រសៀលថ្ងៃទី១៨ ខែកក្កដា ឆ្នាំ២០២៤ នាយឧត្តមសេនីយ៍ ចាយ សាំងយុន រដ្ឋលេខាធិការប្រចាំការ ក្រសួងការពារជាតិ បានបើកកិច្ចប្រជុំពិភាក្សា អំពីការត្រៀមរៀបចំពិធីអបអរសាទរ នៃការបើកការដ្ឋានសាងសង់ ព្រែកជីកហ្វូណនតេជោ ទៅតាមគម្រោងរបស់ប្រមុខរាជរដ្ឋាភិបាលកម្ពុជា ដែលនឹងប្រព្រឹត្តទៅនៅថ្ងៃទី០៥ ខែសីហា ឆ្នាំ២០២៤ ខាងមុខនេះ។ កិច្ចប្រជុំបានប្រព្រឹត្តទៅដោយមានការចូលរួមពីសំណាក់ ឯកឧត្តម ជាអគ្គនាយក ស្ថាប័នចំណុះក្រសួងការពារជាតិ តំណាងស្ថាប័នកងទ័ពទាំង៣ប្រភេទ ជាច្រើនរូបផងដែរ។
ក្នុងកិច្ចប្រជុំនោះ នាយឧត្តមសេនីយ៍ ចាយ សាំងយុន បានមានប្រសាសន៍ថា៖ ដូចដែលយើងទាំងអស់គ្នាបានដឹងហើយថា នៅក្នុងសម័យប្រជុំពេញអង្គគណៈរដ្ឋមន្ត្រី កាលពីថ្ងៃទី០៥ ខែកក្កដា ឆ្នាំ២០២៤ កន្លងមកនេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានធ្វើការណែនាំដល់គ្រប់បណ្ដាក្រសួង ស្ថាប័ន រាជធានី ខេត្ត ដើម្បីចូលរួមអបអរសាទរ នៃការរៀបចំបើកការដ្ឋានសាងសង់ ព្រែកជីកហ្វូណនតេជោ ដែលនឹងប្រព្រឹត្តទៅនៅថ្ងៃទី០៥ ខែសីហា ឆ្នាំ២០២៤ ខាងមុខនេះ។ ទន្ទឹមនឹងនេះដែរ ដើម្បីអនុវត្តសារាចរណ៍ និងសេចក្តីណែនាំរបស់ប្រមុខរាជរដ្ឋាភិបាលឲ្យមានប្រសិទ្ធភាព នៅថ្ងៃទី១៥ ខែកក្កដា ឆ្នាំ២០២៤ កន្លងមកនេះ ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ក៏បានចេញសេចក្តីណែនាំ ជូនដល់គ្រប់កងឯកភាពទូទាំងកងយោធពលខេមរភូមិន្ទ ដើម្បីត្រៀមរៀបចំអបអរសាទរពិធីបើកការដ្ឋានសាងសង់ ព្រែកជីកហ្វូណនតេជោ នេះ នៅមុខក្រសួងការពារជាតិ និងនៅតាមគ្រប់បណ្ដាកងឯកភាពទូទាំងកងយោធពលខេមរភូមិន្ទ ដោយមានការរៀបចំកម្លាំងចូលរួម ការទូងស្គរជ័យ និងការរៀបចំតុបតែងជាទង់ជាតិ ទង់ជ្វាលា ទង់សាសនា បដា ទៅតាមការណែនាំរបស់គណៈកម្មការរៀបចំបុណ្យជាតិ និងអន្តរជាតិ ដើម្បីបញ្ជាក់អំពីស្មារតីសាមគ្គីភាពជាតិតែមួយ។ ចំពោះពិធីបើកការដ្ឋានផ្លូវការ និងប្រព្រឹត្តទៅនៅថ្ងៃទី០៥ ហើយកក្កដា ឆ្នាំ២០២៤ ស្ថិតនៅភូមិព្រែកតាកែវ ឃុំសំរោងធំ ស្រុកកៀនស្វាយ ខេត្តកណ្ដាល ក្រោមអធិបតីភាពដ៏ខ្ពង់ខ្ពស់របស់ សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត។ ឯកឧត្តម រដ្ឋលេខាធិការប្រចាំការ ក្រសួងការពារជាតិ បានធ្វើការណែនាំ ដល់គ្រប់បណ្ដាកងឯកភាព ឱ្យរៀបចំដើម្បីចូលរួមអបអរសាទរបើកការដ្ឋាននេះ ដោយឡែកក្រសួងការពារជាតិ គឺប្រារព្ធធ្វើឡើងនៅមុខទីស្តីការក្រសួងការពារជាតិ ដោយមានការត្រៀមរៀបចំចងទង់ជាតិ ទង់ជ្វាលា ទង់សាសនា បដា ព្រះឆាយាល័ក្ខណ៍ របស់ព្រះមហាក្សត្រ រំលេចដោយផ្កាភ្ញី រៀបចំស្គរជ័យ សម្រាប់ទូងអបអរសាទរ រៀបចំការបាញ់កាំជ្រួច និងការរៀបចំកម្លាំងកងទ័ពទាំង៣ប្រភេទទ័ព ចូលរួមក្នុងពិធីនេះប្រមាណជា ១,៥០០នាក់ ផងដែរ។ នាយឧត្តមសេនីយ៍ ចាយ សាំយុន បានស្នើឲ្យគ្រប់ស្ថាប័នពាក់ព័ន្ធទាំងអស់រួមគ្នាធ្វើ រួមគ្នារៀបចំ ឱ្យមានសោភណ្ឌភាព ប្រកបដោយអត្ថន័យដ៏ជ្រាលជ្រៅ ជាប្រវត្តិសាស្ត្រ។
សូមបញ្ជាក់ថា៖ គម្រោងសាងសង់ ព្រែកជីកហ្វូណនតេជោ គឺជាគម្រោងប្រវត្តិសាស្ត្រលើកទី១ ក្នុងវិស័យដឹកជញ្ជូនផ្លូវទឹករបស់កម្ពុជា ដើម្បីតភ្ជាប់ប្រព័ន្ធទន្លេមេគង្គ និងផ្លូវសមុទ្រ។ លក្ខណៈបច្ចេកទេសទូទៅ របស់ផ្លូវទឹក មានប្រវែងប្រមាណ ១៨០គីឡូម៉ែត្រ ចាប់ផ្តើមពីព្រែកតាកែវនៃទន្លេមេគង្គ ឆ្លងកាត់តាមព្រែកតាឯកនៃទន្លេបាសាក់ រួចចូលតាមព្រែកតាហ៊ីងនៃទន្លេបាសាក់ ស្រុកកោះធំ និងបន្តរហូតដល់សមុទ្រ ខេត្តកែប ដោយឆ្លងកាត់ខេត្តចំនួន៤ រួមមាន៖ ខេត្តកណ្តាល តាកែវ កំពត និងកែប ដែលមានប្រជាជនសរុបប្រមាណ ១,៦លាននាក់ រស់នៅអមសងខាងផ្លូវទឹកនេះ។ ផ្លូវទឹកនេះមានទទឹងមុខកាត់ផ្នែកខាងលើប្រវែង ១០០ម៉ែត្រ និងមុខកាត់ផ្នែកខាងក្រោមប្រមាណ ៨០ម៉ែត្រ និងជម្រៅទឹកប្រមាណ ៥,៤ ម៉ែត្រ (ជម្រៅនាវាចរណ៍ ៤,៧ម៉ែត្រ និងគម្លាតសុវត្ថិភាព ០,៧ម៉ែត្រ) និងមានគន្លងនាវាចរណ៍ចំនួន២គន្លង អាចចេញ-ចូល និងចៀសគ្នាបានដោយសុវត្ថិភាព ៕
