរបំពេញទស្សនកិច្ចនៅកម្ពុជា ឯកឧត្តម Atul Khare អគ្គលេខាធិការរង អង្គការសហប្រជាជាតិ បានអញ្ជើញចូលជួបសម្តែងការគួរសមចំពោះ សម្ដេចពិជ័យសេនា ទៀ បាញ់ ឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា នារសៀលថ្ងៃទី២២ ខែកក្កដា ឆ្នាំ២០២៤ នៅទីស្ដីការក្រសួងការពារជាតិ។
ក្នុងឱកាសនោះ សម្ដេចពិជ័យសេនា ទៀ បាញ់ បានមានប្រសាសន៍ថា៖ ព្រះរាជាណាចក្រកម្ពុជា ជាង៣០ឆ្នាំកន្លងមកនេះ ធ្លាប់បានទទួលអង្គការសហប្រជាជាតិ ជាពិសេសកម្លាំងប្រតិបត្តិការរក្សាសន្តិភាពមកបំពេញការងារនៅព្រះរាជាណាចក្រកម្ពុជាផងដែរ។ សម្ដេចពិជ័យសេនា ក៏បានសម្តែងនូវការរីករាយ ដែលនេះបញ្ជាក់ពីការយកចិត្តទុកដាក់ ការរក្សាសន្តិភាព ដែលបច្ច័យចម្បងណាស់សម្រាប់ពិភពលោកយើងសព្វថ្ងៃនេះ ហើយក៏ចាំបាច់ជាទីបំផុត។ សម្ដេចពិជ័យសេនា បានថ្លែងនូវការកោតសរសើរចំពោះ ឯកឧត្តម អគ្គលេខាធិការរង ដែលទទួលបន្ទុកកម្លាំងប្រតិបត្តិការ ដែលតែងតែយកចិត្តទុកដាក់ និងផ្តល់នូវការលើកទឹកចិត្តដល់កម្ពុជា ទោះបីមានភាពលំបាកខ្លះនៅតែជួយលើកទឹកចិត្តដល់ការប្រតិបត្តិការនេះ។ សម្ដេចពិជ័យសេនា ទៀ បាញ់ បានបញ្ជាក់ថា៖ រាជរដ្ឋាភិបាលព្រះរាជាណាចក្រកម្ពុជា នៅតែប្ដេជ្ញាបន្តបំពេញភារៈកិច្ចនេះដ៏សកម្មតទៅទៀត ពិតប្រាកដណាស់ចាប់តាំងពីឆ្នាំ២០០៦ កម្ពុជាបានចាត់បញ្ជូនកម្លាំង១៣៥នាក់ ជាលើកដំបូងទៅប្រទេសស៊ូដង់ ក្នុងរយៈពេល១៨ឆ្នាំកន្លងមកនេះ យើងបានបញ្ជូនទៅជិតមួយម៉ឺននាក់ ចេញទៅប្រតិបត្តិការរក្សាសន្តិភាពអង្គការសហប្រជាជាតិ ហើយបច្ចុប្បន្ននៅរក្សាកម្លាំងនៅ៥ប្រទេស មានកម្លាំងជាង៦០០នាក់។ ជាមួយគ្នានេះ សម្តេចពិជ័យសេនា ក៏បានលើកអំពីការកង្វល់ខ្លះៗជុំវិញការប៉ះទង្គិចគ្នានៅតាមបណ្ដោយព្រំដែន នៅក្នុងប្រទេសលីបង់ ដែលមានពេលខ្លះចូលកៀកនៅកន្លែងឈរជើងរបស់កម្លាំងរក្សាសន្តិភាពអង្គការសហប្រជាជាតិផងដែរ។
ឯកឧត្តម Atul Khare អគ្គលេខាធិការរង អង្គការសហប្រជាជាតិ បានមានប្រសាសន៍ថា៖ ទោះបី សម្ដេចពិជ័យសេនា ទៀ បាញ់ មិនឋិតក្នុងតំណែងជាឧបនាយករដ្ឋមន្ត្រី រដ្ឋមន្ត្រីការពារជាតិក៏ពិតមែនតែ សម្ដេចពិជ័យសេនា ពិតជាពិសេសទាំងអតីតកាល និងបច្ចុប្បន្នសម្រាប់រូបលោក។ ឯកឧត្តមក៏បានជម្រាបអំពីជំនួបជាមួយនឹង សម្ដេចតេជោ ហ៊ុន សែន និងសម្ដេចបវរធិបតី នាយករដ្ឋមន្ត្រី នាព្រឹកថ្ងៃទី២២ ខែកក្កដា ហើយក៏បានអរគុណចំពោះ សម្ដេចពិជ័យសេនា ដែលអាចបន្តភាពជាដៃគូជាមួយកងរក្សាសន្តិភាពកម្ពុជា និងអង្គការសហប្រជាជាតិ ដែលបច្ចុប្បន្នកម្ពុជាបាននិងកំពុងចាត់បញ្ជូនកម្លាំងបំពេញបេសកកម្មអង្គការសហប្រជាជាតិ ចំនួន៦៥០នាក់ ទាំងបុរស និងស្ត្រី ក្នុងនោះបេសកកម្មនៅប្រទេសលីបង់ និងបណ្ដាប្រទេសផ្សេងៗទៀតផងដែរ។ ឯកឧត្តម Atul Khare អគ្គលេខាធិការរង អង្គការសហប្រជាជាតិ បានអរគុណចំពោះប្រទេសកម្ពុជា ដែលបានចូលរួមចំណែកពីពេលកន្លងមក ក្នុងការបញ្ជូនកងកម្លាំងរក្សាសន្តិភាព ហើយសូមចូលរួមនូវការសោកស្ដាយដែរ ចំពោះការបាត់បង់នូវកម្លាំងរក្សាសន្តិភាពកម្ពុជាចំនួន១១នាក់ ក្នុងបេសកកម្មអង្គការសហប្រជាជាតិ ក្នុងនោះក៏បានថ្លែងអំណរគុណផងដែរ ចំពោះកម្ពុជាដែលបានបញ្ជូនកងកម្លាំងរក្សាសន្តិភាពជាស្ត្រី ប្រហែល៣០ភាគរយ នៃកងកម្លាំងអង្គការសហប្រជាជាតិជាស្ត្រី។ ឯកឧត្ដមសង្ឃឹមថា៖ កម្ពុជានឹងបន្តចូលរួមកាន់តែច្រើនថែមទៀត ចំពោះកងកម្លាំងជាស្ត្រី ឯកឧត្តម Atul Khare បានបញ្ជាក់ថា៖ កម្ពុជាទទួលបានចំណាត់ថ្នាក់ជាប្រទេសធំជាងគេទី២៧ ដែលបានចូលរួមចំណែកក្នុងការបញ្ជូនកងកម្លាំងរក្សាសន្តិភាព នៅទូទាំងពិភពលោក ៕
