កងរាជអាវុធហត្ថលើផ្ទៃប្រទេស បានរំឭកខួបអនុស្សាវរីយ៍លើកទី៣១ នៃការបង្កើតកងរាជអាវុធហត្ថ (១៤ កក្កដា ១៩៩៣-១៤ កក្កដា ២០២៤) ដែលបានប្រព្រឹត្តទៅនៅព្រឹកថ្ងៃទី១៤ ខែកក្កដា ឆ្នាំ២០២៤ នៅវិទ្យាស្ថានកងរាជអាវុធហត្ថកំបូល ក្រោមអធិបតីភាពដ៏ខ្ពង់ខ្ពស់ ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ។
នៅក្នុងសុន្ទរកថាស្វាគមន៍របស់ នាយឧត្តមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេសបានរំឭកថា៖ កងរាជអាវុធហត្ថត្រូវបានបង្កើតឡើងចែកចេញជា២ដំណាក់កាល ដំណាក់កាលទី១ នៅថ្ងៃទី២៧ ខែកញ្ញា ឆ្នាំ១៩៥៧ បន្ទាប់ពីព្រះរាជាណាចក្រកម្ពុជា ទទួលបានឯករាជ្យ រហូតដល់ថ្ងៃទី១៧ ខែមេសា ឆ្នាំ១៩៧៥។ ដំណាក់កាលទី២ ចាប់តាំងពីថ្ងៃទី១៤ ខែកក្កដា ឆ្នាំ១៩៩៣ ហើយការប្រារព្ធពិធីឡើងនាពេលនេះ ក្នុងវត្ថុបំណងរំឭកឡើងវិញនូវអនុស្សាវរីយ៍ នៃការបង្កើតកសាងប្រតិបត្តិតួនាទីភារៈកិច្ច និងការអភិវឌ្ឍរបស់កងរាជអាវុធហត្ថ។ នៅក្នុងរយៈពេល៣១ឆ្នាំមកនេះ កងរាជអាវុធហត្ថបានកសាងហេដ្ឋារចនាសម្ព័ន្ធទាំងរឹងទាំងទន់ និងប្រតិបត្តិការនៃតួនាទីភារកិច្ចយ៉ាងអង់អាចក្លាហាន និងមោះមុតបំផុត ដែលមានចែងក្នុងលិខិតបទដ្ឋានគតិយុត្ត ក្នុងការរួមចំណែកក្នុងការការពារសន្តិសុខ រក្សាសណ្តាប់ធ្នាប់ បង្ក្រាបបទល្មើស ការពង្រឹងការអនុវត្តកសាងព្រះរាជាណាចក្រកម្ពុជា ជាប្រទេសនីតិរដ្ឋ។ នាយឧត្តមសេនីយ៍ បានបន្ថែមថា៖ កងរាជអាវុធហត្ថលើផ្ទៃប្រទេសបានធ្វើសកម្មភាពយ៉ាងសកម្ម ចុះនៅតាមមូលដ្ឋាន តាមការចាត់តាំង ដើម្បីគាំទ្រការអនុវត្តកម្មវិធីនយោបាយរបស់រាជរដ្ឋាភិបាល ក្នុងការជួយប្រជាជន នឹងគាំទ្រអាជ្ញាធរនៅតាមមូលដ្ឋានជាដើម។ ជាមួយគ្នានេះដែរ នាយឧត្តមសេនីយ៍ សៅ សុខា បានគូសបញ្ជាក់ថា៖ កងរាជអាវុធហត្ថលើផ្ទៃប្រទេស ប្រកាសប្ដេជ្ញាគាំទ្រចូលរួមអនុវត្តដោយមនសិការទទួលខុសត្រូវខ្ពស់ កម្មវិធីនយោបាយរបស់រាជរដ្ឋាភិបាលអាណត្តិទី៧ ជាពិសេសគាំទ្រយ៉ាងពេញទំហឹងគម្រោងព្រែកជីកហ្វូណនតេជោ ដែលនឹងបើកការដ្ឋានសាងសង់នៅថ្ងៃទី០៥ ខែសីហា ឆ្នាំ២០២៤។
ថ្លែងក្នុងអង្គពិធីរំឭកខួបលើកទី៣១ កងរាជអាវុធហត្ថ នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានសម្តែងនូវការអបអរសាទរ កោតសរសើរ និងវាយតម្លៃខ្ពស់ ចំពោះសមិទ្ធផលស្នាដៃ និងសកម្មភាពការងារលេចធ្លោ នៅក្នុងរយៈពេល៣១ឆ្នាំកន្លងមករបស់កងរាជអាវុធហត្ថ និយាយជារួម និងនិយាយដោយឡែក នៅក្នុងរយៈពេល១ឆ្នាំចុងក្រោយនេះ ដែលមេបញ្ជាការនាយទាហាន និងពលទាហាន នៃរាជអាវុធហត្ថគ្រប់លំដាប់ថ្នាក់ បានសាមគ្គីឯកភាពជាធ្លុងមួយទទួលខុសត្រូវក្នុងការអនុវត្តតួនាទីភារកិច្ចស្របនឹងគោលនយោបាយការពារជាតិ ផែនការកំណែទម្រង់កងយោធពលខេមរភូមិន្ទ បានរួមចំណែកយ៉ាងសកម្មក្នុងការអនុវត្តកម្មវិធីនយោបាយយុទ្ធសាស្ត្របញ្ចកោណដំណាក់កាលទី១ កម្មវិធីនយោបាយនានា របស់រាជរដ្ឋាភិបាល ព្រមទាំងបានសហការជម្នះរាល់ឧបសគ្គ ប្រកៀកស្មាគ្នាជាមួយកងកម្លាំងប្រដាប់អាវុធ និងអាជ្ញាធរមានសមត្ថកិច្ចពាក់ព័ន្ធ តស៊ូប្តូរផ្តាច់ការពារសន្តិសុខ រៀបចំសណ្តាប់ធ្នាប់រៀបរយ រក្សាសុវត្ថិភាពទាំងដោយផ្ទាល់ និងប្រយោល ជូនគណៈប្រតិភូជាតិ និងអន្តរជាតិ កិច្ចប្រជុំវេទិកាតូចធំ ពិធីសម្ពោធសមិទ្ធផលនានា របស់ព្រះមហាក្សត្រ រាជរដ្ឋាភិបាល និងពិធីបុណ្យផ្សេងៗ ជាពិសេសការបោះឆ្នោតជ្រើសតាំងតំណាងរាស្ត្រនីតិកាលទី៧ ឆ្នាំ២០២៣, ការបោះឆ្នោតជ្រើសតាំងសមាជិកព្រឹទ្ធសភានីតិកាលទី៥ និងបោះឆ្នោតជ្រើសតាំងក្រុមប្រឹក្សារាជធានីខេត្ត ក្រុងប្រឹក្សាក្រុង ស្រុក ខណ្ឌអាណត្តិទី៤ ក្នុងឆ្នាំ២០២៤នេះ ប្រព្រឹត្តទៅដោយរលូន។ ឯកឧត្តម រដ្ឋមន្ត្រីបានបន្តថា៖ រហូតមកដល់ពេលនេះរាជរដ្ឋាភិបាលនីតិកាលទី៧ នៃរដ្ឋសភា ក្រោមការដឹកនាំរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកំពុងគ្រប់គ្រងប្រទេសប្រកបដោយជោគជ័យ សន្តិភាព និងស្ថិរភាពនយោបាយ ដោយត្រូវបានការពារយ៉ាងរឹងមាំសន្តិសុខសណ្ដាប់ធ្នាប់ សុវត្ថិភាពសង្គម មានភាពល្អប្រសើរ សេដ្ឋកិច្ចបន្តមានកំណើន សង្គមមានស្ថិរភាពបានធ្វើឲ្យកិត្យានុភាពជាតិកាន់តែលើកកម្ពស់លើឆាកអន្តរជាតិ។ នាយឧត្តមសេនីយ៍ ទៀ សីហា មានជំនឿមុតមាំថា៖ កងរាជអាវុធហត្ថ និងបន្តប្រតិបត្តិនូវតួនាទី និងភារកិច្ចកាន់តែល្អប្រសើរ មានប្រសិទ្ធភាពខ្ពស់ បង្កើននូវសមិទ្ធផលនិងស្នាដៃថ្មីៗបន្ថែមទៀត ជាមួយនឹងការធ្វើទំនើបកម្មធនធានមនុស្ស ធនធានសម្ភារៈ គ្រប់ផ្នែកគ្រប់វិស័យប្រកបដោយស្ថិរភាពអង់អាចក្លាហានភក្ដីភាព ដើម្បីបុព្វហេតុអធិបតេយ្យបូរណភាពដែនដី សន្តិភាព ស្ថិរភាពនយោបាយ សន្តិសុខសណ្ដាប់ធ្នាប់សាធារណៈ រួមចំណែកយ៉ាងសំខាន់ក្នុងការអភិវឌ្ឍសេដ្ឋកិច្ចសង្គមនៅកម្ពុជា។
នៅក្នុងឱកាសនោះដែរ នាយឧត្តមសេនីយ៍ ទៀ សីហា ក៏បានលើកឡើងអំពីការស្វះស្វែងរកការបាត់ទំនាក់ទំនងឧទ្ធម្ភាគចក្ររបស់កងទ័ពអាកាស នៃកងយោធពលខេមរភូមិន្ទ និងអំពីការវិវឌ្ឍរីកចម្រើន នៃប្រព័ន្ធបច្ចេកវិទ្យាបញ្ញាសិប្បនិម្មិត(AI)នាពេលបច្ចុប្បន្ន។ ហើយឆ្លៀតឱកាលនោះដែរ រួមជាមួយថ្នាក់ដឹកនាំក្រសួងការពារជាតិ និងថ្នាក់ដឹកនាំអគ្គបញ្ជាការកងយោធពលខេមរភូមិន្ទ ក៏បានផ្ដល់កិត្តិយសបញ្ចុះបឋមសិលា បើកការដ្ឋានសាងសង់សាលមហោស្រពគោកធ្លកកងរាជអាវុធហត្ថ ដែលមានទំហំ២,០៣២ម៉ែត្រការ៉េ ដែលគ្រោងនឹងចំណាយថវិកាអស់២លាន៥សែនដុល្លារអាមេរិក ដែលជាគម្រោងមួយក្នុងគម្រោង២២ មាននៅក្នុងផែនការប្លង់ស្ថាបត្យកម្ម នៃវិទ្យាស្ថានកងរាជអាវុធហត្ថកំបូល ៕
