គណៈកម្មាធិការប្រយុទ្ធប្រឆាំងគ្រឿងញៀន ក្រសួងការពារជាតិ ព្រឹកថ្ងៃទី១១ ខែកក្កដា ២០២៤ បានធ្វើការប្រជុំឆ្លងរបាយការណ៏ ស្តីពីលទ្ធផលការងារប្រយុទ្ធប្រឆាំងគ្រឿងញៀនប្រចាំឆមាសទី១ និងលើកទិសដៅ ឆមាសទី២ ឆ្នាំ២០២៤ ក្រោមវត្តមាន នាយឧត្តសេនីយ៏ ចាយ សាំងយុន រដ្ឋលេខាធិការ និងជាប្រធានគណៈកម្មាធិការ ប្រយុទ្ធប្រឆាំងគ្រឿងញៀន ក្រសួងការពារជាតិ។
ក្នុងរបាយការណ៏បានឲ្យដឹងថា៖ ដោយមានការយកចិត្តទុកដាក់អនុវត្តតាមផែនការជាតិ ស្ដីពីការត្រួតពិនិត្យ គ្រឿងញៀន និងផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី៨ ក៏ដូចជាផែនការសកម្មភាព របស់គណៈកម្មាធិការប្រយុទ្ធប្រឆាំងគ្រឿងញៀន ក្រសួងការពារជាតិ នៅក្នុងឆមាសទី១ ឆ្នាំ ២០២៤កន្លងទៅនេះ អគ្គលេខាធិការដ្ឋាន អគ្គនាយកដ្ឋាន នាយកដ្ឋាន និងស្ថាប័នចំណុះក្រសួងការពារជាតិ, អគ្គបញ្ជាការដ្ឋាន, បញ្ជាការដ្ឋានកងទ័ពជើងគោក, ជើងទឹក, ជើងអាកាស, កងរាជអាវុធហត្ថលើផ្ទៃប្រទេស, បញ្ជាការដ្ឋានអង្គរក្ស ព្រមទាំងអង្គភាពចំណុះ បានខិតខំប្រឹងប្រែងអនុវត្តការងារប្រកបដោយការទទួលខុសត្រូវខ្ពស់ ដើម្បីរួមចំណែក ធ្វើការអប់រំផ្សព្វផ្សាយ ការព្យាបាលស្តារនីតិសម្បទា សមាហរណកម្ម និងថែរក្សាសន្តិសុខ សណ្ដាប់ធ្នាប់សាធារណៈ និងការអភិវឌ្ឍន៍សង្គម។ ក្នុងឆមាសទី១ ឆ្នាំ២០២៤ អង្គភាពចំណុះក្រសួងការពារជាតិ បញ្ជាការដ្ឋានកងទ័ពជើងគោក និងបញ្ជាការដ្ឋានកងរាជអាវុធហត្ថ បានធ្វើការអប់រំផ្សព្វផ្សាយគ្រឿងញៀនបានចំនួន៤ពាន់៤រយ១២លើក មានអ្នកចូលរួមចំនួន៣២ម៉ឺន៤ពាន់១រយ២៥នាក់, បានធ្វើតេស្តរកសារធាតុញៀនសរុបចំនួន១៣ពាន់៨រយ៤០នាក់ វិជ្ជមាន ១៣នាក់ ហើយបានកាត់ចេញពីការគ្រប់គ្រងចំនួន១៣នាក់។
ចំពោះលទ្ធផលបង្ក្រាបបទល្មើសគ្រឿងញៀន បញ្ជាការដ្ឋានកងរាជអាវុធហត្ថ បានបង្ក្រាបបទល្មើសគ្រឿងញៀនចំនួន ៥រយ៤៩លើក ឃាត់ខ្លួនជនសង្ស័យសរុបចំនួន១,៣៣៩នាក់ ស្រី១២៨នាក់ និងចាប់យកសម្ភារៈវត្ថុតាងបានមួយចំនួនក្នុងនោះ៖ បានបញ្ជូនជនសង្ស័យទៅសាលាដំបូងចំនួន១,១៧៨នាក់ ស្រីចំនួន១០២នាក់។ បានបញ្ជូនទៅមជ្ឈមណ្ឌលស្តារនីតិសម្បទាចំនួន១១៤នាក់ ស្រីចំនួន១០នាក់។ បានធ្វើការអប់រំ និង ឲ្យវិលត្រឡប់ទៅលំនៅដ្ឋានវិញចំនួន៤៧នាក់ ស្រីចំនួន១៦នាក់។ ក្នុងឆមាសទី១ ឆ្នាំ២០២៤ មជ្ឈមណ្ឌលព្យាបាល និងស្តារនីតិសម្បទាអ្នកញៀនគ្រឿងញៀន នៃកងពលតូចថ្មើរជើងលេខ៣១ ចំណុះយោធភូមិភាគទី៣ បាន ទទួលជនរងគ្រោះជាជនស៊ីវិលចូលសម្រាកព្យាបាលសរុបចំនួន៥0៥នាក់ ស្រី១៨នាក់។
មានប្រសាសន៏បូកសរុបនាពេលនោះ នាយឧត្តសេនីយ៏ ចាយ សាំងយុន ថ្លែងការកោតសរសើរ គ្រប់អង្គភាពពាក់ព័ន្ធ ដែលបានខិតខំយកចិត្តទុកដាក់អនុវត្តយ៉ាងសកម្ម ប្រកបដោយការទទួលខុសត្រូវខ្ពស់ ទទួលបានលទ្ធផលល្អប្រសើរ ក្នុងឆមាសទី១ ឆ្នាំ២០២៤ កន្លងមក។ ឯកឧត្តម រដ្ឋលេខាធិការ បានលើកផែនការ ឆមាសទី២ ឆ្នាំ២០២៤ គឺគណៈកម្មាធិការប្រយុទ្ធប្រឆាំងគ្រឿងញៀន ក្រសួងការពារជាតិ អគ្គបញ្ជាការដ្ឋាន បញ្ជាការដ្ឋានប្រភេទទ័ព, ទ័ពជំនាញ និងមេបញ្ជាការគ្រប់អង្គភាព រួមទាំងមានការចូលរួមពីយោធិនគ្រប់រូប ត្រូវបន្តធ្វើការអប់រំផ្សព្វផ្សាយ បង្ការ ទប់ស្កាត់ ការប្រើប្រាស់ និងការប្រយុទ្ធប្រឆាំងគ្រឿងញៀន ប្រព្រឹត្តឲ្យបានល្អប្រសើរថែមទៀត ៕
